Mjini Mogadishu, mji mkuu wa Somalia, bidhaa za China hazijadhibitiwi tu kwenye maduka halisi, kwani zinaonekana kwa wingi katika skrini za simu za mkononi, zikijaza vikapu vya manunuzi, na kupelekwa moja kwa moja mlangoni kwa wateja kupitia mtandao unaoendelea kupanuka wa maduka ya mtandaoni.
Kutoka vifaa vya kielektroniki na vifaa vya majumbani mpaka saa, mikoba, na vifaa vya simu, bidhaa zinazotengenezwa China zimeongeza umaarufu katika masoko ya kidijitali ya nchini Somalia. Unapopita mitandao ya kijamii kwa haraka, unagundua mfululizo wa video fupi na picha zinazoonyesha bidhaa zilizofika karibuni, mara nyingi zikiambatana na huduma ya kupeleka mizigo mpaka nyumbani na bei za ushindani.
Nyuma ya mwelekeo huu kuna kizazi kipya cha wajasiriamali vijana wa Somalia, ambao wamegeukia biashara ya mtandaoni kutokana na uhaba mkubwa wa ajira rasmi. Wengi wao, wakiwemo wahitimu wa vyuo vikuu, wanaingiza bidhaa kutoka China na kuziuza kupitia majukwaa ya mitandao ya kijamii, na kubadili eneo la mtandao kuwa kituo kinachoshamiri cha biashara.
Omar Ahmed, mhitimu wa chuo kikuu na mmiliki wa duka la mtandaoni la Haydar, ni miongoni mwa vijana wanaoenda sambamba na wimbi hili. Kutokana na ukosefu wa ajira baada ya kuhitimu masomo yake, aliamua kuanzisha njia yake mwenyewe. Anasema mtu anapofanya juhudi kubwa, hatimaye anatimiza maendeleo, na hiyo ni sababu iliyomfanya kuamua kufanya biashara badala ya kukaa tu nyumbani.
Omar anasema wanapata bidhaa za ubora wa juu kutoka China, na kwa sasa anauza bidhaa mbalimbali za China kwa wateja mjini Mogadishu, na amekuja kuamini kuwa, uaminifu ni nguzo muhimu kwa biashara ya mtandaoni. Anasema kile wateja wanapenda ni kupokea bidhaa zao mlangoni mwao sawasawa na walivyoagiza, bila ya uharibifu wowote. Wateja hawapendi kuona kitu tofauti na kile walichokiona kwenye mtandao, na kuongeza kuwa, usambazaji mzigo wa kutegemeka na ubora wa bidhaa ni muhimu katika kudumisha wateja.
Mjasiriamali mwingine kijana anayeitwa Mohamed Mustaf, alizindua Soko la Mtandaoni la Side kwenye mtandao wa kijamii wa TikTok mwaka 2024. Katika duka lake hilo, anauza saa za mkononi za wanaume, mikoba, na makasha ya simu anayopata kutoka China, na kuwafikia wateja wengi mjini Mogadishu. Anasema ni vigumu sana kupata kazi mjini, lakini kwa biashara ya mtandaoni, mtu anakuwa huru, anasimamia kila kitu mwenyewe na anaweza kuagiza bidhaa kwa urahisi, hivyo anadhani kuingia kwenye biashara ya mtandaoni ni jambo zuri zaidi kuliko kuajiriwa.
Wakiwa na simu za kisasa na akaunti kwenye mitandao ya kijamii, vijana wa Kisomali wanaunganisha mnyororo wa ugavi duniani na familia za Somalia. Kwa wafanyabiashara kama Ahmed na Mustafa, ongezeko la bidhaa za China katika maduka ya mtandaoni linawakilisha sio tu fursa za biashara, bali pia njia ya uhuru na utulivu wa maisha katika jiji ambalo linajenga kwa utulivu uhai wake wa kibiashara baada ya miongo ya mvutano wa ndani kwa ndani.
Biashara zao zinaungwa mkono na mahitaji makubwa, kwani wateja wao wanasema wanapenda kununua bidhaa za China kwa sababu zina ubora wa juu na bei ya chini.