Mwanamke raia wa Uingereza amezuiwa kuondoka Dubai baada ya mke mpya wa mumewe wa zamani kufungua mashtaka ya kudhalilishwa kwenye ukurasa wa Facebook, polisi wa Umoja wa Falme za Kiarabu imesema leo.
Polisi wa Dubai walithibitisha kuwa mwanamke huyo mwenye umri wa miaka 55 na raia wa Uingereza, wameshtakiwa kwa tuhuma za udhalilishaji chini ya sheria ya makosa ya mtandaoni ya UAE.
Polisi walisema mwanamke huyo hajawekwa rumande, lakini alikiri kutoa maneno hayo kwenye ukurasa wa Facebook na kukataa kumalizana na mke huyo mpya wa mumewe wa zamani, nje ya mahakama.
Wakati polisi hawakutaja jina la mwanamke huyo, kampuni yenye makao yake makuu jijini London inayojulikana kwa jina la Detained in Dubai, ilimtaja kuwa ni Laleh Sharavesh, ikisema alimuelezea mke huyo wa mumewe wa zamani kuwa ni “punda”.
Polisi wa Dubai walisema baada ya malalamiko yaliyotolewa na mwanamume huyo Mreno na mkewe ambaye ni raia wa Tunisia mwaka 2017, hati ilitolewa ikimtaka mwanamke huyo ajisalimishe polisi.
"Baada ya kurejea nchini (UAE) Machi 10, 2019, hati hiyo iliifanya Idara ya Uhamiaji uwanja wa ndege kumueleza mwanamke huyo suala linalomkabili," polisi ilisema katika taarifa yake.
"Alitakiwa aende kituo cha polisi cha karibu."
Uingereza imesema ina mawasiliano na UAE kuhusu kesi hiyo ia inatoa msaada kwa Sharavesh.
"Tunatoa msaada wa kibalozi kwa Sharavesh. Tunafuatilia suala hilo," Waziri wa Mambo ya Nje, Jeremy Hunt aliwaambia waandishi nchini Luxembourg.
"Wanadiplomasia wetu nchini UAE wana uzoefu wa kutosha wa kushughulikia masuala hayo ... kwa hiyo anapata huduma bora inayowezekana " kutoka mamlaka za Uingereza, aliongeza.
Kundi la Detained in Dubai lilisema mume Mreno wa Sharavesh ambaye aliishi naye kwa miaka 18, alimpa talaka na kuoa mwanamke kutoka Tunisia wakiwa Dubai.