KERO Walimu wa Mwaka 2014 Wadai Haki ya Madaraja Waliyopunjwa

[Anonymous]

MHESHIMIWA WAZIRI.

Ofisi ya Rais, Menejimenti ya Utumishi wa Umma na Utawala Bora.

Mji wa Serikali Mtumba Mtaa wa Utumishi.

S.L.P 670.

DODOMA, TANZANIA.

Yah: MAPUNJO YA DARAJA KWA WALIMU WALIOAJIRIWA MWAKA 2014.

Husika na somo tajwa hapo juu.

2. Kwa heshima kubwa, nakuandikia barua hii kwa niaba ya Walimu tuliyoajiriwa katika Utumishi wa Umma ( ngazi ya Shahada) mwaka 2014, tunawasilisha ombi hili mbele yako tukiiomba Serikali itazame kwa karibu changamoto ya kiutumishi iliyotokana na kuchelewa kwetu kupandishwa madaraja kwa wakati uliostahili.

3. kwa mujibu wa Sheria ya Utumishi wa Umma Sura ya 298 [Public Service Act, Cap. 298], Kanuni za Utumishi wa Umma za mwaka 2003,kanuni na. 8 ya Teachers Service Commission Regulations, 2016 pamoja na Local Government (Teachers’ Service) Scheme, 2016, maendeleo ya mwalimu katika kada hutegemea uzoefu, muda wa utumishi, sifa pamoja na utendaji kazi. Aidha, kwa mujibu wa Mwongozo wa Miundo ya Utumishi wa Kada za Walimu (Teachers Service Scheme), mtumishi aliyethibitishwa kazini hustahili kupandishwa daraja baada ya kipindi maalum kwa kuzingatia masharti ya kada na utendaji wa kazi ulioridhisha. Kwa msingi huo, sisi walimu tulioajiriwa mwaka 2014 tulitarajia kupandishwa madaraja kama ifuatavyo:-

1. Kupanda daraja kwa mara ya kwanza mwaka 2018 -kutoka daraja D kwenda E
2. Kupanda daraja kwa mara ya pili mwaka 2021- kutoka daraja E kwenda F
3. Kupanda daraja kwa mara ya tatu mwaka 2024 - kutoka daraja F kwenda G

4. Hata hivyo, kutokana na kusimamishwa kwa upandishaji wa madaraja kipindi cha uhakiki wa watumishi wa umma, hatukupandishwa mwaka 2018 kama ilivyotarajiwa. Badala yake, tulipandishwa kwa mara ya kwanza mwaka 2021 kwenda Daraja E na mara ya pili mwaka 2024 kwenda Daraja F . Matokeo yake ni kuwa maendeleo yetu ya kiutumishi yameendelea kuwa nyuma kwa daraja moja ikilinganishwa na progression ya kawaida ya kada yetu. Aidha, hali hiyo imesababisha kufanana madaraja kati yetu na walimu walioajiriwa mwaka 2015, licha ya tofauti ya muda wa ajira na uzoefu wa kazi.

5. Tunatambua na kuthamini juhudi kubwa zilizofanywa na Serikali katika kipindi cha uhakiki wa watumishi wa umma. Hata hivyo, baada ya uhakiki huo kukamilika, athari zilizotokana na kusimamishwa kwa upandishaji madaraja zimeendelea kubaki upande wetu bila kufanyika marekebisho ya kurejesha progression ya kawaida ya kada.

Kutokana na hali hiyo, sisi walimu walioajiriwa mwaka 2014 tunaomba Serikali yako itafakari kwa huruma na haki ya kiutumishi kufanya marekebisho yafuatayo:

1. Kufanya mapitio ya maendeleo yetu ya kada kwa kuzingatia muda halisi wa utumishi tulionao;
2. Kutupandisha madaraja kwa mserereko au kufanya marekebisho yatakayorejesha seniority yetu ya kiutumishi;
3. Kurekebisha tofauti iliyojitokeza ya kufanana madaraja kati yetu na baadhi ya watumishi walioajiriwa baada yetu;

6. Mheshimiwa Waziri, sisi ni watumishi wa Serikali wenye uzalendo na tumeendelea kutekeleza majukumu yetu kwa bidii, weledi na utii mkubwa kwa Serikali yetu. Tuna imani kuwa Serikali chini ya uongozi wa Mheshimiwa Dkt. Samia Suluhu Hassan itaendelea kusikiliza na kutatua changamoto za watumishi wake kwa misingi ya haki, usawa na ustawi wa Utumishi wa Umma.

 

[hip hop uchwara]

Hilo nalo mkalitazame