Mkurugenzi Mtendaji wa Kampuni ya Msama Promotions, Alex Msama amewataka Watanzania kutozitilia maanani na kuzipuuza habari zinazosambaa mitandaoni kwamba, amefukuzwa kwenye nyumba yake iliyopo Upanga jijini Dar es Salaam.
Msama amesema hayo leo jijini Dar es Salam kuwa kuna baadhi ya watu wenye nia ovu ya kumchamfua katika jamii hasa kipindi hiki cha kuelekea kwenye Uchaguzi Mkuu wa 2025.
Amesema watu hao wamekuwa wakiandika mitandaoni kwamba, yeye amefukuzwa kwenye nyumba yake iliyopo Upanga.
Amesema: "Video zinazosambaa mitandaoni zinaelekezwa na watu wasio na nia njema na mimi. Na wana lengo la kunichafua hasa kipindi hiki cha 'vita ya ubunge'.
"Hivyo, nawaomba Watanzania puuzeni habari hizo kwa sababu sina nyumba Upanga wala sijafukuzwa kwenye nyumba yoyote," alisema Msama.
Imekuwa ni 'utamaduni' mbaya wa baadhi ya watu wanapotaka kugombea nafasi za kisiasa, hasa za kuchaguliwa na wananchi kwa kupigiwa kura, huwapaka 'matope' wengine ambao na wao, au wametangaza kugombea nafasi hizo ama wameonesha nia ya kugombea.