Miss Zomboko
JF-Expert Member
- May 18, 2014
- 4,618
- 9,611
MIKOA minne imetajwa kuwa kinara wa ndoa za utotoni kipindi hiki ambapo wanafunzi wapo majumbani, kutokana cha mlipuko wa ugonjwa wa corona.
Serikali ilitangaza kuzifunga shule zote za msingi, sekondari na vyuo Machi 17, mwaka huu kutokana na mlipuko wa janga hilo. Mikoa hiyo ni Ruvuma, Mara, Arusha na Mtwara.
Kwa Mtwara wanafunzi 100 wameripotiwa kupata mimba katika kipindi hiki cha corona.
Akizungumza katika mkutano wa majadiliano, uliofanyika kwa njia ya mtandao wenye kauli mbiu ‘Usawa wa Kijinsia’ ulioandaliwa na UN Women na Plan International, ukishirikisha na wadau mbalimbali, Mkurugenzi wa Taasisi ya Msichana Initiative, Rebecca Gyumi alisema miaka 25 ya kimkakati ya Beijing, bado wanawake wana changamoto kubwa katika kusaka usawa wa jinsia
Alisema kipindi cha ‘lockdown’ wanawake na wasichana, wameendelea kupitia vipindi vigumu kwa kuyumba kiuchumi ikiwa ni pamoja na kufanyiwa ukatili wa kijinsia.
“Wasichana wanalazimishwa kuolewa wakiwa katika umri mdogo wakati ambao wamepumzishwa nyumbani kutokana na ugonjwa wa Covid-19, ukatili pia umeongezeka, na mimba za utotoni,” alisema Gyumi.
Alisema pia kipindi hiki cha corona, wanawake wengi wasio katika sekta rasmi wakiwemo mama ntilie, wafanyabiashara sokoni, wanawake wanaofanya kwenye hoteli na sekta nyingine za utalii, wameathirika zaidi kutokana na mlipuko wa janga hilo.
Mkuu wa Idara ya Ushirikiano kutoka Ubalozi wa Finland, Riikka Roatikainen alisema ukatili wa majumbani, umeongezeka katika kipindi hiki cha mlipuko wa Covid 19. Kwamba uwazi unahitajika kwa kutoa takwimu sahihi na utoaji wa habari sahihi na kuwapa nguvu wanawake katika ngazi za maamuzi.
“Kwa kipindi hiki cha janga la Covid- 19, upatikanaji wa taarifa sahihi ni haki kwa kila mwananchi. Hivyo ni muhimu mbinu zinazotumika ziangalie mahitaji ya taarifa kwa makundi mbalimbali ya kijamii na vyombo na muda sahihi wa kupeleka taarifa kwa makundi hayo hasa vijijini,” alisema.
Mkurugenzi wa TGNP, Lilian Lihundi alisema ugonjwa wa Covid-19 umeleta changamoto kubwa kwa wanawake na kuitaka serikali iweke kipaumbele na nguvu zaidi katika huduma za jamii, ikiwemo sekta ya elimu, maji na afya.
Kwa mujibu wa takwimu za Shirika la Ajira Duniani (ILO) mwaka 2006, zaidi ya asilimia 80 ya wanawake wapo katika ajira zisizo rasmi, kama vile sokoni kwenye mikusanyiko mikubwa, jambo linalowaweka katika hatari kubwa ya kupata maambukizi ya ugonjwa huo.
Alisema pia kwa miaka mingi kundi hilo limekuwa lipo chini kielimu. Taarifa ya UNESCO ya 2019, inaonesha kuwa kiwango cha elimu kwa watu wazima ni asilimia 77.89, ambapo wanaume ni asilimia 83 na wanawake ni asilimia 73.09
“Takwimu hizi ni ushahidi wa wazi kuwa wanawake wameachwa nyuma katika masuala mbalimbali. Tofauti hiyo ya wanawake kuwa nyuma utaiona pia katika nyanja ya ufikiwaji wa taaarifa sahihi kwa wakati mfano magazeti, redio, televisheni na mitandao ya kijamii,” alisema.
Alisema hali hiyo kwa kiasi kikubwa inatokana na mifumo ya jamii ya kutokuwa na mgawanyo sawa wa majukumu.
Wanawake kwa kiasi kikubwa wameelemewa na majukumu ya kulea familia na kazi za kutoa huduma, ambazo zinasababisha kukosa muda wa majukumu ya kiuchumi, kisiasa, na hata kupata taarifa sahihi na kwa wakati.
Alisema janga hili la virusi vya corona, limeibua changamoto mpya katika familia na jamii, hususani kwa watoto wa kike na wa kiume, ambao shule zimefungwa na wapo majumbani Liundi alisema takwimu zinaonesha kuwa takribani asilimia 60 ya vitendo vya ukatili wa kijinsia, hutokea majumbani na wanaofanya vitendo hivyo ni ndugu wa karibu au majirani.
“Kwa ujumla, ukatili wa kijinsia huongezeka sana wakati wa majanga kama haya, si tu kwa watoto bali pia kwa wanawake,”alisema.
Liundi alisema wanawake wengi wapo katika sekta isiyo rasmi, wakijishughulisha na shughuli mbalimbali kama vile mama lishe, biashara sokoni, shughuli za viwandani na wafanyakazi wa majumbani.
Kazi hizo zinahusisha kutoka mazingira ya nyumbani na kukutana na watu mara nyingi katika mazingira yenye misongamano. Hali hii inawaweka katika mazingira hatarishi ya kupata virusi hivi vya corona.
