Wakenya Waishio Nchini Uganda na Kura za 2027 - Pukose Asema "Watakaowazuia Watauawa"

[Wakaguongo]

Mbunge wa Endebess, Dkt Robert Pukose, amezua mjadala baada ya kutoa kauli kali kuhusu Wakenya wanaoishi Uganda na wanaotarajiwa kuvuka mpaka kushiriki uchaguzi wa 2027.

Katika hotuba iliyoripotiwa Oktoba 2, Pukose alisema kuwa yeyote atakayejaribu kuwazuia Wakenya hao kuingia nchini kupiga kura “atauawa” na mwili wake kutupwa katika Mto Suam.

Kauli hiyo imeibua wasiwasi hasa katika eneo la mpaka wa Kenya na Uganda, ambako jamii zina uhusiano wa karibu na shughuli za kuvuka mpaka ni sehemu ya maisha ya kila siku.

Lakini kuna swali kubwa hapa: Pukose alikuwa akizungumza kuhusu nini hasa?

Mjadala unaohusika ni kuhusu Wakenya wanaoishi Uganda lakini wana haki ya kupiga kura nchini Kenya, na iwapo watu hao wataweza kuvuka mpaka kushiriki uchaguzi wa 2027.

Badala ya mjadala huo kubaki kwenye suala la haki ya kupiga kura na taratibu za uchaguzi, kauli ya Pukose imeingia katika eneo la vitisho vya mauaji, jambo ambalo linaweza kuwa na uzito zaidi katika mazingira ya kisiasa yenye ushindani.

Haya yote yakiendelea Tume ya Kitaifa ya Uwiano na Utangamano (NCIC) bado haijatoa tamko hadharani kuhusu kauli hii ya Dkt. Pukose.

Ikumbukwe Kenya iko kuelekea uchaguzi wa 2027 na kauli zinazotolewa na viongozi kuhusu wapiga kura, mipaka, jamii na ushindani wa kisiasa zinaweza kuwa na athari zaidi ya dakika chache za hotuba.

Kwa hiyo, swali si tu “Pukose alisema nini?” Swali la msingi ni; kuelekea Uchaguzi Mkuu 2027, ni mstari gani Viongozi wanapaswa kutovuka wanapozungumzia wapiga kura na ushindani wa kisiasa? Na je, Taasisi zinazohusika zinapaswa kufanya nini pale lugha ya kisiasa inapogeuka kuwa vitisho vya wazi vya vurugu?