Tukibaki Hai, Tutasimulia

Tukibaki Hai, Tutasimulia

TUKIBAKI HAI, TUTASIMULIA - 25




Na Steve B.S.M





Baada ya siku moja ...

Katika sehemu ya siri, majira ya jioni.

Jennifer akiwa amebebelea kikombe kidogo cha udongo kinachofuka moshi, aliufungua mlango mkubwa kukutana na kibaraza cha nje.

Kibaraza hiko kilikuwa kikubwa kwa wastani, kinaning'inia kwenye ghorofa hili, refu la hadhi ya kati.

Ghorofa lenye sakafu kadha wa kadha.

Kwenye kiti kikubwa cha mtindo, katika kibaraza hicho, alikuwa ameketi mwanamke maridadi, Mitchelle.

Mwanamke huyo alikuwa kavalia bukta fupi sana rangi ya manjano na blauzi nyeusi kwa juu. Nywele zake kazibana vema kwa nyuma, uso wake unang'azwa na miale dhaifu ya jua la jioni.

Alikuwa anatazama namna jua linavyozama. Alikuwa anapenda sana jambo hili. Alitulia hapo huku akiwa anatafakari mambo kadhaa kichwani.

Alipenda utulivu huu maana kichwani mwake kulikuwa na vurugu sana.

Pembeni ya kiti hicho kulikuwa na kijistuli kidogo cha kioo. Juu ya stuli hiyo kulikuwa na kijidaftari kidogo kilichofungwa, pembeni kidogo kalamu ndani ya mfuniko wake.

Jennifer akasogeza kijidaftari hiko na kuweka kikombe alichokuja nacho kisha akamkaribisha Mitchelle.

Alimwambia kwa lugha yake ya ishara,

"Nimeona nikutengenezee kahawa yako unayoipenda. Pengine itakupa 'mood' nzuri leo."

Mitchelle akanyanyua kikombe na kukitia mdomoni. Akanywa fundo moja ...

Aaaaahhh ... akajiskia vema. Ni kana kwamba mwili wake ulikuwa unangoja kitu hiki muda wote huo.

Alikunywa tena fundo la pili kisha la tatu ndipo akarejesha kikombe kwenye stuli.

"Ahsante sana, Jenny. Ulijuaje hiki ndo' kitu nahitaji kwa sasa?"

Jennifer akatabasamu kisha akamwambia namna gani anavyomfahamu, na mara zote anapomwona akiwa yuko chini basi humwinua kwa kahawa yake pendwa.

Mitchelle akatabasamu.

Jennifer akamwambia akitumia mikono yake,

"Kwa leo siku nzima ndo' nakuona ukitabasamu kwa mara ya kwanza. Kuna jambo linakutatiza?"

Akatazama kijidaftari kwenye stuli kisha akaongezea,

"Ni mambo yako ya biashara, sio?"

Mitchelle akashusha pumzi fupi kisha akajibebea kikombe chake cha kahawa. Badala ya kujibu, akanywa fundo la kahawa.

"Jipe muda wa kupumzika," Jennifer akaendelea kumuhasa. "Naamini kila jambo litakuwa sawa. Jana na juzi hujalala vema, hakikisha unapata usingizi leo."

Mitchelle akampatia uso wa kumuashiria amemwelewa lakini hakusema jambo na kinywa chake.

Aliendelea kutazama anga jekundu, jua sasa likiwa halionekani.

Jennifer akamtazama kwa kitambo kidogo kisha akakata shauri kwenda zake. Kabla hajafika popote, Jennifer akamuuliza,

"Umeshaniandalia zile nguo zangu za mtoko wa jioni?"

Jennifer akampa ishara kuwa tayari ashafanya vivyo alafu akaenda zake. Akabaki Mitchelle peke yake.

Peke yake katika utulivu aupendao.

Akafungua daftari lake mara moja na kuandika mambo kadhaa kisha akalifunga na kuendelea kunywa kahawa yake.

Kahawa ambayo alizidi kuipatia hamu kadiri anavyoitumia.

Hakuchukua muda mrefu, kahawa ikawa imeisha. Akamwita Jennifer amwongezee. Akiwa anangoja akapiga simu yake mara moja.

Jennifer akiwa anaandaa kahawa, akamsikia 'boss' wake akiwa anateta na simu. Sauti yake ilikuwa kali, anafoka kama mwehu.

Hata yeye akaogopa japo si mhusika.

Alipompeleka kahawa akamkuta akiwa amefura sana. Uso wake karibia wote umekuwa mwekundu.

Kwa hofu kubwa, akaweka chupa ya kahawa kwenye stuli, alafu akachoropoka upesi kwenda zake.

Hata Mitchelle hakumjali.

Alikuwa na mambo yake kichwani yanayomtinga. Mambo mengi kwelikweli.

Alikuwa anatazama daftari lake, akiandikaandika. Akikokotoa na kufunga hesabu.

Alisahau mpaka kahawa yake alomimina kwenye kikombe. Kahawa hiyo ikakaa mpaka ikapoa. Kahawa ilokuwepo kwenye chupa ndo' hakugusa kabisa.

Muda si mrefu alinyanyuka toka hapo akaenda kujiandaa. Baada ya muda mfupi akawa yumo ndani ya gari la kukodi, si 'Uber', akielekea kaskazini mwa eneo analoishi.

Alikuwa amevalia kawaida sana, si kama mtu mwenye mtoko mkubwa, hapa akiwa amejivesha blauzi na jeans tu.

Baada ya dakika kadhaa akawa amefika katika klabu moja ndogo, hapo akajiweka mahali palipotulia, muziki kwa mbali, akawa anakunywa taratibu wine kwa glasi.

Alimaliza glasi ya kwanza, ya pili ikiwa kati, bwana mmoja akaingia katika eneo hilo akiwa anaangazaangaza.

Bwana huyo alikuwa amevalia koti jeusi la ngozi, ndani tisheti nyepesi na chini jeans ikiambatana na raba nyeupe.

Bwana huyo alikuwa ni Bryson.

Alipoangaza upande wake wa kuume, Mitchelle akampungia mkono kumwita. Alisogea hapo na muda si mrefu akaja mhudumu kumsikiliza.

Akaagiza kinywaji laini ambacho hakikuchukua muda kufika. Glasi nyembamba yenye mrija mrefu wa kuvutia.

"Umekuja na kazi yangu?" Mitchelle akauliza.

"Ndio " Bryson akatoa flash kwenye koti lake na kumpatia Mitchelle.

"Ajabu," Mitchelle akasema akitazama flash hiyo, "kazi hii umeifanya kwa upesi sana. Ni kwasababu ya shida yako ama kuna kingine?"

Bryson akatabasamu. Tabasamu lake lilijieleza kuwa hiyo ndo' sababu ... Akanywa fundo moja la kinywaji chake kisha akaelezea ni namna gani alivyokuwa ana uhitaji wa kuonana naye.

Alisema,

"Unajua ni namna gani ilivyo ngumu kuonana na wewe. Niliamini nikifanya kazi hii nikaimaliza kwa haraka basi itakuwa rahisi kukushawishi."

Mitchelle akamtazama bwana huyo kwa macho ya udadisi. Akanywa fundo moja la wine yake alafu akamuuliza akiwa anaendelea kumtazama ... macho ya kupembua,

"Unataka nini, Bryson?"

Bryson kwanza akatulia. Alikuwa anayapanga mambo yake kichwani ... Alitafakari mambo yanayomkabili japo kwa muhtasari kisha akafunguka haja yake.

Alieleza namna gani alivyokuwa na uhitaji mkubwa wa pesa kwani watoto wake wanatakiwa kufanya upasuaji.

Akiwa anaeleza hayo, macho yake yalilenga kwa machozi. Na Mitchelle akajua namna gani bwana huyu alivyokuwa na shida haswa.

Asiseme kitu, akaagiza kinywaji kingine alafu akaulaza mgongo wake kitini.

Kwa ukimya huu wa sekunde chache, muziki laini uliokuwa unapiga hapa ukatawala.

Wimbo wa 'Stuck on You' wa Lionel Richie ulishika hatamu watu wakijifurahisha na vinywaji vyao, wengine wakiimba na wengine wakitikisa miili yao taratibu kuitikia wimbo huo mwanana.

Kwa muda huo Mitchelle, kama kobe aliyejificha ndani ya gamba lake, alikuwa anatunga sheria kichwani.

Kinywaji kilipowasili, akanywa kwanza mafundo mawili alafu ndo' akarejea katika mjadala huu.

Alisema,

"Bryson, pesa kubwa kama hiyo lazima iambatane na makubaliano. Nadhani utakubaliana na mimi katika hilo."

Bryson akasema,

"Bila shaka. Nipo tayari kwa makubaliano yoyote yale alimradi nisaidie watoto wangu."

Mitchelle akatabasamu.

Tabasamu dogo.

Kisha akasema,

"Ok, lakini huenda kuna jambo natakiwa kukusisitizia zaidi, Bryson. Mimi ni mtu 'strict' sana kwenye maagano ninayoyaweka.

Huwa sipindishi wala kupunguza kile ambacho ninaweka nacho maagano, na huo ndo' udhaifu wangu mkubwa. Hivyo nakusihi sana, kuwa makini unapofunga makubaliano na mimi."

Alipofikia hapo, akamkumbusha Bryson makubaliano waliyoyaweka hapo kabla. Alimuuliza kama bado anayaishi makubaliano hayo, naye Bryson akaapa kuwa kila kitu kipo kama vile walivyokubaliana.

"Usiwe na hofu kabisa," alimtoa shaka. "Nasimamia kila tulichokubaliana."

Akiwa anasema haya, akajikuta moyo wake unaenda kasi.

Aliyakumbuka yale mazingira aloyakuta kule kwa Hilda akajikuta anajikaza tu. Alijipa matumaini huenda hamna cha ajabu cha kuhofia kiasi hiko, lakini ... Vipi kama ... Basi tu ...

Aliomba kila jambo liwe kama vile anavyotaraji. Aliupiga moyo wake konde.

Asingeweza kuacha pesa hizi kwani alikuwa ana uhitaji mno.

"Sawa," akasema Mitchelle, "sasa nikuambie maagano yangu kama utayaridhia."

Bryson akasema,

"Niko tayari."

Basi Mitchelle akamweleza yake anayoyataka. Alichukua kama dakika nne kueleza kila agano. Alipomaliza akamwambia Bryson kuwa pesa itaingizwa kesho yake majira ya asubuhi katika akaunti ya benki.

Bryson akafurahi kweli. Hakuamini macho yake.

Alijiona mshindi wa kila vita.

Hakujali makubaliano aliyoyaweka ni makubwa kiasi gani bali ukubwa wa furaha ya kuokoa uhai wa wanae.

Aliondoka hapo akiwa na tabasamu usoni, na alipofika tu nje akampigia simu mkewe kumpatia habari hizi njema.

Naye mkewe akafurahi sana kwani sasa tumaini lilishuka.

Upesi wakatoa taarifa kwenye uongozi wa hospitali na maandalizi ya upasuaji ya watoto wote wawili yakaanza mara moja.

Mama akajawa na tabasamu.

Lakini hakumuuliza mumewe ni maagano gani aliweka kupata pesa hiyo kubwa ... Pengine hilo halikuwa na umuhimu kwake kwa wakati huo.

Cha muhimu ni kuokoa watoto.

Ndani ya klabu Mitchelle, akiwa sasa peke yake, akaagiza tena kinywaji, akaendelea kunywa taratibu akikoshwa na muziki kwa mbali.

Alitazama saa yake, ilikuwa ni saa mbili ya usiku, akaona aendelee kuuvuta muda hapo akingojea saa tatu ifike.

Muda huo alikuwa na ahadi nyingine, hivyo hapa alikuwa na kama lisaa limoja la kukaa. Akautumia muda huo kunywa na huku akitafakari mambo yake ya pesa.

Alinyanyua simu yake akampigia Taiwan, simu ikaita na kupokelewa ndani ya muda mfupi.

Akasema,

"Nitakuja mwenyewe kwenye mnada."

Taiwan akaita,

"Naam!"

Mitchelle akarudia taarifa yake kwamba atahudhuria mwenyewe kwenye mnada.

Taiwan akauliza,

"Ma'am, kuna haja ya wewe kuja huku? Au ni kwasababu ya kudorora kwa biashara hapa karibuni? ... Usijali, nitasimamia kila jambo na kila kitu kitakuwa poa si muda mrefu."

Mitchelle akamwambia kuwa hili jambo atalisimamia yeye. Anataka iwe hivyo.

Aliposema hayo akakata simu.

----

Ni jambo gani Mitchelle amejadiliana na kukubaliana na Bryson?

Shaka la Bryson kwenye usiri wa Hilda litaishia wapi?

Ni mnada gani Mitchelle anataraji kuhudhuria?

Na miadi yake ya saa tatu usiku ni kukutana na nani?

***

Saa nane usiku ...

Mitchelle alipotoka bafuni alikuta kila kitu kikiwa kimeandaliwa mezani, pamoja pia na tarakilishi yake.

Ulikuwa ni usiku mkubwa lakini tayari Jennifer alishafanya kazi yake.

Punde tu Mitchelle aliporejea, aliamka akatimiza wajibu wake huo na sasa alikuwa pembeni akingoja kupakua na kuanua vyombo.

Macho yake yalikuwa mekundu, ameelemewa na usingizi. Japo Mitchelle alimsihi akapumzike lakini bado aliona ni kheri kuwapo hapa.

Alimpakulia Mitchelle chakula chepesi alichokiandaa, supu na 'bites', kisha akaketi kungoja. Mitchelle akawa anakula huku akipapasa tarakilishi yake.

Alichomeka 'flash drive' alopewa na Bryson akawa anatazama kazi yake humo.

Alichokuwa anafanya ni kuwianisha kati ya kazi hiyo na ile aliyoipokea toka kwa Dr. Lambert kuona kama zinarandana.

Taratibu alikula na taratibu akawa anapekua kazi.

Muda si mrefu, akabaini kazi ile haikuwa imetimia.

Takribani karatasi kama kumi na mbili hivi hazikuwapo!

Mapungufu hayo yalikuwa ni makubwa sana kiasi kwamba yalionekana kwa wepesi mno kwenye macho ya Mitchelle.

Akajiuliza, ina maana aliyezichapa hakufahamu upungufu huo?

Akaamini huenda alizichapa kwa haraka ili amletee upesi na amweleze shida yake, hapo akampigia simu Bryson kuhakiki wazo lake.

Akamuuliza kama kuna tatizo lilijiri katika uchapaji wa kazi, bwana huyo akamtoa shaka kuwa kila kitu kilienda sawa.

Alihakikisha hilo kabla hajaweka kazi hiyo kwenye flash drive.

Aliuliza,

"Kwani kuna tatizo?"

Mitchelle akamuuliza idadi ya karatasi zilizoandikwa, hapo Bryson akapatwa na kigugumizi. Alijitetea kuwa alizichapa kwa haraka hivyo hakupata wasaa wa kutazama idadi.

Mitchelle akakata simu.

Maelezo aliyoyapata yakamzalishia mashaka zaidi.

Aliwaza ...

Ina maana Bryson hakufanya kazi ile kwa mikono yake?

Alimpatia nani?

Mbona aliahidi hapo awali kuwa anafuata makubaliano waliyoyaweka?

Hamu ya chakula ikamwisha.

Alisikia damu ikimkimbia kwa kasi mwilini mwake.

"Uko sawa?" Jennifer akamuuliza akitumia mikono yake.

Alimsogelea karibu akimtazama kwa macho ya mashaka.


****
 
TUKIBAKI HAI, TUTASIMULIA - 26


Na Steve B.S.M




Brookhaven, New York. Majira ya saa sita mchana...

Dr. Lambert alikuwa na shida kweli na mwenzake, Dr. Jean.

Siku hii nzima amekuwa akitafuta nafasi, tangu asubuhi lakini hajabahatika kupata wasaa.

Kila alipomtazama ama kukutana naye alikuwa 'busy' sana. Ametingwa na hiki ama kile. Basi akaendelea kungoja akiamini atapata walau dakika chache.

Kweli, katika majira haya ya saa sita, kabla ya muda mfupi watu kwenda kupata chakula cha mchana, alijikuta anapata wasaa adhimu baada ya kumwona bwana huyo akielekea maliwatoni.

Hapo akaacha shughuli zake, akaigiza kama mtu asiyekuwa na habari, akashika zake njia kuelekea alipokwenda mwenziwe.

Alipoingia bafuni akaufunga mlango kwa ndani kisha akamtaka Jean wawe na maongezi kidogo.

Alimwambia,

"Ni nini kinaendelea, Jean? Nataka uniambie ukweli sasa hivi!"

Aliyasema haya sababu mawasiliano yake na Mitchelle yalikuwa duni hapa karibuni. Amejaribu kumpigia mwanamke huyo mara kadha wa kadha lakini hakuwa anapokea simu yake, wala kumrudia kwa kumtafuta.

Aliwaza kuna jambo linaloendelea baina ya watu hawa wawili na jambo hilo likamtia mashakani.

Dr. Jean alkmtazama, kisha akageukia 'sink' na kunawa mikono yake. Hakusema kitu.

"Umeongea na Mitchelle?" Dr. Lambert akauliza. "Mara yako ya mwisho kuongea naye lini?"

Dr. Jean akakung'uta mikono yake kuikausha na maji alafu akamgeukia mwenziwe, akamwambia ametoka kuwasiliana na Mitchelle jana yake tu, na sio tu kuwasiliana bali pia kukutana.

Alisema,

"Aliniomba tukutane mahali fulani majira ya saa tatu usiku, nami nikaitikia wito wake."

Jambo hilo likamkwaza Dr. Lambert. Alihisi kama kuna kitu kinamkaba asipate pumzi yake kamili, alihisi amesalitiwa, uchungu wa usaliti unaujua unavyouma.

Moyo wake ulisinyaa akibana meno yake kwa hasira, akapiga moyo konde, akamuuliza Jean ni nini walichoongelea hapo lakini mwenziwe akamkata maini kabisa.

Alimwambia kama jambo hilo lingekuwa linawapasa wote wawili kulijua, basi naye angealikwa hapo, lakini zaidi akaeleza mshangao wake kwa Dr. Lambert juu ya namna alivyokuwa anaishi na Mitchelle na kazi zake.

Alisema,

"Bila shaka umefanya kazi nyingi na Mitchelle, kwa malipo yake mazuri ni ajabu sana bado upo hapa ukibangaiza na kazi za serikali, kwangu mimi, nitamuhitaji kwa mwaka mmoja tu, baada ya hapo nitakaa pembeni nikila pensheni yangu nono mpaka kifo."

Alipokwisha kusema hayo, akaomba aende sasa kwani alikuwa na kazi nyingi za kufanya, Dr. Lambert akamzuia kwa kumwekea mkono njiani, akamwambia akimtazama machoni kuwa hiko anachokifanya atakuja kujutia hapo mbeleni, lakini kauli hiyo ikawa nyepesi sana kwa Dr. Jean, aliamini hilo ni dua la kuku tu hivyo kumpata mwewe ni hadithi.

Bwana huyo alienda zake akimwacha Dr. Lambert fikirani, aliwaza mambo mengi yasiyokuwa na majibu, alisahau hata kwamba yuko chooni.

Alipokuja mtu humo ndipo akagutuka na kutoka, akaelekea ofisini kwake na kuendelea na mawazo yake, ina maana Dr. Jean amekaimu nafasi yake kwa Mitchelle?

Kwa kitu gani cha ziada toka kwa bwana huyo? Kwa makubaliano yapi? Aliwaza na kuwaza ... aliwaza na kuwaza ...

Lakini ni nini haswa kilichotokea jana yake katika majira ya saa tatu usiku? ...

Hiyo saa tatu usiku yenyewe ...

Mitchelle alitazama simu yake kupata kujua muda, akaona ni saa tatu aliyokuwa anaingoja, akaagiza kinywaji kingine maana alichokuwa nacho kilishakwisha, muda si mrefu kinywaji kikafika akaendelea kulainisha koo.

Kwa jumla sasa ilikuwa ni 'wine' ya nne kwa usiku huu, lakini uso wake hakuonyesha dalili yoyote ya ulevi, ni kama vile alikuwa anagida sharubati za machungwa.

Kidogo akatokea bwana mmoja mfupi aliyevalia 'form six', chini kadeti na moka. Amevalia kama anakwenda kwenye kikao cha manispaa, akaangaza-angaza na haraka tu akamwona Mitchelle, ni wazi alishawasiliana naye hapo kabla akapata maelezo mahali alipo.

Akajongea na kuketi. Alikuwa ni Dr. Jean. Muda si mrefu mhudumu akaja na kumsikiza bwana huyo, akaagiza kinywaji laini cha baridi, mhudumu alipoondoka maongezi yakapata kuanza.

Dr. Jean, akitumia weledi na taaluma yake, alimfafanulia Mitchelle juu ya namna gani anaweza kumtengenezea unafuu mkubwa kwa kutumia 'antidotes' ambazo hazitakuwa na 'side effects' zozote zile lakini pia zitakazohudumu kwa muda mrefu ndani ya mwili.

Alisema,

"Sijajua ni nini, Dr. Lambert anachofikiria lakini naamini hili linaweza likawa bora zaidi, na kwa kuthibitisha hilo nitakupatia antidotes ya kutumia mara mbili, baada ya hapo utanipatia mwenyewe mrejesho."

Mhudumu aliweka kinywaji mezani, Dr. Jean akaacha kwanza kuongea ili anywe kinywaji chake, alipokunywa fundo moja tu, akaendelea na hekaya zake.

Alimweleza Mitchelle kuwa amefanikiwa kutathmini antidotes alizokuwa anatumia toka kwa Dr. Lambert na amebaini ni hatari kwani hapo mbeleni zitakuja kumletea uraibu mkali zaidi ya madawa ya kulevya, uraibu huo utamfanya awe anatumia antidotes hata tatu kwa siku kitu ambacho kitakuwa hatari sana kwa afya yake kwani hataweza kuhimili mwaka mmoja, atakufa.

Alisema,

"Antidote nitakazotengeneza mimi, hapo mbeleni hutakuja kuzihitaji tena. Utazitumia kwa sasa lakini naada ya muda fulani, hautakuwa na haja ya kutumia antidote yoyote ile. Utakuwa huru."

Kwa maelezo yake, Mitchelle atapata antidote mara mbili tu kwa mwezi badala ya hapo nyuma alivyokuwa anatumia antidote kila baada ya siku chache.

Ofa hiyo ikampendeza Mitchelle, lakini alitaka kuwa na uhakika na swala hili, akapendekeza kuwa na mkataba kuhusu hili jambo, na mkataba huo kama utawapendeza basi wafanye kazi.

"Nataka kupata uhakika wa usalama wangu, lakini pia uhakika wa kufanyika kwa kazi hii," alisema Mitchelle, Jean akaridhia na kwenda zake.

Lakini kitu ambacho hakufahamu, Mitchelle alimfuatilia bwana huyu mpaka alipoelekea na kufikia, kama haitoshi alishakuwa na picha yake na hata namba yake ya kitambulisho.

Yote haya alikuwa nayo katika simu yake kubwa, wakati Dr. Jean akiwa ameingia ndani kwake, yeye alikuwa anapitia taarifa hizi kwa umakini, alipomaliza akatazama ramani na kupata anwani ya makazi ya bwana huyu kisha akaondoka zake.

Akiwa njiani aliwasiliana na bwana mmoja aliyemuita Fenty, alimwambia amepata taarifa alizomtumia lakini akamtaka ampatie taarifa zaidi kwani alikuwa anataka kujua kila kitu kumhusu Dr. Jean, kuanzia familia yake, kazi yake, ratiba yake ya siku, vitu apendavyo, achukiavyo, mahali anapopenda kutembelea, marafiki na kadhalika ...

Alipoyasema hayo, akakata simu yake kisha akatazama nje ya dirisha, akawa anatazama namna majengo yanavyokwenda nyuma huku akili yake ikiyapambanua yaliyomengi...

Turudi kwenye nyakati za sasa...

Majira ya saa 10 jioni ...

"Kuna jambo nimepata," alisema mwanaume kwenye simu.

Mpelelezi alikuwa anatoka katika makazi yake akiwa anamalizia kuvaa koti lake, sikio lake la kushoto ameegamizia simu kwa bega.

"Nambie umepata nini?" Mpelelezi akauliza, punde kidogo alilifikia gari akalifungua mlango na kuketi kiti cha nyuma, ilikuwa ni gari la kukodi, alipoketi akatulia asikie anaambiwa kitu gani.

Huyo aliyekuwa anaongea naye alikuwa ni yule bwana anayempatia kazi zake za kufuatilia data za watu mbalimbali pale awapo ofisini, alikuwa ndiye yule aliyemsaidia kuhusu yule binti kwenye kitambulisho.

Bwana huyo alimweleza kuwa amefanya kazi alomtuma na alichobaini ni cha ajabu kidogo.

Kumbe kesi za watu kujinyonga na kisha maiti zao kupotea hospitalini katika mazingira ya kutatanisha haikuwa moja tu, alimweleza amepata kuona kesi takribani tano katika jimbo la California pekee, na alipofuatilia alibaini kesi hizo tayari zimeshafungwa kiuepelelezi.

Habari hiyo ikamgusa sana Mpelelezi, alitaka kujua zaidi akijiuliza kama yatakuwa na mahusiano na hili la kwanza au lah?

Mwenziwe akamtumia taarifa hizo kwa simu kisha akazipitia, akaona ni vema kuzitazama kwa kina, basi safari nzima akawa anawaza akitengeneza 'hypothesis' zake kichwani.

Akibuni wazo hili na lile ...

Ni kweli watu hao walijinyonga? Na kama ndio, nini kilisababisha maamuzi hayo? Kwanini wajinyonge kwa mfululizo? Kwanini maiti zao zipotee? Na kama ni hivyo, kwanini kuna upande ambao unahangaika kuficha hili swala? Hapa alikumbuka namna Ronelle alivyofariki.

Baada ya muda mchache akawa amefika kwenye uwanja wa ndege, akalipia usafiri na kwenda zake ndani baada ya ukaguzi mdogo.

Aliketi kwenye siti yake akaweka 'earphone' masikioni, akatulia tuli akiwa anaskiza muziki laini na huku akiwa anatazama watu wanaoingia ndani ya ndege.

Baada ya kupita dakika kumi, akaingia mtu mmoja ndani ya ndege hii, alikuwa ni mwanaume mweusi mwenye begi dogo, amevaa miwani meusi, amevalia tisheti nyeusi na kizibao cha kaki cha 'timberland' chini pia amevalia bukta fupi ya kaki yenye mifukomifuko mingi na mikubwa.

Kilichomfanya Mpelelezi amtilie mkazo mwanaume huyu ni mtindo wake wa kutembea, alikuwa anatembea kwa uangalifu mkubwa akishika viti.

Akabaini mtu huyo ni mlemavu wa macho, kwasababu hiyo basi akaondoa mazingatio yake hapo akageukia dirishani, akafunga macho na kuendelea kuskiza muziki wake laini, muda kidogo ndege ikaanza kuondoka.

Baada ya kama dakika ishirini, ndege ikiwa angani inakata mawimbi, orodha ya nyimbo katika kifaa cha Mpelelezi ikakata, akajikuta anafungua macho kutazama.

Alipotazama kando yake akamwona mwanaume yule mlemavu wa macho, alikuwa amekaa pembeni yake akiwa ametulia tuli.

Kumbe bwana yule alikuwa anakuja kuketi pembeni yake, sasa ndo' alijua. Alimtazama kwa sekunde kadhaa, alikuwa ni mwanaume mwenye uso mpana, nywele fupi, ndevu nyeupe na 'lips' pana zilizokauka.

Kidogo bwana huyo alimgeukia Mpelelezi kisha akatabasamu, meno yake yalikuwa madogomadogo rangi ya kahawia na njano, akasema,

"Hisia zangu zinanambia unan'tazama ... Habari yako?"

Mpelelezi akashtuka kiasi chake, hakutegemea jambo hilo kutokea, lakini akaijibu salamu hiyo akimtazama bwana huyo kwa udadisi.

"Nimekuwa mlemavu tangu kuzaliwa kwangu," akaendelea kusema huyo bwana, "hivyo nimejifunza kuishi kwa hisia zangu kwa kiasi kikubwa, hisia zangu ndo' macho yangu."

Akatabasamu tena kisha akarejesha uso wake kutazama mbele, kukawa kimya kidogo, Mpelelezi akaendelea kuskiza nyimbo zake na baada ya muda mfupi akamsahau bwana huyu aliyeketi pembeni yake, akawa anawaza mambo yake.

Hakuchukua muda mrefu, akapitiwa na usingizi, alipokuja kuamka safari ilikuwa imebakia lisaa limoja kumalizika, muziki wake umesimama, pembeni yake yule bwana mlemavu hakuwapo.

Alitazamatazama lakini hakumwona bwana huyo, alisimama akatazama lakini hakumwona pia, akajiuliuza ni wapi bwana huyo ameelekea, akasimama na kwenda zake chooni.

Alipofika akakuta mlango umefungwa, kuna mtu ndani, alama ya 'occupied' imesimama kwenye uso wa mlango, basi akangoja, kidogo akawaza labda aliyekuwemo humo ndani ni yule bwana mlemavu aliyekuwa amekaa naye jirani.

Akiendelea kuwa hapo, kidogo akasikia maongezi ndani ya choo, ilikuwa ni sauti ya kiume, sauti ambayo aliikumbuka mara moja kuwa ni ya yule bwana mlemavu, akashawishika kuskiza.

Akaweka sikio lake kwa ukaribu, hajakaa sawa, mlango ukafunguliwa akakurupuka, kweli alikuwa ni yule bwana, alisimama akamtazama Mpelelezi kana kwamba anamwona katika miwani yake meusi, kisha akatembea taratibu, kwa uangalifu akatoka chooni.

"Karibu," akasema akiupita mlango, alafu akaongezea, "hisia zangu zinanambia kuna mtu hapa."

Mpelelezi akapigwa na butwaa, hakujua cha kusema, akabaki anamtazama bwana huyo kama mwanasesere, naye bwana huyo akacheka kidogo kisha akaenda zake, Mpelelezi akabaki akimtazama anavyoishilia.

Bwana huyo anatembea taratibu akishika viti.


***
 
You must log in or register to reply here.

Our Community

Regional Communities

Back
Top Bottom
Menu
Forums
New posts
Log in
Register