BigTall
JF-Expert Member
- Mar 9, 2022
- 706
- 1,716
Kwa kweli, nilichokiona kilinisikitisha. Mandhari ya maeneo hayo muhimu hayaridhishi. Taka zimezagaa kila sehemu, maeneo ni machafu, huku viroba na uchafu unaosukumwa na bahari vikiwa vimezagaa katika maeneo hayo jambo ambalo linaonesha kwamba hali hiyo imekuwepo kwa muda mrefu.
Ilibidi niongee na baadhi ya vijana wenyeji wa maeneo hayo. Walisema ni nadra sana kuona usafi ukifanyika katika maeneo hayo. Inavyoonekana, hali hiyo imezoeleka, jambo ambalo linaweka watu hatarini kupata magonjwa na majeraha kutokana na mazingira kutokuwa salama, hasa kwa wanaotembea kwa miguu au kuogelea katika ukingo wa bahari.
Kama tunavyofahamu, maeneo ya fukwe ni sehemu pendwa na kivutio kwa wageni, hasa ikizingatiwa hali ya hewa ya Dar es Salaam. Wageni wengi hutamani kutembelea maeneo yenye utulivu na mandhari nzuri. Kutokana na hali hiyo, nilishtuka sana kuona hali ilivyo, hasa wakati Tanzania inajiandaa kuwa sehemu ya waandaaji wa Africon. Swali lililobaki kwangu nikijiuliza: Je, suala la mandhari na usafi wa fukwe zetu linapewa umuhimu unaostahili?
Tukumbuke kwamba eneo hilo licha ya kuwa ni eneo la wazi limezungukwa na hoteli na maeneo ya starehe ambayo, sina shaka, yanaweza kuwa sehemu za kupokea wageni endapo mambo yataenda kama inavyotarajiwa. Kwa nini hakuna jitihada, hata kupitia ushirikishwaji wa wadau, za kupendezesha mandhari ya maeneo hayo na kuyafanya yawe katika hali ya kuvutia huku yakibakia kuwa maeneo ya wazi?
Hili si suala la AFCON pekee. Ni suala la usalama, afya, mazingira na hadhi ya jiji letu. Ni muhimu mamlaka husika kwa kushirikiana na wadau wengine kuchukua hatua mapema ili maeneo haya ya wazi yawe salama, safi na yenye kuvutia kwa wananchi na wageni wanaoyatembelea.
Pia soma
~ Rais Samia: Dar es Salaam ni kuchafu, ni aibu
~ DC Mpogolo: Atakaye tupa taka Ganda la Ndizi na Pipi faini Milioni 1, Dar