Waziri Mkuu wa Jamuhuri ya Muungano wa Tanzania Mhe. Dkt. Mwigulu Lameck Nchemba amesema agenda ya sekta binafsi siyo tu agenda ya sekta binafsi pekee bali ni agenda muhimu na mtambuka ya taifa.
Akizungumza wakati wa uzinduzi wa Mkutano wa mwaka wa Tanzania National Chember of Commerce,, Waziri Mkuu alieleza kuwa mchango wa sekta binafsi katika Dira2050 ya taifa unafikia asilimia sabini (70) jambo linalothibitisha kuwa sekta binafsi ndiyo injini ya maendeleo ya taifa letu.
"Agenda ya sekta binafsi Sasa siyo tu kuwa ni agenda ya sekta binafsi pekee bali ni agenda ya nchi yetu. Kwa sababu Dira2050 ya taifa ina mchango wa asilimia sabini wa sekta binafsi. Kwa hiyo agenda ya sekta binafsi ni agenda ya taifa. Na kila Mtanzania aliye katika sekta binafsi na aliye nje ya sekta binafsi wote lazima tuelewe hivyo," alisema.
Aidha, Waziri Mkuu alisisitiza imani kubwa ya Mheshimiwa Rais kwa vijana wa Tanzania katika kila eneo. Alitolea mfano wa PPP Center, akimtaja ndugu David Zacharia Kafulila kama kijana mwenye upeo mpana na exposure ya kimataifa aliyoaminiwa na Mhe Rais Dkt Samia Suluhu Hassan.
"Kafulila ni Kijana, tena mwenye exposure kwa Kiswahili sanifu , tena "asiye mshamba". Msomi, tena siyo msomi tu wa shuleni, bali msomi wa current affairs. Kafulila ni Moja ya vijana wanaoelewa na waliofanikiwa kung'amua waliofanikiwa huko duniani wamefanikiwaje kwa kujifunza kutoka nchi kama Malaysia, Singapore na nchi nyingine," alisema.
Waziri Mkuu aliongeza kuwa Kafulila ni mfano wa vijana wabunifu na wenye uwezo wa kufanikisha miradi mikubwa.
Waziri mkuu alisisitiza pia kuwa vijana wa Tanzania wako practical na wanashiriki moja kwa moja katika maeneo ya kazi na miradi ya kitaifa.
"Hata ninyi wenyewe wengi mko practical, wengi wenu mko site.
Ya Kafulila nimeyataja tu kama eneo moja la mfano, Lakini Ukienda kwenye mashirika ya umma pia tunaye mwingine kule anaitwa Nehemia Mchechu," alihitimisha.