𝗧𝗔𝗡𝗭𝗔𝗡𝗜𝗔 𝗡𝗔 𝗔𝗡𝗚𝗢𝗟𝗔 𝗭𝗔𝗦𝗔𝗜𝗡𝗜 𝗠𝗔𝗞𝗨𝗕𝗔𝗟𝗜𝗔𝗡𝗢 𝗠𝗔𝗡𝗡𝗘 𝗬𝗔 𝗞𝗨𝗜𝗠𝗔𝗥𝗜𝗦𝗛𝗔 𝗨𝗦𝗛𝗜𝗥𝗜𝗞𝗜𝗔𝗡𝗢

[Habari za Zanzibar]

𝗧𝗔𝗡𝗭𝗔𝗡𝗜𝗔 𝗡𝗔 𝗔𝗡𝗚𝗢𝗟𝗔 𝗭𝗔𝗦𝗔𝗜𝗡𝗜 𝗠𝗔𝗞𝗨𝗕𝗔𝗟𝗜𝗔𝗡𝗢 𝗠𝗔𝗡𝗡𝗘 𝗬𝗔 𝗞𝗨𝗜𝗠𝗔𝗥𝗜𝗦𝗛𝗔 𝗨𝗦𝗛𝗜𝗥𝗜𝗞𝗜𝗔𝗡𝗢

Jamhuri ya Muungano wa Tanzania na Jamhuri ya Angola zimesaini mikataba na Hati za Makubaliano manne ya ushirikiano katika sekta za sheria na haki, usafiri wa anga, teknolojia ya habari na mawasiliano, pamoja na sayansi ya vipimo. Utiaji saini huo umefanyika wakati wa Ziara ya Kitaifa ya Rais wa Angola, Mhe. João Manuel Gonçalves Lourenço, nchini Tanzania, tarehe 29 na 30 Oktoba 2026.

Makubaliano hayo yanalenga kuimarisha uhusiano wa kihistoria na kidiplomasia kati ya nchi hizo mbili, pamoja na kupanua ushirikiano katika sekta muhimu kwa maendeleo ya kiuchumi, kuimarisha taasisi na kukuza mahusiano kati ya wananchi wa Tanzania na Angola.

Mkataba wa Uhamishaji wa Wafungwa Waliotiwa Hatiani unaweka utaratibu wa kuhamisha wafungwa wanaokidhi vigezo kutoka nchi moja kwenda nyingine, kwa kuzingatia masharti ya mkataba huo na taratibu za sheria zinazotumika. Ushirikiano huo unalenga kuimarisha ushirikiano wa nchi hizo katika masuala ya haki jinai.

Kwa upande wa usafiri wa anga, Mkataba wa Huduma za Usafiri wa Anga kati ya Nchi hizo (BASA) unaweka msingi wa ushirikiano katika sekta hiyo, kwa lengo la kuboresha muunganiko wa usafiri wa anga na kutoa fursa zaidi za kukuza biashara, utalii, uwekezaji na shughuli nyingine za kiuchumi.

Hati ya Makubaliano ya Ushirikiano katika Sekta ya Teknolojia ya Habari na Mawasiliano inalenga kukuza ubadilishanaji wa maarifa na utaalamu, pamoja na kuimarisha ushirikiano katika maendeleo ya teknolojia za kidijitali.

Aidha, Hati ya Makubaliano ya Ushirikiano katika Sayansi ya Vipimo inaweka msingi wa ushirikiano katika masuala ya upimaji, viwango vya vipimo na maeneo mengine ya kitaalamu yanayohusiana na sayansi hiyo.

Kwa upande wa Tanzania, mikataba na Hati hizo za Makubaliano zimesainiwa na Waziri wa Mambo ya Nje na Ushirikiano wa Afrika Mashariki, Mhe. Balozi Dkt. Mahmoud Thabit Kombo (Mb), pamoja na Mkurugenzi Mkuu wa Mamlaka ya Hali ya Hewa Tanzania (TMA), Dkt. Ladislaus Benedict Chang’a.

Kwa upande wa Angola, zilizosainiwa na Waziri wa Mambo ya Nje, Mhe. Téte António, Mkurugenzi wa Masuala ya Afrika, Mashariki ya Kati na Mashirika ya Kikanda, Balozi Jorge Catarino Cardoso, pamoja na Mhe. Mario Augusto da Silva Oliveira.

Utiaji saini wa mikataba na Hati hizo za Makubaliano unaonesha dhamira ya Tanzania na Angola ya kuendeleza vipaumbele vya pamoja vya maendeleo, kupanua maeneo ya ushirikiano na kuimarisha uhusiano wa kidiplomasia kati ya nchi hizo mbili.