Akizungumza na wawekezaji Jijini Nairobi leo, Dangote alitaja changamoto za kisheria nchini Kenya kama jambo ambalo kampuni yake imewahi kukutana nalo katika mataifa mengine ya Afrika.
Alitoa mfano wa Senegal, akisema wakati mmoja kiwanda cha kampuni yake kilizuiwa kwa mwaka mmoja na kampuni ikaenda hadi Mahakama ya Juu. Kisha akatoa kauli iliyovuta 'attention'
“Anyone who wants to cause trouble, we are ready.”
Kauli hiyo inakuja wakati ambapo wakazi 133 wa Chandavai, Lamu, wamefungua kesi wakipinga matumizi ya sehemu ya ardhi ambayo wanadai ni ya mababu zao.
Mahakama ya Malindi imeagiza hali iliyokuwepo kwenye ardhi hiyo iendelee hadi kesi itakaposikilizwa tarehe 14 Oktoba 2026. Wakazi hao wanadai kuwa wameishi, kulima na kufuga katika eneo hilo kwa vizazi na wanataka masuala ya umiliki, fidia na makazi mapya yashughulikiwe kwanza.
Hata hivyo, hatua hiyo ya Mahakama haijasitisha rasmi hafla ya kuweka jiwe la msingi iliyopangwa kufanyika kesho, Septemba 30. Dangote Group imesema hafla hiyo itaendelea, ingawa shughuli fulani kwenye eneo la mradi zinaweza kuathiriwa na amri ya Mahakama.
Mradi huo una thamani inayokadiriwa kuwa shilingi trilioni 2.2 na unapangwa kuwa na uwezo wa kuchakata hadi mapipa 700,000 ya mafuta ghafi kwa siku.
Kwa hiyo, sasa kuna simulizi mbili zinazokutana Lamu:
Kwa upande mmoja: Dangote anasema changamoto za aina hii hazitamzuia kujenga mradi.
Kwa upande mwingine: Wakazi waliokwenda Mahakamani wanasema kuna masuala ya ardhi, fidia na haki za jamii ambayo yanapaswa kushughulikiwa.
Je, hii ni kawaida kwa uwekezaji mkubwa kukumbana na kesi za ardhi au kesi hii inaibua maswali ambayo lazima yajibiwe kabla mradi kuendelea? Hasa baada ya Dangote kusema kwa msisitizo: “we are ready.”