Uzi maalum wa kupeana Likes: Comment chochote upate "Like"

Wachezaji nyota namba moja wa zamani wa tenisi duniani, Novak Djokovic na Roger Federer, leo wataonyeshana kazi kwenye fainali ya Cincinnati Masters.

Wachezaji hao waliowahi kushika namba moja kila mmoja kwa wakati tofauti, walitoana jasho katika nusu fainali ya mashindano hayo mwaka 2015, ambapo mashabiki walipata burudani ya uhakika kwani walitumia zaidi ya saa mbili kumka mshindi.
 
Novak Djokovic atakuwa akipigania kuandika historia ya kuwa mchezaji wa kwanza kushinda michezo yote tisa ya Masters 1,000, iwapo atatwaa taji hilo la Cincinnati Masters.

Nyota huyo kutoka Serbia, ambaye mara tano aliwahi kushika nafasi ya pili kwenye mashindano hayo alimshinda Marin Cilic wa Croatia katika nusu fainali kwa 6-4 3-6 6-3.

Naye Federer, aliingia kwenye fainali baada ya mpinzani wake David Goffin wa Ubelgiji kuumia bega na kuamua kujitoa mashindanoni, hata hivyo wakati akijitoa walikua sare wakifungana seti 1-1.
 
Klabu ya Real Madrid, inadaiwa kumtengea mshambuliaji wa Paris Saint-Germain, Edinson Cavani, Euro 70 milioni.

Habari zinasema kuwa oda iliyotolewa na nahodha wa Barcelona, Lionel Messi kwa klabu yake ndiyo iliyowazindua Real Madrid na kumtengea mshambuliaji huyo wa kimataifa wa Uruguay kiasi hicho cha fedha.

Imeelezwa kuwa Real ilisikia Messi akiishauri Barca imng’oe Cavani PSG baada ya kusikia tetesi kuwa mpiga mabao huyo hana raha ya kuendelea kuwepo jijini Paris.
 
Baada ya kunasa tetesi hizo Real wakaamua kuifanyia kazi kutokana na kuogopeshwa na ubutu wa safu yao ya ushambuliaji baada ya kuondokewa na Cristiano Ronaldo.

Habari ambazo hazijathibitishwa zinadai kuwa PSG wako tayari kumuachia mshambuliaji huyo kwenda jklabu yoyote itakayotoa Euro 120 milioni.
 
Mbinu za Kocha mpya wa Chelsea, Maurizio Sarri za kushambulia muda wote zinaonekana kuzaa matunda baada ya kupata ushindi wa mabao 3-2 dhidi ya Arsenal.

Chelsea ambayo msimu uliopita ilimaliza Ligi katika nafasi ya tano inaelekea msimu huu itarejea katika nne bora za Ligi Kuu England, nafasi ambazo zinatoa timu za kucheza Ligi ya Mabingwa Ulaya.

Sarri licha ya kuwa yupo katika msimu wake wa kwanza Stamford Bridge baada ya kumrithi Antonio Conte, ameanza vema alishinda mchezo wa kwanza ugenini kwa mabao 3-0 dhidi ya Huddersfield Town.

Ushindi dhidid ya Arsenal umeifanya Chelsea kukaa kileleni mwa Ligi kwa takribani saa 24, wakati Unai Emery aliyechukua nafasi ya Arsene Wenger, kuinoa Arsenal ambayo msimu uliopita ilimaliza katika nafasi ya sita.
 
Mbali ya kuibuka na ushindi katika mchezo huo uliochezwa Stamford Bridge, Chelsea ilicheza soka la kuvutia liliwakuna mashabiki wa klabu hiyo.

Mashambulizi mfululizo katika kipindi cha pili yaliwalazimisha Arsenal kuachana na mfumo wao wa soka la gonga badala yake wakarudi nyuma kujilinda muda wote.

Kipigo hicho kwa Arsenal ni cha pili mfululizo baada ya kile cha mabao 2-0 walichokipata kutoka kwa Manchester City, wikiendi iliyopita ikiwa mara ya kwanza kupoteza mechi mbili mfululizo za kwanza tangu kuanzishwa kwa Ligi hiyo msimu wa 1992-93.
 
CHELSEA imeshusha presha baada ya supastaa wake, Eden Hazard kuweka bayana ataendelea kuwepo klabuni hapo msimu huu.

Hata hivyo, nahodha huyo wa Timu ya Taifa ya Ubelgiji amegoma kuelezea hatima yake kama ataendelea kuwepo kwa muda mrefu zaidi ama ataondoka mwishoni mwa msimu.

Kwa muda mrefu sasa Hazard amekuwa akiwindwa na Real Madrid na mwenyewe mara kadhaa ameeleza nia yake ya kukipiga na mabingwa hao wa Ulaya.

Mabosi wa Chelsea walikuwa katika wakati mgumu wakiamini staa huyo angeondoka kwenye dirisha hili la usajili.

Juzi Jumamosi, Kocha wa Chelsea, Maurizio Sarri aliweka bayana kuwa Hazard hatauzwa kwa Real Madrid hadi pale atakapopatikana mrithi wake.
 
Bado nipo, sitaondoka mwaka huu,” alisema Hazard ambaye juzi Jumamosi alitokea benchi na kutengeneza bao la ushindi kwa beki Marcos Alonso dhidi ya Arsenal.

Licha ya dirisha la usajili kwa England kufungwa, lakini Hazard, 27, bado alikuwa akihusishwa kuondoka kwenye dirisha hili kutokana na dirisha la Hispania kuendelea kuwa wazi hadi mwishoni mwa mwezi huu.

Akizungumza mara baada ya mchezo huo, Hazard alisema: “Kila mmoja anafahamu kitu gani nilisema baada ya Kombe la Dunia, lakini nina furaha kuwepo hapa.

“Sipendi kuzungumza hili kabisa kwani, mengi yamesemwa ila kwa sasa nina furaha. Nina miaka miwili imebaki kwenye mkataba wangu, hivyo tutaona kitu gani kitatokea. Lakini, kuondoka mwaka huu, hapana sitaondoka.”

Kuondoka kwa Cristiano Ronaldo Hispania na kutua Juventus kulionekana kumfungua milango Hazard kwenda Real Madrid huku supastaa wa Kibrazil na PSG, Neymar naye akipewa nafasi ya kujiunga na miamba hiyo ya La Liga.

Hata hivyo, imeelezwa Madrid haikuonyesha nia ya dhati kutaka saini ya Hazard na badala yake ilielekeza nguvu kumnasa kipa namba moja wa Chelsea, Thibaut Courtois.
 
KIWANGO cha kiungo wa fundi wa Kijerumani, Mesut Ozil kimezidi kuwavuruga wengi na sasa supastaa wa zamani wa Arsenal, Nwanko Kanu amejivisha mabomu na kuingilia kati.

Kanu, ambaye amekuwa kimya huku Ozil akiendelea kukosolewa akidaiwa kucheza chini ya kiwango hasa kwenye mechi kubwa, sasa ameamua kimwaga ugali.

Mpachika mabao huyo aliyecheza kwa mafanikio Arsenal, amewataka mabosi wa klabu yake hiyo kuamua moja kumuacha Ozil acheze mpira wake ama wamuweka sokoni.

“Hivi unaweza kumwambia Messi au Maradona arudi nyuma kukaba?” Alihoji Kanu.
 
Kwa mujibu wa Kanu, amewataka Arsenal kukubaliana na staili ya uchezaji wa Ozil kwa kuwa hawezi kubadilika na wakiona ni tatizo zaidi basi wamuuze.

Ozil ndiye mchezaji anayelipwa mshahara mkubwa klabuni Arsenal akipokea Pauni 300,000 kwa wiki na hilo limekuwa likimfanya kuwa kwenye matatizo kila timu inapopoteza mchezo.

Hata hivyo, Kocha wa Arsenal Unai Emery, amekuwa akijaribu kuzungumza na Ozil na kumtaka kutimiza majukumu yake uwanjani ili kusaidia timu kupata matokeo bora.

Lakini Kanu amemshauri Emery kumpa Ozil majukumu ya kuchezesha timu zaidi kwa kuwa, ndio eneo analolidumu zaidi na hapo ataona matokeo.
 
INAONEKANA maisha hayatakuwa rahisi tena kwa kiungo wa Arsenal, Mesut Ozil, katika utawala wa kocha mpya, Unai Emery.

Juzi Jumamosi alitolewa uwanjani katika dakika ya 68 huku Arsenal ikisaka matokeo na tayari kocha amepongezwa kwa hatua hiyo.

Arsenal ililala 3-2 ugenini kwa Chelsea pale Stamford Bridge na kocha huyo alimtoa Ozil akimwingiza kiungo wa kimataifa wa Wales, Aaron Ramsey na mtu mmoja maarufu ameupongeza uamuzi huo wa Emery ambao ni wazi usingefanywa na kocha aliyepita, Arsene Wenger.
 
Staa wa zamani wa England, Glenn Hoddle, ambaye kwa sasa ni mchambuzi maarufu wa soka, amedai maamuzi hayo ni sahihi kwa vile Ozil hana mchango uwanjani licha ya kulipwa mshahara mkubwa klabuni hapo na katika Ligi Kuu England kwa jumla.

“Ukweli alimtoa nje nadhani yalikuwa maamuzi sahihi. Hajafanya kazi nzuri katika suala la ulinzi kwao. Bado hajawaonyesha watu anaowafanyia kazi yuko poa, lakini kumbuka analipwa pesa nyingi na alipaswa kufanya zaidi ya kile alichokifanya,” alisema Hoddle.
 
Kocha Emery alitetea uamuzi wake wa kumtoa Ozil akisema ulitokana na mbinu za kisoka zaidi huku akijaribu kuwa mwanadiplomasia kwa kusema Ozil alimfurahisha.

“Tulihitaji ubora wake na nataka kumsukuma awe mshindani katika kila mechi. Leo (juzi) nilikuwa na furaha naye,” alisema kocha huyo ambaye timu yake imepokea kichapo cha pili mfululizo baada ya awali kulala 2-0 kwa Manchester City wikiendi iliyopita wakiwa nyumbani.

Kauli ya Hoddle imekuja kama mwendelezo wa wachambuzi mbalimbali katika Ligi Kuu England pamoja na kwao Ujerumani wanaomkosoa Ozil kwa uvivu uwanjani licha ya staa huyo kulipwa Pauni 350,000 kwa wiki za mshahara katika mkataba aliosaini Januari mwaka huu.
 
Beki wa zamani wa Arsenal, Martin Keown, aliye pia mchambuzi mahiri wa soka England kwa sasa, aliwahi kumshambulia Ozil kwa kucheza kivivu wakati Arsenal ilipochapwa mechi mbili za nusu fainali ya Europa na Atletico Madrid.

“Inaonekana kama vile anachagua mechi za kucheza. Unaweza kujificha kidogo katika nafasi ya pembeni. Wakati nilipokuwa namwangalia nilijiuliza ‘Unaweza kurudi nyuma kwa ajili ya timu yako?’. Wachezaji wakubwa niliowahi kucheza nao kina Bergkamp (Denis) kina Henry (Thiery), walifanya kazi kubwa na sidhani hii timu inaweza kumbeba mtu yeyote yule,” alisema Keown.
 
Ni kama vile mikono yake ipo hewani huku akisema ‘Tazama hawa wachezaji wenzangu, sio wazuri kama mimi.’. kuna mtu ilihitaji amwambie muda mrefu na kumtingisha akimwambia ‘Tunajaribu kukutafutia mpira, tunakufanyia kazi lakini hautufanyii kazi.”

Arsenal inatazamiwa kurudi uwanjani wiki ijayo katika pambano jingine la Ligi Kuu dhidi ya West Ham ambapo utakuwa mtihani mwingine kwa Emery huku huu ukiwa mwanzo mbovu zaidi kwa Arsenal tangu Ligi Kuu ya England ilipoanzishwa kwa mfumo mpya mwaka 1992.

Katika pambano hilo Emery ana mtihani wa kumpiga benchi Ozil kutokana na malalamiko mengi ya mashabiki na wachambuzi, lakini kuna uwezekano pia akawapiga benchi baadhi ya mastaa wengine kama Granit Xhaka ambaye naye kiwango chake kimekuwa kikilalamikiwa.
 
CHELSEA imeanza vizuri kampeni za kuwania taji la Ligi Kuu England, lakini kocha wake Maurizio Sarri, amekiondoa kikosi chake kwenye mbio za ubingwa msimu huu.

Wababe hao wa London walianza msimu mpya wa ligi kwa ushindi wa mabao 3-0 dhidi ya Huddersfield kisha juzi Jumamosi kuichapa Arsenal mabao 3-2.

Hata hivyo, Sarri amekiondoa kikosi chake kwenye ubingwa kutokana na kushuhudia ukuta wake ukiruhusu mabao mawili ya haraka dhidi ya Arsenal.
 
Katika mchezo huo uliopigwa uwanjani Stamford Bridge, Chelsea ilikuwa mbele kwa mabao ya Pedro Rodriguez na Alvaro Morata ndani ya dakika 20 za kwanza, lakini jeshi la Kocha Unai Emery lilipambana na hadi mapumziko ubao ukasomeka 2-2.

Hata hivyo, Chelsea mwishoni mwa mchezo ilitoka uwanjani kifua mbele kwa ushindi wa mabao 3-2 na hilo likatosha kumshtua Sarri.

“Hatuwezi kushindana kwenye ubingwa kwa sasa. Tunapaswa kuimarisha ulinzi wetu na hilo si jukumu la mabeki peke yake. Tulicheza vizuri dakika 75 za kwanza, lakini baada ya hapo tulikuwa hovyo kabisa,” alisema.
 
You must log in or register to reply here.
Menu
Log in
Register
Cookies are required to use this site. You must accept them to continue using the site. Learn more…