Juzi hapa kulikuwa na tukia la askari Polisi mkuu wa kituo cha polisi Mwanakwerekwe, Zanzibar, akishambuliwa hadharani, na wananchi wakishangilia japo waliona askari alikuwa amezidiwa (angalia picha hapa chini).
Kamanda wa polisi wa Mkoa wa Mjini Magharib, amewalalamikia wananchi kwamba walishuhudia tukio hilo lakini hawakutoa msaada wowote, na hata wengine walishangilia kuona mkuu wa polisi huyo akipewa kipigo.
Sasa hili ni jambo la kufikirisha sana. Si mara ya kwanza kunapotokea polisi kuuwawa au kushambuliwa wananchi wanashangilia au kutoa kauli za kejeli zinazoonyesha hawasikitishwi na kufa au kushambuliwa kwa polisi.
Tunajua si kitendo cha uungwana kushangilia kifo cha binadamu, lakini ni CCM na Polisi wenyewe wamesababisha hili. Wamejitakia wenyewe. Ni ujumbe tosha kabisa kwa serikali kwamba wananchi hawawaoni tena askari kama wapo kwa jukumu la kuwatumikia wananchi, bali kuwatumikia "mabwana" wao wa utawala wa CCM dhidi ya wananchi.
Polisi siku zote wamekuwa wakifanya kazi kwa kujipendekeza kwa utawala wa CCM, bila kufuata miongozo ya kazi zao. Polisi hawafanyi kazi tena kwa mujibu wa kanuni za polisi bali kwa maagizo toka juu, hata wakijua kwamba hayo maagizo toka juu yanakiuka haki za wananchi. Imefikia mahali wananchi wanaona kuwa askari polisi ni namna fulani ya utumwa kwa serikali ya CCM, kama kupewa "limbwata" hivi na chama tawala. Polisi wamepewa jina la PoliCCM.
Tumeshuhudia mara nyingi sana hata wanapoagizwa kuwakamata watu wa vyama vya upinzani, polisi wengine huomba msamaha kwamba wameamriwa toka juu na wanafanya hivyo si kwa utashi wao au kwa kuwa kuna sheria zimevunjwa. Kuna tetesi polisi hata wameambiwa watunge kesi za uongo dhidi ya watu, kuwabambikia kesi, na wanafanya hivyo bila kusita.
Tumefikia mahali watu mitaani wanasema mie nikikuta polisi anashambuliwa na mnyama au watu siwezi kabisa kumsaidia, kwa sababu polisi nao wamekuwa kama wanyama. Wengine wanasema siwezi hata siku moja kumpangisha polisi nyumba yangu. Wengine wanasema mwanangu akichumbiwa na polisi namkana. Haya ndio yaliyotokea Zanzibari. Wananchi wamefikia kutukana na kuwaita Polisi mbwa wa CCM. Kwa nini?
Sasa polisi ifikie mahali mjiulize, huu ndio uhusiano mnaotaka kujenga na wananchi, wa kuchukiwa kiasi cha wananchi kushangilia vifo vyenu? Mnafikiri ni nini kimewafikisha wananchi mahali hapo?
Endeleeni kujipendekeza kwa utawala wa CCM, na kadiri mnavyofanya hivyo mjue mnazidi kuharibu uhusiano wenu na wananchi. Mambo huwa yanabadilika. Kuna siku hao mnaojipendekeza kwao hawatakuwapo na mtabaki na aibu na fedheha kubwa. Na fedheha hii wenzenu wanaipata hata sasa hivi pale wanapostaafu na kurudi mitaani kwa wananchi. Wanaona aibu hata kujumuika na watu wa kawaida.