Kasaba Street, Plot 57/31A Kinondoni
P. O. Box 67311, Dar es Salaam, Tel.: +255 784 440 073, 0784 447077
Fax: +255 22 276 0560, website:
www.halihalisi.com.tz/mwana
E-mail:
halihalisi06@yahoo.com
10 10 2008
Taarifa kwa vyombo vya habari
NIA YA SERIKALI YA KUFUNGA MwanaHALISI
NI wazi sasa kwamba serikali imedhamiria kuangamiza gazeti la MwanaHALISI. Inalituhumu kufanya uchochezi.
Juzi, 8 Oktoba, 2008 Wizara ya Habari Utamaduni na Michezo ilitoa tamko la kulaani gazeti letu kwa kuandika kuwa kuna njama za kumgoa Rais Kikwete ili asigombee urais mwaka 2010.
Taarifa ya wizara iliyosambazwa Jumatano kwa vyombo vya habari ilitupa siku tatu hadi leo tuwe tumejieleza kwa nini tusichukuliwe hatua kwa kuandika hivyo pamoja na madai mengine ya serikali.
Siku hiyohiyo, Mkurugenzi wa Idara ya Habari (MAELEZO) ambaye kwa nafasi yake ndiye Msajili wa Magazeti, alituandikia akitaka tujitetee kwa nini tusichukuliwe hatua kwa kuandika habari hiyo.
Tofauti na Wizara iliyotaka maelezo katika siku tatu, MAELEZO ilitaka utetezi kesho yake jana kabla ya saa 9.30. Tofauti ya muda wa utetezi inaweza kutafsiriwa kuwa nia ya haraka ya kutaka kuzima gazeti letu.
Hata tulipoomba muda wa kujibu hadi Jumatatu, MAELEZO ilikataa, kwa maandishi kuwa lazima tujibu jana hiyohiyo. Kazi hiyo tumeifanya na maelezo tuliyopeleka mnaweza kuyapa hukohuko, MAELEZO.
Kama kwamba hiyo haitoshi, Mkurugenzi wa Mawasiliano Ikulu, Salva Rweyemamu aliwaambia waandishi wa habari jijini Dar es Salaam jana kuwa habari iliyoandikwa na gazeti letu ulikuwa uongo uliotungwa na kutiwa chumvi nyingi tu kwa lengo la kutaka kuuza gazeti. Ni porojo tu za kutaka kuuza gazeti.
Nimewaiteni hapa kuwaambia kuwa serikali, kwa kauli za Wizara ya Habari, MAELEZO na kauli za Salva Rweyemamu, imedhamiria kuua gazeti letu.
Tayari tumejieleza MAELEZO na wizarani. Lakini tunaweza kusema kitu kimoja hapa; kuwa tusingependa serikali ichukue hatua ya kufungia wala kufuta gazeti hili la wananchi.
Rweyemamu anasema tuliandika porojo ili kuganga njaa. Tunasema siyo porojo. Lakini kuna porojo ngapi mitaani na katika vyombo vya habari ambazo hazijaitikiwa kwa kishindo kama hiki?
Lakini kichekesho ni kwamba gazeti la Rai lilipoandika kuwa Waziri aanza mbio za kumngoa JK 2010 (Rai Aprili 10-16, 2008), si Rweyemamu wala MAELEZO wala wizara ya habari ilijitokeza kulaani
Rai liliandika, Waziri mmoja aliyepo katika serikali ya Rais Kikwete, ameanza harakati za kugombea urais mwaka 2010, akitumaini kumuangusha rais aliyeko madarakani.
Tofauti iliyopo kati ya kuangusha na kungoa ni ya uchaguzi tu wa neno lipi litumike kwa shabaha ya kuweka uzito upi. Serikali ilikaa kimya.
Tunataka kusema kuwa habari ya MwanaHALISI inayolalamikiwa haina uchochezi ndani yake.
Tulitarajia serikali kusema inachunguza habari tulizochapa na kutafuta ukweli wake. Tulitarajia kuombwa msaada na wahusika katika uchunguzi huu. Tulitarajia Rweyemamu aseme hajapata taarifa za kikundi au watu binafsi kufanya njama, kwa hiyo anahitaji taarifa zaidi, badala ya kukimbilia kudai kuwa hakuna njama.
Tulitarajia wale walioguswa kulalamika na hata kwenda mahakamani ili watafute, siyo tu ukweli, bali haki mbele ya chombo cha kutoa haki kikatiba.
Tunaitaka serikali kuwa na uvumilivu katika kila jambo na hasa katika mambo yanayoigusa yenyewe na watendaji wake.
Tunatarajia hekima itatawala huku tukiendelea kuamini kuwa tulichoandika ni sahihi, siyo porojo na siyo uchochezi.
Tunataka kuamini pia kuwa serikali ina wajibu wa kuheshimu na kulinda uhuru wa wananchi wa kuendelea kutumia MwanaHALISI kama chombo chao cha mawasiliano.
.
Saed Kubenea
Mkurugenzi
Hali Halisi Publishers Limited