Watumishi wa TAMISEMI mmefikiwa huku
Naibu Waziri Ofisi ya Waziri Mkuu (TAMISEMI), Reuben Kwagilwa amewataka watumishi wote waliopo chini ya Tamisemi nchi nzima kuzingatia muda wa kuripoti na kudumu kazini kulingana na kanuni za kudumu za utumishi wa umma.
Amesema watumishi wanapaswa kufika kazini saa 1:30 asubuhi, kuanza kazi mara moja na kudumu hadi saa 9:30 alasiri, ili kuhakikisha wananchi wanahudumiwa ipasavyo na kwa ufanisi.
View attachment 3506714
Akiwa katika ziara yake katika Shule ya Msingi Kisasa jijini Dodoma leo Novemba 24, 2025, Naibu Waziri Reuben amesema alipowasili shuleni hapo na kusaini kitabu cha mahudhurio saa 1:30 asubuhi, alikuta akiwa mtumishi wa 16 kusaini licha ya shule kuwa na takribani walimu 55, jambo alilolieleza kuwa ni ishara ya kutokutiliwa mkazo kwa taratibu za kazi.
Amesema maelekezo hayo anayatoa kwa niaba ya Waziri wa Tamisemi, Prof. Riziki Shemdoe, na kwamba serikali inalenga kuhakikisha Watanzania wanahudumiwa kwa wakati, wanasikilizwa na changamoto zao zinashughulikiwa ipasavyo.
“Hatuwezi kupeleka tabasamu kwa Watanzania kama hatuwahi kazini na hatudumu kwa muda tuliopangiwa. Watumishi wote hakikisheni mnazingatia hili,” amesema.
Aidha, amewataka wakuu wa mikoa na wakuu wa wilaya nchini kusimamia kikamilifu utekelezaji wa maelekezo hayo katika maeneo yao.