Uzi maalum wa kupeana Likes: Comment chochote upate "Like"

Mtoto wa Kihispaniola, akuzwa City

Jina lake halisi ni Jose Angel Esmorís Tasende na alizaliwa Januari 4, 1992 katika eneo la Coristanco nchini Hispania. Mpaka sasa ana umri wa miaka 22. Angelino alianza kucheza soka katika klabu ya watoto ya klabu maarufu Hispania Deportivo de La Coruna mwaka 2007.
 
Alicheza kwa kipindi cha miaka sita katika timu hiyo ya vijana huku kiwango chake kikianza kuzigusa klabu kubwa za Hispania Barcelona na Real Madrid ambazo zilianza kuinyatia saini yake kwa ajili ya kuingia katika timu zao za vijana.

Atinga Man City
 
Julai 8, 2012 Angelino alisaini mkataba wa miaka minne na klabu ya Manchester City na mkataba huo ulitazamiwa kuanza Januari 2013. Katika klabu ya City Angelino alitakiwa kukipiga katika kikosi cha chini ya umri wa miaka 18. Pia alitakiwa kucheza kikosi cha akiba.
 
Baada ya kuonyesha kiwango kizuri alianza kufanya mazoezi na kikosi cha kwanza na mnamo Desemba 2, 2014 Angelino alitajwa katika kikosi cha City ambacho kiliichapa Sunderland 4-1 katika pambano la Ligi Kuu ya England lakini hata hivyo aliishia katika benchi.
 
Januari 30, 2016 Angelino aliichezea City mechi ya kwanza katika kikosi cha wakubwa katika pambano la kombe la FA dhidi ya Aston Villa ambapo aliingia uwanjani dakika ya 81 kuchukua nafasi ya Gael Clichy. Katika pambano hilo City walishinda 4-0.
 
Asoteshwa mikopo, auzwa jumla

Baada ya hapo Angelino alipelekwa katika klabu ya New York City kwa mkopo. Klabu hiyo inamilikiwa na wamiliki ambao wanaimiliki Manchester City. Alicheza mechi yake ya kwanza Julai 12, 2015 katika pambano dhidi ya Toronto FC ambalo lilimalizika kwa sare ya mabao 4-4.
 
Katika pambano hilo Angelino aliingiwa uwanjani katika dakika ya 46 kuchukua nafasi ya Kwame Watson-Siriboe na kucheza kipindi chote cha pili cha mechi hiyo. Baadaye akacheza dakika zote 90 katika pambano dhidi ya New England Revolution.
 
Baada ya kumaliza kipindi chake cha mkopo, Angelino alirudi City katika msimu wa 2016–17 ambapo alicheza mechi yake ya kwanza kwa City katika pambano la Ligi ya Mabingwa dhidi ya Steaua Bucuret ambapo walishinda 1-0 mnamo Agosti 24. Mechi yake ya pili ilikuwa dhidi ya Swansea City kombe la Ligi mnamo Septemba 21.
 
Desemba 27 ilitangazwa kwamba Angelino angepelekwa kwa mkopo katika klabu ya Girona FC kuanzia Januari Mosi hadi mwishoni mwa msimu. Januari 31 baada ya kushindwa kuichezea Girona mechi yoyote ile angepelekwa kwa mkopo kwenda klabu ya RCD Mallorca. Alicheza mechi ya kwanza katika pambano dhidi ya Real Oviedo mnamo Februari 5 wakipoteza kwa mabao 2–1.
 
City yamrudisha

Kiwango chake akiwa na NAC Breda kilisababisha klabu mbalimbali kubwa nchini Uholanzi kuanza kuwania kiwango chake. Walikuwa ni PSV Eindhoven ndio waliofanikiwa kuinasa saini yake jumla akisaini mkataba wa miaka mitano mnamo Juni 15, 2018.
 
Hata hivyo City waliweka kipengele cha kumrudisha staa huyo kwa bei nafuu muda wowote ambao wangemuhitaji. Kuanzia hapo Angelino alianza kuonyesha kiwango kizuri kiasi City walijikuta wakivutiwa kumrudisha tena Etihad.
 
Katika dirisha kubwa la majira ya joto lililopita mnamo Julai 3, 2019, City waliamua kumrudisha tena Angelino ikiwa ni msimu mmoja tangu walipomuuza jumla kwenda kwa klabu hiyo ya Uholanzi. Hii ilikuwa ni baada ya kutengua kipengele cha kurudishiwa staa huyo kwa dau nafuu.
 
Alicheza mechi yake ya kwanza katika pambano la Ligi Kuu dhidi ya Watford mnamo Septemba 21 ambapo City waliichakaza Watford mabao 8-0 uwanja wa Etihad. Katika pambano hilo aliingia uwanjani wakati wa mapumziko kuchukua nafasi ya mlinzi wa kushoto wa kimataifa wa Ufaransa, Benjamin Mendy.
 
Akaingia tena uwanjani katika pambano dhidi ya Aston Villa waliloshinda mabao 3-0 na kwa mara nyingine aliingia uwanjani kuchukua nafasi ya Mendy. Baada ya hapo alianza katika pambano dhidi ya Liverpool Anfield wikiendi iliyopita na walichapwa mabao 3-1.
 
Asubiri jezi ya Hispania

Angelino tayari ameichezea Hispania katika ngazi ya soka la vijana ambapo awali alikipiga katika kikosi cha timu ya taifa chini ya umri wa miaka 17 lakini baadaye akakipiga katika kikosi cha chini ya umri wa miaka 21.
 
Cookies are required to use this site. You must accept them to continue using the site. Learn more…