Timu za uokoaji jioni ya leo zimefanikiwa kumwokoa mwanamke mjamzito kutoka kwenye vifusi vya jengo la ghorofa 18 lililoporomoka katika eneo la Eastleigh, Nairobi.
Mwanamke huyo ni mtu wa pili kuokolewa baada ya mwanamume mmoja kuokolewa mapema leo na kupelekwa katika Hospitali ya Kitaifa ya Kenyatta kwa matibabu.
Jengo hilo liliporomoka Ijumaa, Oktoba 23, kando ya Barabara ya 9th Street, Eastleigh, na kuwaacha waokoaji wakikabiliana na kazi ngumu ya kutafuta watu wanaoweza kuwa wamekwama chini ya vifusi.
Shirika la Msalaba Mwekundu nchini Kenya lilisema lilikuwa limepokea taarifa za watu 31 waliokuwa hawajulikani walipo baada ya tukio hilo. Hata hivyo, taarifa hizo zilikuwa bado zikihakikiwa, huku baadhi ya wafanyakazi waliokuwa eneo la ujenzi wakiripotiwa kuwa waliondoka na kurejea nyumbani baada ya jengo kuanguka. Aidha Shirika hilo lilikuwa likifanya ufuatiliaji wa familia ili kubaini idadi halisi ya watu ambao huenda bado walikuwa wamekwama.
Timu za uokoaji kutoka mashirika mbalimbali zimeendelea kuondoa vifusi kwa uangalifu huku familia zikisubiri taarifa kuhusu wapendwa wao.
Mkasa huu umeibua tena wasiwasi kuhusu usalama wa majengo yanayojengwa Nairobi na namna mamlaka zinavyosimamia utekelezaji wa kanuni za ujenzi. Gavana wa Nairobi, Johnson Sakaja, alisema kuwa maombi ya ujenzi wa jengo hilo yalikuwa yamewasilishwa lakini hayakuwa yameidhinishwa, huku uchunguzi ukiendelea kubaini mazingira yaliyopelekea kuporomoka kwake.
Idara ya Polisi pia imetangaza kuanzisha jalada la uchunguzi kuhusu tukio hilo na kutangaza kuwa watu watakaobainika kuwajibika kwa uzembe au ukiukaji wa kanuni za ujenzi watachukuliwa hatua za kisheria.
Kwa sasa, juhudi za uokoaji zinaendelea huku matumaini yakibaki kuwa huenda watu wengine wakapatikana wakiwa hai.
Soma pia
