LGE2024 Changamoto za uendeshaji wa zoezi la Uchaguzi nchini na hasara inayopatikana kwa taifa

[Mapank]

BARUA YA WAZI KWA MHESHIMIWA RAISI WA JAMHURI YA MUUNGANO WA TANZANIA, MAMA SAMIA SULUHU HASSAN

YAH: CHANGAMOTO ZA UENDESHAJI WA ZOEZI LA UCHAGUZI NCHINI NA HASARA INAYOPATIKANA KWA TAIFA

Mheshimiwa Rais,

Kwa heshima na taadhima, napenda kuchukua nafasi hii kuandika barua hii ya wazi kwako, kama Mtanzania mwenye mapenzi mema na nchi yetu. Katika miaka ya karibuni, Watanzania wengi tumeshuhudia changamoto nyingi zinazohusiana na utaratibu wa uchaguzi. Mchakato wa uchaguzi ni jambo muhimu na la kikatiba, lakini mchakato huu umekuwa ukiandamwa na changamoto zinazotilia mashaka uwazi na usawa wake.

Moja ya changamoto kubwa ni usajili wa wapiga kura wasiokuwa na sifa, jambo ambalo limekuwa likitiliwa shaka na wananchi. Vilevile, tumeshuhudia wimbi la uenguliwaji wa wagombea wa vyama vya upinzani kwa misingi isiyoeleweka, hali inayojenga hisia za uonevu na kudhoofisha imani ya wananchi katika chaguzi zetu. Hali kama hii, Mheshimiwa Rais, inapoendelea, siyo tu inachangia kupoteza imani ya wananchi bali pia inapoteza rasilimali nyingi za taifa.

Fedha nyingi hutumika kugharamia chaguzi hizi, ambazo kwa mujibu wa mtazamo wa wengi zinakosa uwazi. Taifa linapoteza mabilioni ya shilingi ambazo zingeweza kuelekezwa katika kuendeleza sekta za msingi, kama vile ujasiriamali na maendeleo ya vijana. Fedha hizi zingeweza kuboresha maisha ya Mtanzania wa kawaida, kutengeneza ajira, na kuimarisha ustawi wa taifa letu.

Ikiwa inaonekana vigumu kwa taifa kusimamia uchaguzi kwa uwazi na usawa, basi kwa mapendekezo, viongozi waliopo waendelee kutawala kwa muda mrefu. Hatua hii itasaidia kuhifadhi fedha zinazoteketea kwenye uchaguzi na kuelekeza rasilimali hizo kwenye maeneo muhimu ambayo yatachangia maendeleo ya Watanzania.

Ninaamini kuwa mapendekezo haya yanaweza kusaidia kupunguza hasara inayopatikana kwa taifa na kuongeza ufanisi katika kusimamia rasilimali zetu. Lengo kuu ni kuona nchi yetu inapiga hatua na kuimarika, kwa faida ya vizazi vya sasa na vijavyo.

Mheshimiwa Rais, kwa heshima kubwa, naomba utazame changamoto hizi kwa upendo na hekima yako kwa Taifa letu.

Kwa heshima na taadhima,


Mwananchi mpenda maendeleo