DOKEZO Kilio cha Wananchi: Ajali za Malori ya Mchanga zimegeuka Janga maeneo mengi ya Dar es Salaam

[mkweliwatz]

Hali ya usalama barabarani imeendelea kuzorota huku malori ya kubeba mchanga yakihusishwa moja kwa moja na ajali nyingi zinazogharimu maisha ya wananchi wasiokuwa na hatia. Kila siku, barabara zinageuka kuwa hatari zaidi, huku madereva wa malori haya wakionekana kupuuza kabisa sheria zilizowekwa kulinda watumiaji wengine wa barabara. Kilicho cha kusikitisha zaidi ni kwamba hali hii imekuwa ya kawaida kiasi cha kuonekana kama hakuna anayewajibika.

Katika eneo la Kimara Suka, tukio la kusikitisha lilitokea baada ya ajali mbaya iliyosababisha vifo vya watu kadhaa hali iliyowafanya wananchi wenye hasira kali kuchoma moto lori lililohusika na kupelekea kifo cha dereva husika. Tukio hili halikuwa tu ishara ya hasira, bali lilionyesha wazi kiwango cha kukata tamaa kwa jamii inayohisi kutelekezwa na mfumo wa sheria. Wananchi waliona kama hakuna njia nyingine ya kusikika isipokuwa kuchukua hatua kali.

Hali kama hiyo imekuwa ikijirudia katika eneo la Kinyerezi, ambapo ajali zinazohusisha malori ya mchanga zimeendelea kuripotiwa mara kwa mara. Vifo vinaongezeka, familia zinabaki katika majonzi, lakini hatua madhubuti hazionekani kuchukuliwa. Wananchi wanasema wamechoka kusikia ahadi zisizotekelezwa huku maisha yao yakiendelea kuwa hatarini.

Ni wazi kuwa kuna mnyororo mzima wa uzembe unaochangia hali hii, kuanzia kwa madereva wanaokimbiza magari kwa kasi, kubeba mizigo kupita kiasi, hadi waajiri wanaowalazimisha kufanya kazi kupita mipaka ya kibinadamu ili kuwahisha mkakati wa kumaliza miradi.

Pamoja na hayo, udhaifu wa usimamizi kutoka kwa mamlaka husika unazidi kuongeza tatizo, huku baadhi ya malori yakiruhusiwa kuendelea na shughuli bila ukaguzi wa kina au hatua kali kuchukuliwa dhidi ya wanaokiuka sheria.

Matukio ya wananchi kuchoma magari ni ishara ya hatari zaidi inayopaswa kuchukuliwa kwa uzito mkubwa. Haya ni matokeo ya moja kwa moja ya kupotea kwa imani kwa mfumo wa sheria na utekelezaji wake. Jamii inapofikia hatua ya kujichukulia sheria mkononi, ina maana kuwa sauti zao hazisikiki tena katika njia rasmi, na hilo linaweza kusababisha machafuko makubwa zaidi endapo hali itaendelea kupuuzwa.

Ni wakati sasa kwa mamlaka husika kuacha ukimya na kuchukua hatua za haraka na madhubuti ili kukomesha hali hii. Usimamizi mkali wa sheria za barabarani, uwajibikaji wa madereva na waajiri wao, pamoja na hatua za wazi dhidi ya ukiukwaji wa sheria ni mambo yasiyoweza kuepukika tena. Bila hatua hizo, barabara zitaendelea kuwa maeneo ya majonzi.

 

[Mshana Jr]

1.Traffic wetu na kitengo kizima cha usalama barabarani ndio watuhumiwa wa kwanza wanaotakiwa kuubeba huu mzigo
Hao madereva wana leseni za madaraja husika lakini kiuhalisia wamezipata kwa njia za mkato lakini hawajui mengi kuhusiana na sheria za usalama barabarani
2. Mamlaka zinazotoa vibali vya kukusanya, kuuza na kusafulirisha mchanga zitazame upya sheria na kanuni za hiyo biashara

Hili tatizo lilikuwepo sana Bagamoyo road wakati ule machimbo ya mchanga na vifusi yakiwa huko.. Yaliuwa watu wengi sana kusababisha hasara na uharibifu mkubwa wa mali.. Sasa naona limehamia Morogoro rd

Traffic wao wanachoangalia sio usalama bali ni maslahi yao.. Akishikishwa leseni na elfu 2000 imetosha kabisa kwake..

3. Matamshi na matamko ya wanasiasa pia ni tatizo lingine kubwa sana. Tungekuwa na wanasiasa wenye tafakuri ya kina tungeliepusha taifa na madhila mengi sana

Sasa hivi kila idara na mamlaka wanazingatia kwa ukubwa wake matamshi ya KULA KWA UREFU WA KAMBA ni sentence moja tu ya mwanasiasa mwenye mamlaka imetosha kulitumbukiza taifa kwenye mtanziko mkubwa sana wa uzembe rushwa wizi na kila aina ya upigaji

 

[cocastic]

Tanzagiza.

 

[PureView zeiss]

Madereva wote wa daladala na fujo zao zote wakikutana na malori ya mchanga wananywea kabisaa huwa wanakuwa wapole Sana maana wanajua hawa ni machizi zaidi Yao kwasababu muda wowote anakuachia body ucheze nayo.
Ukiwa barabarani usijaribu kuchomekea malori ya mchanga utakufa