Ajali hiyo ilitokea muda mfupi baada ya saa sita usiku, wakati lori lililokuwa likitoka Nairobi kuelekea Mombasa lilipogongana na magari kadhaa.
Kwa mujibu wa Polisi, lori hilo lilidaiwa kushindwa kuweka njia yake, yaani kubaki kwenye 'lane' yake, wakati likipita magari mengine, na kugonga upande wa nyuma wa lori jingine. Baada ya dereva kupoteza udhibiti, lori hilo liligongana na magari mengine kabla ya kufika kwenye Toyota Hiace, matatu iliyokuwa imebeba abiria waliokuwa wakielekea Subukia Shrine kwa ibada ya kitaifa ya maombi.
Ripoti kutoka eneo la tukio zinasema dereva wa matatu pamoja na abiria wake 12 walifariki papo hapo. Pia, dereva wa lori na watu wengine watatu waliokuwa ndani ya lori hilo walifariki, na kufanya idadi ya waliofariki kufikia 17.
Vyanzo vya habari vimeripoti kuwa baadhi ya wahanga walikuwa mahujaji kutoka St. Mathias Mulumba Parish, Mikindani, Mombasa, waliokuwa safarini kuelekea Subukia kwa maombi huko Subukia Shrine.
Aidha watu wengine walijeruhiwa na kupelekwa katika hospitali ya Sultan Hamud Sub-County kwa matibabu, huku mmoja aliyekuwa katika hali mbaya akihamishiwa kwenye Hospitali ya Rufaa ya Makueni County.
Miili ya waliofariki imepelekwa katika hifadhi ya maiti ya Sultan Hamud, huku magari yaliyohusika yakipelekwa Salama Police Station kwa ukaguzi wakati uchunguzi kuhusu chanzo kamili cha ajali ukiendelea.
Safari iliyokuwa ya kwenda kwenye ibada imegeuka kuwa msiba mkubwa kwa familia, waumini na jamii nzima.
Katika barabara ambayo imekuwa muhimu kwa usafiri kati ya Nairobi na Pwani. Ni tukio linaloibua tena swali kuhusu usalama wa wasafiri na uwajibikaji wa madereva kwenye barabara kuu nchini.
