Tukiwa bado tunaendelea na maombelezo ya Rais wetu, mchapa kazi hodari, mtu wa matokeo, msimamizi makini wa pesa za uma, mwenye kuhakikisha kuwa pesa iliyotolewa kwa ajili ya utekelezaji wa miradi inatumika kwa malengo husika na aliyetufundisha mengi na hasa uthubutu wa kuyaendea mambo.
Kwa kipindi chote cha uhai wake alikuwa mtekelezaji mzuri wa ahadi. Mengi aliyoyahaidi ameyatimiza na mengine aliendelea kuyatimiza. Kila kona ya nchi unakopita, kuna miradi mingi ya maendeleo ikiendelea kutekelezwa.
Kwakweli ukitazama kwa jicho lisilo la husuda utabaini kuwa, nchi imechangamka sana na tulikuwa tunapiga hatua kwa kasi ya ajabu.
Dunia ilikuwa inatutazama kwa jicho la mshangao na kutoamini kile ambacho Tanzania tunafanya. Siku zote walikuwa wanajiuliza ni nani huyo aliyekuja kutuamsha kutoka kwenye usingizi wa pono na siku zote alikuwa wapi?
Huyu si mtu mwingine bali ni Jemedari wetu Hayati Dokta John Pombe Joseph Magufuli ambaye kwa dhati ya moyo wake aliamua kutuonyesha njia ya kupita.
Uwepo wake duniani ulituheshimisha sana Watanzania na hii ilikuwa zawadi kubwa kwetu na ya kipekee kutoka kwa muumba wetu
Tukitazama miradi mbalimbali aliyoitekeleza na inayoendelea kutekelezwa kwahakika tunaona fahari kubwa na kutembea kifua mbele kama yeye mwenyewe alivyotutaka na kutuhimiza siku zote kuwa Tanzania ni nchi Tajiri na Watanzania tutembee vifua mblele.
Wakati anaongea hayo bila shaka, wengi wetu hatukumuelewa nini alikuwa akimaanisha hasa lakini ajabu tuliendelea kushuhudia miradi mbalimbali ikiendelea kutekelezwa bila kukwama. Kwa kusema kweli Hayati Dokta Magufuli alikuwa ni 'Game changer' katika uchumi wa nchi yetu.
Aifanikiwa kumfanya kila Mtanzania aone fahari ya nchi yake na kufurahia kuona namna ambavyo nchi yetu ikipiga hatua ya maendeleo kwa kasi ya ajabu.
Kifo chake kimeleta fadhaha kubwa na isiyomithilika. Taifa limezizima. Watanzania wameloa kama kuku waliyomwagiwa maji. Hawaamini kilichotokea. Hawaamini si kwasababu wanapingana na kadari ya muumba hapana, ila imekuwa mapema mno.
Ameondoka wakati bado taifa likiwa linamuhitaji na kumtegemea.
Kifo chake kimetuacha katika sintofahamu kubwa juu ya yale ambayo aliwahaidi wafanyakazi.
Nakumbuka ahadi ya kwanza alihaidi kabla hajamaliza muda wake angewakumbuka wafanyakazi kwa kuwaobgezea mishahara na aliwasihi watulie wasiwe na wasiwasi na atakapowaongezea mishahara ingekuwa ni funga kazi na kwamba wafanyakazi wenyewe wasingeamini.
Lakini waswali wanasema mipango siyo matumizi, Dokta ameondoka kabla ya kutimiza ahadi yake kwa wafanyakazi..
Kwa siku zote toka alipochaguliwa kwa mara ya kwanza mwaka 2010, Watumishi walikuwa wamekaa katika shauku kubwa kusubiri ahadi yake ya kuwapandishia mishahara.
Sambamba na upandishaji wa mishahara kwa watumishi wa uma, upandajii wa madaraja nao ulikuwa haueleweki, unaweza kujikuta umekaa miaka 6 bila hata kupanda daraja. Nalo hili lilikuwa likisubiriwa kwa hamu sana kutoka kwake.
Toka awali aliwaomba wafanyakazi wavumilie huku akiijenga nchi na kwamba kabla hajaondoka madarakani angewafanyia kitu ambacho wasingeamini machoni kwao.
Na kwa vile wafanyakazi walikuwa na imani kubwa na yeye na kwamba siku zote alichokisema ndicho alichokuwa akikimaanisha, waliendelea kuchapa kazi kwa bidii huku wakipita kujilamba midomo kama watoto wenye njaa na chakula kitamu kikiwa jikoni kikisubiriwa kiive.
Lakini ndiyo hivyo tena, binaadamu hupanga na Mwenyezi Mungu hupangua.
Kifo cha Dokta John Pombe Magufuli kimetuliza na kutuachia simanzi nzito. Ni kama tuko kwenye kiza kinene, hatuoni mbele wala nyuma. Ametuacha Watanzania katika huzuni kubwa.
Watumishi walikuwa na matumaini makubwa sana na yeye juu ya hatma yao. Matumaini hayo hayakuwa kwa ajili ya kupandishiwa mishara na madaraja pekee bali hata kuwa na muundo wa mishahara inayofanana kwa wafanyakazi wa uma wenye sifa zinazofanana za elimu lakini wanafanya kazi katika sekta na taasisi mbalimbali.
Nakumbuka wakati Rais wa Jamuhuri ya Muungano wa Tanzania Hayati Dokta John Pombe Magufuli anawania nafasi ya Urais katika awamu yake ya kwanza katika kampeni zake za kuomba ridhaa kwa wananchi, aliongelea juu ya maslahi ya watumishi na hasa kupishana pishana kwa viwango vya mishahara kati ya watumishi wa Idara na taasisi mbalimbali za Serikali pamoja na kwamba wote wana elimu inayofanana na kwamba alihaidi kuunda tume itakayofuatilia maslahi ya watumishi na pia kuja na muundo wa pamoja wa mishahara utakaotoa mishahara ya ulinganifu kulingana na elimu.
Wale wote wenye elimu inayofanana wangekuwa na mshahara mmoja bila kujali anafanyia taasisi gani iwe Serikali kuu, Serikali za Mitaa, Mashirika ya Umma au kwenye bodi mbalimbali.
Jambo hili lilipokelewa kwa mikono miwili na watumishi kwani lingekuwa mwarobaini wa watumishi kuhamahama kutoka Idara moja na nyingine au Kutoka shirika moja kwenda jingine au kutoka taasisi moja kwenda nyingine. Ni mfumo ambao ungetoa haki kwa watumishi na naamini kila mtumishi angejihisi kuwa ni mfanyakazi anayethaminiwa vyema.
Lakini hadi umauti unamfika hakufanikiwa kutekeleza azma yake hiyo kwa wafanyakazi wake.
Naamini ingefanikiwa kutekelezwa azma yake hiyo bila shaka ingesaidia kupunguza manung'uniko miongoni mwa wafanyakazi kwasababu ingeleta msawazo wa mshahara niongoni mwa watumishi na hivyo kuongeza ari ya ufanyaji kazi na kuinua uchumi wa nchi yetu.
Hoja ya msawazo wa mishahara ilikuwa ni hoja muhimu na nyeti kwa watumishi ndiyo maana wakati huo Mheshimiwa Hayati Dokta John Pombe Magufuli alipoieleza hoja hiyo ilipata uungwaji mkono mkubwa miongoni mwa watumishi hata kama haikuwa dhahiri lakini kila mtumishi aliiunga mkono.
Utofauti wa mishahara kwa hakika unawaumiza sana watumishi hasa ukizingatia kuwa gharama za elimu ni kubwa na Bodi ya Mikopo ya Elimu ya Juu ambayo watumishi wengi walisomeshwa kwa mikopo hiyo, makato yake ni makubwa na yanakwenda kwa wanaufaika wote bila kujali kiwango chao cha mishahara
Sambamba na makato ya bodi ya mikopo bado watumishi wanakatwa kodi za mishahara, mafao ya kustaafu, Bima, vyama vya wafanyakazi nk. Na hapo hapo bado pia haijamulikwa mikopo inayokopwa na Wafanyakazi benki kwa ajili ya vipaumbele binafsi. Lakini mwisho wa siku kile kinachobaki chini kwakweli ni kilio kikubwa kwa watumishi.
Kwa sasa Hayati Dokta John Pombe Maguguli ametangulia mbele ya haki na Mikoba yake imebaki kwa Mama yetu na Rais wetu wa Jamuhuri ya Muungano wa Tanzania Mhe. Samia Suluhu Hasan pamoja na kuwatazama Watanzania wote lakini nilikuwa naomba kwa heshima na unyenyekevu mkubwa jaribu kuyatazama yale ambayo Hayati Dokta John Pombe Magufuli aliyapanga na kuhaidi katika kuinua hali za maisha ya watumishi wa uma pamoja na kwamba nawe una vipaumbele vyako binafsi.
Ni muhimu wafanyakazi nao wakatazamwa kwa jicho lako la huruma hasa kwenye nyongeza ya mishara, Upandaji wa madaraja ambavyo vyenyewe vipo kisheria. Pia kama ingekupendeza kufanya uwiano wa mishahara kati ya wafanyakazi wa taasisi moja na nyingine waliyo na sifa zinazofanana lakini wako kwenye taasisi tofauti pia nayo kwahakika ingekuwa ni jembo jema..
Naamini kwa kufanya hayo tutakuwa tumemuenzi vizuri Hayati Dokta John Pombe Magufuli aliyekuwa Rais wetu wa Jamhuri ya Muungano wa Tanzania.
Naomba nikutakia kila la kheri mama yetu Samia Suluhu Hasan katika utekelezaji wa majikumu yako mapya na ya juu katika kulitumikia taifa letu.
Na mwisho kabisa tukiwa bado kwenye maombolezo ya mpendwa wetu Hayati Dokta John Pombe Magufuli, nichukue nafasi hii kumtakia mapumziko mema na Mwenyezi Mungu amhifadhi mahala pema peponi Amina.
*Mwendo ameumaliza, imani umeilinda.
Kwakheri Hayati Dokta John Pombe Magufuli
Tutaonane tena Baadae.*
Aman Ng'oma
0767989713
