Ole Gunnar Solskjaer ataingiza jeshi lake kusaka nafasi ya kulipiza kisasi baada ya mechi ya mwisho iliyopigwa uwanjani hapo kupewa kichapo cha mabao 3-1 kwenye nusu fainali ya Kombe la Ligi.
Lakini, Ole anaingia kwenye mchezo wa leo akiwa na kumbukumbu ya kipigo hicho na amewakalisha chini wachezaji wake na kuwaonya hataki kuona uzembe huo ukijirudi tena.
Ole ameuita uzembe kwa sababu hadi kipindi cha kwanza kinakwisha, Man United ilikuwa imeshachapwa mabao 3-0 kabla ya Marcus Rashford kufunga bao la kufutia machozi kipindi cha pili.
Sasa wakati Pep Guardiola na jeshi lake wakirudi tena Old Trafford leo Jumapili, Solskjaer anaamini vijana wake wamejifunza kwa makosa waliyoyafanya na hawatatoa book tena zaidi ya kupambana kupata ushindi.
Unapokuwa nyumbani hutakiwi kujisahau hasa unapocheza na timu kama Man City, wanaweza kukuadhibu kama hautakuwa fiti kwa asilimia 100 uwanjani,” alisema Ole.
Wakati mwingine unapokuwa nyumbani mbele ya mashabiki zako unatakiwa kuwaonyesha ubora kwa kumfunga mpinzani wako, hilo ndio tulilifanya na ndani ya dakika 20 tulijiachia na hapo wakatuadhibu kwa kufunga mabao ya haraka haraka.
Halikuwa tatizo kubwa, lakini lilituondoa mchezoni kabisa na hapo City wakajenga ujasiri. Kama sasa hivi wameshinda kwa mabao 2-1 dhidi ya Real Madrid pale Bernabeu (Ligi ya Mabingwa Ulaya), wamebeba taji la Ligi hivyo, watakuja hapa wakiwa na ujasiri na watacheza mchezo wao ule ule,” aliongeza Ole.
Wakati Ole akitaka kusaka alama tatu muhimu pale Old Trafford ili kufukuzia kumaliza ndani ya nafasi nne za juu ili afuzu kucheza Ligi ya Mabingwa Ulaya msimu ujao, tisho la kukosekana kwa nyota hao linamuweka roho juu.
Kikubwa kinachomtia hofu Ole ni sintofahamu kuhusu mabeki wake visiki Harry Maguire na Aaron Wan-Bissaka huku winga wake Daniel James kuwa kwenye hatihati ya kucheza kutokana na kusumbuliwa na majeraha.
Mbali na hao ambao wamepata majeraha hivi karibuni, Ole amekuwa akisaka ushindi kwenye mechi nyingi bila huduma ya kiungo ghali wake Paul Pogba na straika Marcus Rashford ambao wako nje ya uwanja kwa muda mrefu.
Hata hivyo, madaktari walikuwa wakiwaangalia Maguire, Wan-Bissaka na James kwa ukaribu zaidi ili kuangalia uwezekano wa kuwepo kwenye kipute hicho cha Jumapili.