Uzi maalum wa kupeana Likes: Comment chochote upate "Like"

Uzi maalum wa kupeana Likes: Comment chochote upate "Like"

Akiwa Waziri Kiongozi wa Serikali ya Mapinduzi ya Zanzibar chini ya Rais Ali Hassan Mwinyi, Maalim Seif alisimamia sera ya kulegeza masharti ya kufanya biashara na kuimarisha upatikani wa bidhaa Zanzibar.
Sera za kurekebisha uchumi hasa katika biashara zilianza kutekelezwa na Serikali ya Mapinduzi ya Zanzibar kabla ya Serikali ya Muungano kwa sababu ya ushawishi wa Maalim Seif Sharif Hamad.
Miaka ya 1970 na 1980, Chuo Kikuu cha Dar es Salaam kilikuwa na utamaduni wa kufanya mkutano kila mwaka kuhusu harakati za Ukombozi Kusini ya Afrika.
 
Toka akiwa Chuo Kikuu, Maalim Seif alikuwa mtafiti na mfuatiliaji wa ukombozi wa Bara la Afrika. Mwaka 1986 akiwa Waziri Kiongozi, alikuwa Mgeni Rasmi kufungua Mkutano wa Ukombozi wa Kusini mwa Afrika jijini Arusha.
Wakati huo Makaburu walikuwa wanatawala na kuendeleza siasa za ubaguzi wa rangi Afrika ya Kusini na Namibia. Nakumbuka Maalim alitoa hotuba nzuri na kusisitiza kuwa nchi za Kiafrika hazitakuwa huru mpaka Makaburu wan’golewe Namibia na Afrika ya Kusini.
Alihimiza kwamba ilikuwa ni wajibu wa nchi zote za Afrika kuunga mkono juhudi za ukombozi.
 
Baada ya ufunguzi wa mkutano huo, mimi na Profesa Mwesiga Baregu tuliwakilisha washiriki kwenye Chakula cha mchana na Maalim Seif kwenye hoteli ya Mount Meru, Arusha alipofikia.
Tulipoingia katika mfumo wa Vyama Vingi, Profesa Baregu amekuwa akipenda kunikumbusha juu ya lunch yetu na Maalim Seif Mount Meru Hotel.
Maalim Seif aliachishwa kuwa Waziri Kiongozi na kufukuzwa uanachama wa CCM na hatimaye kuwekwa ndani mwaka 1988.
 
Nikiwa Chuo Kikuu mwaka 1989 niliishawishi Jumuiya ya Walimu (UDASA) kutoa Tamko la kuitaka serikali kumuachia huru Maalim Seif Sharif Hamad.
Nakumbuka aliyeandika rasimu ya mwanzo ya Tamko hilo ni Profesa Hamza Njozi, wakati huo akiwa Mhadhiri Idara ya Kiingereza, na ambaye baadaye alikuwa Makamo wa Mkuu wa Chuo Kikuu cha Waislam, Morogoro.
 
Sikupata fursa ya kukutana na Maalim Seif mwanzoni mwa miaka ya 1990. Mwaka 1991 niliteuliwa rasmi kuwa Mshauri wa Rais Mwinyi kuhusu masuala ya Uchumi.
Mwaka 1993 nikapewa fursa ya kuwa Fulbright Visiting Professor of Economics, Williams College, Massachussets, Marekani. Niliporudi toka Marekani Julai, 1995 wakati tunaelekea kwenye uchaguzi mkuu ndipo uhusiano wa kisiasa na Maalim Seif ulipoanza rasmi, kama nitakavyoeleza katika sehemu ya pili.
 
SEHEMU YA PILI: MAALIM SEIF ANISHAURI NISIGOMBEE URAIS KWA TIKETI YA CUF
Mwaka 1993, CUF chini ya Uongozi wa Mwenyekiti James Mapalala, Makamu Maalim Seif Sharif Hamad, na Katibu mkuu Shaaban Khamis Mloo, kilifanikiwa kuwa Chama cha Upinzani cha kwanza kupata usajili wa kudumu, baada ya kukamilisha masharti ya Sheria ya Vyama vya Siasa ya mwaka 1992.

Wakati CUF inapata usajili wa kudumu mimi nilikuwa Msaidizi na Mshauri wa mambo ya Uchumi wa Rais Ali Hassan Mwinyi.
Katikati ya mwaka 1993 nilitunukiwa fursa ya kuwa Fulbright Visiting Professor of Economics, Chuo Kikuu cha Williams College, Massachussets, nchini Marekani. Niliomba rukhsa kwa Rais Mwinyi ili niweze kuitumia fursa hiyo.

Mzee Rukhsa akanikubalia, nikaenda Marekani kufundisha na kufanya utafiti kuhusu maendeleo ya uchumi.
 
Nilipokuwa Williams College, mwaka 1994, nilikaribishwa pamoja na Prof. Jeffrey Sachs wa Chuo Kikuu cha Columbia, kutoa ushahidi kwenye Bunge la Marekani kuhusu madeni ya nje ya nchi za Kiafrika.
Nilijenga hoja kwenye Bunge hilo kuwa madeni ya nje ya nchi za Kiafrika yalikuwa hayalipiki na yalistahili kufutwa.
Wakati huo nchini Tanzania mahusiano kati ya Washirika wa Maendeleo na Serikali yalikuwa yameharibika. Wengi wa Washirika hao walipunguza au kutishia kufuta misaada yao kwa Tanzania.
 
Mazungumzo ya Serikali ya Tanzania na Shirika la Fedha la Kimataifa IMF yalikuwa yamekwama. Ili kunusuru jahazi, Shirika la Maendeleo la Denmark – DANIDA, lilimuomba Prof. Gerry Helleiner wa Chuo Kikuu cha Toronto, Canada auende jopo litakalosuluhisha Serikali ya Tanzania na Washirika wa Maendeleo.
 
Kwa kuzingatia hoja nilizojenga kwenye Bunge la Marekani kuwa nchi za Kiafrika zilihitaji kufutiwa madeni, na kwa kuwa miaka ya nyuma nilikuwa mshauri wa mambo ya uchumi wa Rais Mwinyi, Prof Helleiner aliniomba nijiunge na jopo lake. Mtanzania mwingine aliyekuwemo katika jopo hilo ni Prof. Benno Ndulu, ambaye hatimaye aliteuliwa kuwa Gavana wa Benki Kuu ya Tanzania, katika uongozi wa awamu ya nne.
 
Taarifa ya Prof Helleiner ilikamilika mwezi wa Juni 1995 na kukabidhiwa DANIDA, ambao hatimaye waliikabidhi Serikalini.
Mheshimiwa Mkapa alipoteuliwa kuwa Mgombea Urais wa CCM alipelekewa nakala ya taarifa hiyo (Helleiner Report) na Dr Enos Bukuku, rafiki yangu wa siku nyingi Chuo Kikuu cha Dar es Salaam.
Pamoja na Mkapa kuwemo serikalini alikuwa hajaiona taarifa hiyo. Nilifahamishwa kuwa aliisoma kwa makini na kuzingatia mapendekezo yake na alitaka nikutane naye.
 
Mwaka 1995 Profesa Kighoma Ali Malima alijiengua CCM na kujiunga na chama cha NRA. Wadau wengi wa siasa ndani na nje ya CCM walimuunga mkono. Pale Chuo kikuu cha Dar es Salaam kuna vijana waliokuwa wanamuunga mkono akiwemo Juma Kilaghai, Faraji Tamimu, Adui Kondo, na Salim Mkonje. Nje ya chuo walikuwepo wadau wengine kama mwanahistoria nguli, Mohamed Said, Rafiki Marua, marehemu Mzee Abdul Kileo, na Mzee Amin Mrisha.
Hawa wote walitaka Profesa Kighoma Malima agombee urais kwenye uchaguzi mkuu wa 1995 kwa tiketi ya NRA.
 
Profesa Malima alikuwa Mkuu wangu wa Idara ya Uchumi, Chuo Kikuu cha Dar es Salaam wakati naenda kusoma Marekani. Kwa bahati mbaya au kwa usahihi zaidi ‘amri ya Mungu haina makosa’, Prof. Malima alifariki ghafla jijini London, Uingereza kabla ya mchakato rasmi wa mbio za urais kuanza.
Vijana wa Chuo Kikuu waliokuwa wanamuunga mkono Profesa Malima walinifuata na kujaribu kunishawishi nifuate nyayo za Mwalimu wangu Prof. Malima.
 
Wakati huo ilitokea kuwa CUF nao walikuwa wanatafuta Mgombea Urais wa Jamhuri ya Muungano wa Tanzania. Marehemu Shaaban Khamis Mloo aliyekuwa Katibu Mkuu wa CUF na Mheshimiwa Hamad Rashid, mwenyekiti wa sasa wa chama cha ADC, ndiyo waliokuwa wanaongoza juhudi hizo.
Katika juhudi hizo mheshimiwa Hamad Rashid aliongea na vijana waliokuwa wanamuunga mkono Prof. Malima kuwashawishi wanishawishi niwe Mgombea wa Urais kupitia CUF.
Maalim Seif ndiye niliyekuwa namfahamu vizuri ndani ya CUF. Niliamua kwenda kuzungumza naye.
 
Wakati huo Maalim alikuwa anaishi Hoteli ya Star Light, jijini Dar es Salaam. Katika mazungumzo yetu tuliichambua hali halisi ya siasa Tanzania. CUF ilikuwa imejiandaa vizuri kwa uchaguzi mkuu wa Zanzibar, lakini maandalizi ya uchaguzi mkuu Tanzania Bara yalikuwa hafifu.
Kwa pamoja tulikutana na baadhi ya vijana wa Prof. Malima waliokuwa wananishawishi niwe mgombea Urais. Katika mazungumzo Maalim Seif alisema: “Tumtendee haki Prof. Lipumba.
Muda mrefu amekuwa nje ya nchi. Katika siasa za Tanzania hajulikani. Ghafla mnataka kumtosa agombee Urais bila maandalizi yeyote?”
 
Mimi niliukubali ushauri wa Maalim Seif kuwa kwa mazingira yaliyokuwepo haukuwa wakati muafaka kwa mimi kugombea Urais.
Nilijua suala hili tumelimaliza. Hata hivyo pembeni vijana wa Profesa Malima hawakukubali hoja za Maalim Seif na waliendelea kuwasiliana na Hamad Rashid.
Kwenye Mkutano Mkuu wa CUF ambao mimi sikuhudhuria jina langu lilipendekezwa na kupitishwa niwe Mgombea wa Urais kwa tiketi ya CUF. Marehemu Shaaban Khamis Mloo, Katibu Mkuu wa CUF wakati huo alikuwa na wasiwasi kuwa ningekataa.
 
Hata hivyo nilipoelezwa kuwa Mkutano Mkuu wa CUF umeniteua niwe Mgombea Urais nilisita kidogo lakini sikukataa. Niliona hiyo ni fursa nzuri ya kueleza matatizo ya uchumi ya Tanzania na namna ya kuyatatua.
Niliamini nitashiriki Uchaguzi na baada ya hapo kurejea Chuo Kikuu. Niliamini ushiriki wangu ungesaidia kujenga hamasa na kukijenga Chama cha CUF – Tanzania Bara na kukifanya kiwe Chama cha kitaifa
 
Maalim Seif pamoja na ushauri wake sahihi nilishiriki kugombea Urais, alifurahi nilipokubali. Tulijadiliana suala la Mgombea Mwenza. Kwa kuzingatia matakwa ya katiba, kwa kuwa mimi natoka Tanzania Bara, Mgombea Mwenza lazima awe Mzanzibari.
Alimpendekeza Juma Duni Haji ambaye alikuwa masomoni Uingereza. Juma Duni alikuwa kitivo cha Sayansi wakati tukiwa wanafunzi Chuo Kikuu cha Dar es Salaam. Aliahirisha masomo yake kuja kushiriki katika kampeni.
 
Nilishiriki katika uzinduzi wa kampeni za Urais wa Zanzibar. Zilifana sana. Niliamini kuwa Maalim Seif atashinda Uchaguzi huo na kuwa Rais wa Zanzibar.
Nilihutubia mkutano huo na kuwaeleza Wazanzibari kuwa Mzigo mzito hupewa Mnyamwezi. Niliwaambia kuwa Urais ulikuwa ni mzigo mzito na mwenye kuweza kuumudu ni Mnyamwezi huyu aliyekuwa mbele yao. Mkutano wote ulianguka kicheko.

Kama alivyonieleza Maalim Seif, CUF ilikuwa kweli haijajiandaa kuweka Mgombea Urais wa Jamhuri ya Muungano wa Tanzania.
Hatukuwa na magari wala nyezo nyingine za kampeni.
Senti kidogo niliyokuwa nayo – kiasi cha dola za Marekani elfu sita - nilizitumia kwenye shughuli za kampeni za awali.
 
Pia niliagiza akiba yangu iliyokuwa inafikia dola elfu thelathini za Marekani iletwe kusaidia kampeni ya Mgombea Urais.
Katibu Mkuu, Marehemu Shaaban Khamis Mloo, ndiye alikuwa Meneja wa Kampeni ya Rais. Alishauri na nikakubali kuwa tuanzie kampeni zetu mikoa ya Kusini ya Mtwara na Lindi.
Hoja yake ilijikita kwenye ukweli kwamba mikoa hiyo ilikuwa imetelekezwa kwa muda mrefu na Serikali ya CCM. Tulitumia gari za kukodi kwenda kuzindua kampeni Mtwara.
 
Mikutano yetu ya kampeni katika hiyo mikoa ya Mtwara na Lindi ilifana sana. Watu wengi walihamasika na hoja zangu za kujenga uchumi shirikishi.
Nilifafanua kauli mbiu ya ‘Haki Sawa kwa Wote’ kuwa ni pamoja na haki za kiuchumi, haki za kisiasa na haki za kijamii.
Vijana wa Profesa Malima walihangaika kuhakikisha tunazunguka nchi nzima kufanya kampeni. Juma Kilaghai alikuwa Katibu wangu wakati wa Kampeni, japo kutokana na hali halisi tulikubaliana abakie Dar es Salaam kusukuma mambo pale ambapo kungekuwa na mkwamo wowote.
 
You must log in or register to reply here.

Our Community

Coming Soon

Regional Communities

Coming Soon
Back
Top Bottom
Menu
Forums
New posts
Log in
Register