Taa Za Makutano ya Uhuru-Msimbazi (Kariakoo) zipo likizo? Basi awekwe Traffic ili kuepusha kero

[DogoWaNjombe]

Ni zaidi ya miezi miwili kwa nyakati tofauti kila nikipita kwenye makutano ya mataa ya Uhuru na Msimbazi nakutana na kero ya msongamano wa magari eneo hilo, mtaa yaliyofungwa kuongoza magari eneo hilo yanakuwa yamezimika na hazifanyi kazi, waliopo maeneo hayo wanadai kuwa kero hiyo imekuwa ya kila siku.

Kibaya zaidi katika eneo hilo hakuna traffic maalum ambaye anakaa kama mbadala ili kuongoza magari labda inapotokea hali imekuwa mbaya zaidi ndipo anajitokeza askari wa kawaida kutoa msaada kuongoza magari, tofauti na hivyo muda mwingi unawakuta kondakta wa daladala ndio wanashuka kwenye magari yao na kuanza kutoa msaada hili magari yaweze kutembea.

Hali hiyo imekuwa kero kubwa na kuna muda inapelekea ajali huku magari yakikwanguana mara kwa mara kutokana na msongamano, lakini kibaya zaidi katika njia hiyo yanakatisha mabasi ya Mwendokasi ambayo yanakuwa kwenye mwendo wa kasi jambo ambalo ni hatali zaidi kama hakuna traffic au taa.

Wito wangu wa mamlaka husika, taa hizo kama zimeharibika zifanyiwe matengenezo, ambavyo kutofanya hivyo kwa kipindi kirefu ni kukosa uwajibikaji stahiki hali ambayo inahatarisha usalama wa Watumiaji wa barabara katika kipindi ambacho usalama wa barabarani umekuwa ukisisitwa zaidi na mamlaka.

Kama mamlaka husika haziwezi kuchukua hatua za kuhakikisha mataa hayo yanafanya kazi muda wote basi katika eneo hilo waweke Traffic ambaye atatekeleza majukumu ya kuongoza magari muda wote kama ambavyo tumekuwa tukiona kwenye baadhi ya maeneo ili kuepusha msongamano wa magari ambao ni kero.