Kinachotajwa na Marekani kuhusu mkutano huu, ni kuwa lengo lakini ni kuhimiza ushirikiano wa kiuchumi, utawala bora, amani na usalama, sekta ya afya, usalama wa chakula, mwitikio wa msukosuko wa mabadiliko ya tabia nchi, na kuhimiza mahusiano ya diaspora ya Afrika.
Kwa kuangalia jina la mkutano huu, bila shaka tunaweza kuutaja kuwa ni mkutano mkubwa, ambao bila shaka kwa nchi za Afrika itakuwa ni moja ya fursa nyingine duniani za kutafuta njia za kujiendeleza, na kuinua uchumi. Lakini kwa upande wa Marekani mkutano huu utakuwa ni moja ya majukwaa muhimu ya kutafuta uungaji mkono katika kutekeleza sera yake ya mambo ya nje.
Hata hivyo kati ya mikutano yote kati ya Afrika na nchi za magharibi, huu ni mkutano ambao unaonekana hauna hamasa yoyote, na matarajio ya upande wa Afrika kuvuna chochote kwenye mkutano huo ni madogo sana. Hili linatokana na ukweli kwamba ufuatiliaji wa Marekani kwa sasa kwenye siasa za kimataifa umeelekezwa nchini Ukraine huko ndiko sera, fedha, na raslimali nyingine zinaelekezwa.
Kuna dalili kidogo sana kwa Marekani kubadilisha mwelekeo huo kwa sababu tu ya mkutano wa kilele kati yake na nchi za Afrika, zaidi kinachoweza kukadiriwa ni kuwa Marekani itatumia mkutano huo kama jukwaa la kuvutia uungaji mkono wa nchi za Afrika kwenye suala la Ukraine.
Uzoefu ulioonekana kwa muda wote wa Rais Joe Biden kuwepo madarakani, unaonesha kuwa kauli zinazotolewa na Marekani kuhusu kurudisha uwepo wake barani Afrika, zimekuwa ni maneno mazuri ya kuonesha urafiki wa Marekani kwa nchi za Afrika, tofauti na wakati wa Rais Trump aliyefikia hata kutumia lugha za matusi.
Lakini undani wa kisera unaonesha kuwa, kuna mabadiliko kidogo sana yenye manufaa kwa nchi za Afrika. Inawezekana pia kuwa mkutano huu itakuwa ni fursa nyingine ya kukutana na kupiga picha, na isiwe na fursa kubwa kiuchumi kwa maendeleo ya nchi za Afrika.
Changamoto kubwa iliyopo kwa Marekani kwa sasa, ni kwamba China imeweka kigezo cha juu sana kuhusu hii mikutano ya kilele. Mara nyingi viongozi wa Afrika wanapokwenda kwenye mikutano hii ya kilele, si kama wanatafuta fursa ya kupiga picha au kuonekana kwenye televisheni, kikubwa wanachotafuta ni fursa za maendeleo kwa nchi zao.
Mkutano wowote kati ya China na Afrika, uwe ni wa ngazi marais au ngazi ya mawaziri, fursa za kiuchumi kwa pande zote huwekwa mezani. Kwa hiyo tofauti na fursa za maana za kiuchumi kwa nchi za Afrika, mkutano huo utakuwa ni wa kukatisha tamaa.
Lugha iliyotumika safari hii kwenye kuutangaza mkutano huo imetaja fursa za kiuchumi, lakini pia imerudia mambo yaleyale yaliyokuwepo kwenye miaka ya nyuma. Utawala bora, usalama, sekta ya afya, usalama wa chakula, kukabiliana na mabadiliko ya tabia nchi, na kuhimiza mahusiano ya diaspora.
Bila shaka haya ni mambo ya thamani ambayo nchi nyingi za Afrika zinayathamini, lakini ukweli umeonesha kuwa uwekezaji wenye kuongeza uzalishaji, biashara na hata miundombinu, vimekuwa ni vichocheo vikubwa kwa maendeleo ya nchi za Afrika.
