Ameandika Baba Askofu Stephen Munga
MKATABA WA BANDARI UMETUSAIDIA KUJUANA ZAIDI
"Na hivi ndivyo tunavyoweza kutambua wazi kati ya walio watoto wa Mungu na walio watoto wa shetani. Mtu ye yote asiyetenda lililo haki si wa Mungu; wala asiyempenda ndugu yake si wa Mungu."
(1 Yohana 3:10)
Kwanza, Nimekubali kuwa ndugu hujuana vizuri wakati wa matatizo na migogoro. Hata uliodhani wanakuheshimu utawasikia wakikutukana. Wasiostahil8 kutukana walijaribu kumvunjia heshima Profesa Shivji wakisahau kwamba wapo watu heshima zao hazivunjwi kirahisi.
Pili, Mgogoro wa bandari umetufanya tujuane vizuri Watanzania. Baadhi ya watu walitiwa kiza fahamu na adabu zao wakabaki kama waliosimama uchi hadharani. Tukumbuke kuwa kujaribu kufunika ukweli na kufukia haki ni kama kuzima moto kwa petroli.
Tatu, Uzalendo na maadili mema tuliyojidai tunataka kuyajenga katika jamii yetu juhudi hizo tumezimwagia matope. Hata viongozi wa dini wenye dhamana ya kuadibisha jamii wametumika kwa uongo na majungu. Utamwambiaje mtoto asitukane wakati mwenyewe ni mtukanaji. Tusiwaharibie watoto maisha kwa ajili ya ulafi wa leo.
Nne, Tumedhalilishana kwa hoja zisizo na ufahamu wa kina. Wapo watu ambao akipewa kipande cha mkate aweza kutukana kijiji kizima. Hekima ni pamoja na kujua la kuzungumza kwa wakati ufaao na kwa kiasi kifaacho.
Hitimisho, hivi ni vita vikubwa kwani ni mvutano baina ya kweli na uongo; haki na dhuluma; wema na uovu; giza na nuru; na uzalendo na usaliti. Mpaka tutakapofika mwisho tutakuwa tumejuana vizuri. Kwamba asiyetenda lililo haki si wa Mungu; wala asiyempenda ndugu yake si wa Mungu.