Uzi maalum wa kupeana Likes: Comment chochote upate "Like"

STRAIKA Mario Balotelli amepigwa faini na klabu yake ya Nice kutokana na kuongezeka uzito.

Balotelli amedaiwa alirudi kujiunga na timu hiyo akitokea kwenye mapumziko ya mwisho wa msimu akiwa na kilo 103.

Kwa mujibu wa L’Equipe, Nice hawakufurahishwa na jambo hilo kwa sababu Balotelli alikuwa ameongezeka kilo 15 kwa kipindi alichokuwa mapumziko, kwa sababu wakati anaondoka msimu ulipokwisha, alikuwa na uzito wa kilo 88.
 
Amepungua kidogo msimu huu, lakini bado anapaswa kujipunguza vizuri ili kurudi kwenye makali yake kama ilivyokuwa msimu uliopita.

Jambo hilo limedaiwa kuathiri kiwango chake cha msimu huu na kwenye mechi ya kimataifa ya Italia, alicheza ovyo sana dhidi ya Poland kabla ya kuwekwa benchi kwenye mechi dhidi ya Ureno.
 
KOCHA wa Chelsea, Maurizio Sarri amefichua kwamba amekuwa akitumia saa 13 kwa siku kutazama video za wapinzani wake kwenye Ligi Kuu England.

Kocha huyo Mtaliano alijipa kazi hiyo na kuifanya wakati ligi iliposimama kupisha mechi za kirafiki za kimataifa na alikuwa bize kwa wiki zote hizo mbili kuwasoma wapinzani wake.

Chelsea itacheza mechi saba katika kipindi cha siku 23, mechi hizo itakuwapo dhidi ya mahasimu wao West Ham, watakipiga na Liverpool mara mbili na watakuwa na kipute cha ugenini Ugiriki kwenye Europa League.
 
Sarri alisema: “Tunapaswa kucheza mechi saba ndani ya siku 23, hivyo ni lazima nifanye kazi. Nina mechi nyingi sana, Cardiff na PAOK, West Ham na Liverpool.

“Wakati mwingine najiandaa kwenye uwanja wa mazoezi, wakati mwingine nyumbani.”

Sarri, aliyewahi kuwa meneja wa benki, alisema amekuwa akijipa kazi binafsi za kutambua mbinu za wapinzani wake kabla hajawakabili.
 
WESLEY Sneijder dhidi ya Robin van Persie. Masupastaa hao wa Uholanzi ni maadui wakubwa licha ya kwamba waliwahi kucheza pamoja kwenye kikosi cha timu ya taifa ya nchi hiyo.

Wengi walidhani ugomvi wa wawili umekwisha, lakini kumbe mambo ndio kwanza yameanza. Jambo hili linafichua ugomvi wa wawili hao. Hivi karibuni, Wesley Sneijder alistaafu soka la kimataifa na alifanyiwa tukio maalumu la kumuaga.

Lakini, mwenyewe amechagua kikosi chake cha mastaa aliowahi kucheza nao timu moja, ili acheze mechi ya mwisho ya kuagwa kwenye soka akafanye mambo yake mengine. Hapo ndipo utamu kamili ulipowadia.
 
Sneijder hakumjumuisha Van Persie kwenye kikosi chake cha kwanza. Kiungo huyo wa Kidadi, ameamua kuchagua washambuliaji watatu, Zlatan Ibrahimovic, Samuel Eto’o na Arjen Robben kuingia kwenye kikosi chake cha kwanza.

Kuhusu Ibrahimovic, Sneijder alisema kwamba alikuwa mtu safi sana kwake. Hapo ndipo lilipokuja swali la kama Ibra alikuwa mtu safi kwake, nani hakuwa mtu safi. Wanazengwe wakaenda moja kwa moja kumtaja yule aliyemfungia vioo kwenye kikosi chake, straika Van Persie. Kumbe ugomvi wao haujakwisha.

Ilielezwa kwamba ugomvi wa wawili hao ulianza kwenye tukio la nani apige mpira wa adhabu kwenye Euro 2008. Lakini, taarifa za ndani zimedai wawili hao walitibuana kabla ya tukio hilo.
 
Mambo yalianzia mazoezini, ambapo Van Persie alimchezea rafu Sneijder. Kilichoonekana ni kwamba Van Persie alikuwa akijaribu kumuumiza mwenzake makusudi mazoezini. Sneijder, hakupenda jambo hilo na aliamua kwenda kuliweka wazi kwenye vyombo vya habari itambulike. Hapo ikachochea zaidi malumbano.

Siku chache baadaye, wakatibuana tena kwenye mechi dhidi ya Russia, ambayo ilimalizika kwa Uholanzi kuchapwa 3-1. Wakiwa nyuma kwa bao 1-0, Uholanzi walipata faulo nje ya eneo la hatari. Sneijder ndiye aliyekuwa fundi wa kupiga mipira hiyo ya faulo, hivyo alitazamiwa yeye kupiga. Lakini, Van Persie akakimbilia mpira, akaenda kupiga na kukosa.

Mechi ikaisha. Miezi minne baadaye, Sneijder, alibaki na dukuduku na kuamua kuliweka bayana kwenye gazeti moja huko Uholanzi.
 
Alisema Van Persie amekiuka makubaliano na kuongeza: “Tangu mwanzo kabisa, nilichaguliwa kuwa mimi ndiye mtu wa kupiga faulo zote, hakuna mwingine anayepaswa kugusa mpira.”

Kusikia hivyo, Van Persie, alikwenda kuzungumza na gazeti jingine na kujibu mapigo, akisema: “Nilitarajia kitu cha maana zaidi kutoka kwa Wesley. Ni kitu cha ajabu kuzungumza kwamba ni yeye tu ndiye mwenye uwezo wa kupiga mipira ya faulo. Nendeni kamuulizeni kocha.”
 
Van Persie akadai kwamba hataki tena kuzungumza na Sneijder kumaliza jambo hilo baina yao kwa sababu kiungo huyo amezungumza hadharani. Fowadi huyo wa zamani wa Manchester United na Arsenal, Van Persie alisema labda kwenye suluhisho lao, basi nchi nzima uhusishwe, ije kwenye mkutano. Mwaka 2013, ikiwa imepita miaka mitano tangu walipotibuana, Sneijder alionekana kama amesahau yaliyopita, ambapo alimchagua Van Persie wakati huo akiwa Man United, kwenye tuzo ya Ballon d’Or. Lakini, kitendo cha sasa kuamua kumchagua straika Ibrahimovich imeonyesha wazi kwamba Sneijder hajamsamehe ile kwa moyo mmoja, Van Persie. Sneijder, ambaye kwa sasa anacheza soka lake huko Qatar katika klabu ya Al-Gharafa, aliwahi kupita kwenye klabu matata kabisa Ulaya, Ajax, Real Madrid , Inter Milan, Galatasaray na Nice.
 
Kikosi chake bora alichokichagua ni kama kifuatacho; Julio Cesar; Christian Chivu; Sergio Ramos; Javier Zanetti, Marcelo, Clarence Seedorf, Guti, Dejan Stankovic, Samuel Eto’o’, Arjen Robben na Zlatan Ibrahimovich
 
NDO hivyo. Nyota wa mpira wa kikapu Marekani (NBA), King LeBron James wa Los Angeles Lakers kashtua kinoma dunia na kusababisha mpasuko wa wafuatiliaji wa ligi hiyo.

Unajua kwa nini? Wengi wanajua LeBron katua Lakers na hivyo mambo yatakuwa safi kwa timu hiyo. Hata hivyo, ghafla kawaacha watu vinywa wazi baada ya kuitoa timu yake hiyo kwenye orodha ya timu zitakazobeba taji la msimu ujao.

Jambo hilo limesababisha mpasuko kwa wafuatiliaji wengi wa ligi hiyo, huku wengine wakimuunga mkono na wengine kuamini ameongea hayo kisiasa tu ili timu yake isikamiwe na kukutana na upinzani katika Ukanda wa Magharibi.
 
Nyota huyo ambaye amecheza mfululizo katika Ukanda wa Mashariki akiwa na timu za Miami Heat na Clevaland Cavaliers, amezitaja timu sita zenye uwezekano wa kutwaa ubingwa msimu huu unaotarajiwa kuanza mwezi Oktoba.

Katika orodha hiyo, LeBron ameiondoa timu yake hiyo pamoja na Cavaliers na kuzipa nafasi Golden State Warriors, Houston Rockets, Oklahoma City Thunder, Boston Celtics, Toronto Raptors na Philadelphia 76ers.

Huo ndio mtazamo wake. Je yuko sahihi? wakati utaongea. Tusubiri tuone pale ligi itakapoanza kwa miamba hiyo kuonyeshana kazi, huenda jamaa anataka wapinzani wasiwakamie.
 
You must log in or register to reply here.
Menu
Log in
Register
Cookies are required to use this site. You must accept them to continue using the site. Learn more…