Parabolic
JF-Expert Member
- Dec 3, 2013
- 2,922
- 3,252
Nabii Mikaya mwana wa Imla alisimama kinyume na manabii wengine waliokuwa wakimtia moyo mfalme Ahabu wa Israeli kwenda vitani, akimtabiria kuwa angekabiliwa na kushindwa na kwamba jeshi la Israeli lingekosa kiongozi. Licha ya onyo hilo, mfalme aliamua kwenda vitani, na hatimaye aliuawa kama nabii huyo alivyokuwa ametabiri.
Simulizi hili linapatikana katika Biblia, kitabu cha 1 Wafalme 22:1–38, na pia 2 Mambo ya Nyakati 18:1–34.
Mfalme Ahabu alitamani kuiteka Ramoth-Gileadi
Baada ya miaka kadhaa ya kutokuwepo kwa vita kati ya Israeli na Shamu, mfalme Ahabu wa Israeli aliamua kutaka kurejesha mji wa Ramoth-Gileadi, uliokuwa chini ya utawala wa Shamu.
Ahabu alimwomba mfalme Yehoshafati wa Yuda aungane naye katika vita hivyo. Yehoshafati alikubali, lakini akashauri kwanza watafute mapenzi ya Mungu kuhusu mpango huo.
Ahabu akawakusanya manabii wake wapatao 400 na kuwauliza kama aende vitani dhidi ya Ramoth-Gileadi au ajizuie.
Manabii hao walimjibu kwa kauli moja kwamba aende vitani, wakitabiri kuwa Mungu angempa ushindi.
Hata hivyo, Yehoshafati hakuridhika na majibu hayo, akauliza kama kulikuwa na nabii mwingine wa Bwana ambaye wangeweza kumuuliza.
Ahabu akamjibu kuwa alikuwepo nabii mmoja, Mikaya mwana wa Imla, lakini hakumpenda kwa sababu hakuwahi kumtabiria mambo mazuri, bali mabaya.
Pamoja na kauli hiyo, Ahabu alikubali Mikaya aitwe.
Mikaya atabiri kushindwa kwa Israeli
Mjumbe aliyetumwa kumchukua Mikaya alijaribu kumshawishi aseme maneno yanayofanana na yale ya manabii wengine, lakini Mikaya alisisitiza kuwa angesema kile ambacho Mungu angemwambia.
Alipofika mbele ya wafalme, mwanzoni Mikaya alijibu kwa kejeli akisema Ahabu aende vitani kwa kuwa atashinda. Lakini Ahabu alimtaka aseme ukweli kwa jina la Bwana.
Ndipo Mikaya akatoa unabii uliobadili hali ya mkutano huo.
Alisema alimwona Israeli imetawanyika milimani kama kondoo wasio na mchungaji, kisha Bwana akasema watu hao hawakuwa na bwana na kila mmoja arudi nyumbani kwa amani.
Maana ya ujumbe huo ilikuwa kwamba mfalme angeanguka vitani na jeshi la Israeli lingebaki bila kiongozi wake.
Mikaya pia alieleza maono aliyoyaona kuhusu mkutano wa mbinguni, akionyesha jinsi manabii wa Ahabu walivyokuwa wakiongozwa na roho ya udanganyifu ili wamshawishi mfalme aende vitani na aangamie.
Unabii huo ulimkasirisha Ahabu. Nabii Sedekia mwana wa Kenaana akampiga Mikaya kofi usoni na kupinga maneno yake.
Ahabu akaamuru Mikaya apelekwe gerezani na apewe chakula kidogo na maji mpaka atakaporudi salama kutoka vitani.
Lakini Mikaya akasisitiza kwamba ikiwa Ahabu angerudi salama, basi Bwana hakuwa amesema kupitia kwake.
Ahabu aenda vitani licha ya onyo
Licha ya kusikia unabii huo, Ahabu aliamua kwenda Ramoth-Gileadi pamoja na Yehoshafati. Ili kujilinda, Ahabu alivua mavazi yake ya kifalme na kuvaa mavazi ya kawaida ya kivita, huku Yehoshafati akivaa mavazi yake ya kifalme.
Mfalme wa Shamu alikuwa amewaagiza makamanda wa magari yake ya vita wasipigane na mtu mwingine yeyote isipokuwa mfalme wa Israeli.
Walipomwona Yehoshafati akiwa amevaa mavazi ya kifalme, walidhani ndiye Ahabu na kumfuata. Yehoshafati alipopiga kelele, walitambua kuwa hawakuwa wakimfuata mfalme waliyemtaka na wakaacha kumshambulia.
Hata hivyo, askari mmoja wa Shamu alipiga mshale bila kulenga mtu maalumu, lakini mshale huo ukampata Ahabu kati ya viungio vya vazi lake la kivita.
Ahabu alijeruhiwa vibaya na akaendelea kusimama kwenye gari lake akitazama vita. Damu yake ilitiririka ndani ya gari, na jioni alifariki.
Kifo chake kilitokea kama Mikaya mwana wa Imla alivyokuwa ametabiri. Jeshi la Israeli lilipotawanyika, kila mtu alirudi nyumbani kwake.
Funzo la Nabii Mikaya
Nimesikia Waziri wa Habari, Utamaduni, Sanaa na Michezo ambaye pia ni Mlezi Kiserikali wa Mkoa wa Mwanza, Oktoba 16, 2026 akifanya majumuisho ya ziara yake mkoani humo akikemea tabia ya baadhi ya manabii wanaoleta taharuki kwa jamii kutokana na matamko yao.
Soma pia: Makonda asipotoshe umma, kwa mujibu wa biblia kiongozi wa dini hawapaswi kunyamazia maovu bila kujali kayatenda nani!
Makonda amewataka viongozi wa dini kumuomba Mungu afanye mema juu ya Tanzania. Kwani kila unabii unaotolewa ni vifo na majanga makubwa jambo linalozua maswali miongoni mwa watu.
Si mara ya kwanza kumsikia Makonda akiwaonya watumishi wa Mungu na matamko yao kwa Serikali, amekuwa na tabia ya kuwaonya viongozi hao na kuwataka kuitamkia mema Serikali.
Kwa funzo hili la Nabii Mikaya, ni vizuri viongozi wakasikiliza maonyo ya manabii hata kama hawayapendi, yanaweza kuwaepusha na hatari sio tu kwa taifa bali hata kwa usalama wao binafsi.