Updates
Ndege aina ya Embraer 120, yenye usajili 5H-HLL, imeripotiwa kutua kwa tumbo katika Uwanja wa Ndege wa Kimataifa wa Kilimanjaro (KIA) leo, Oktoba 4, 2026.
Kwa mujibu wa taarifa za awali kutoka kwa mashahidi wa tukio hilo, ndege hiyo ilikumbwa na hitilafu katika mfumo wa magurudumu ya kutua (landing gear), hali iliyosababisha kutua bila magurudumu kushuka kama ilivyotarajiwa.
Tukio hilo linadaiwa kutokea majira ya saa 4:00 hadi 5:00 asubuhi, ambapo vikosi vya zimamoto na uokoaji vilikuwa tayari eneo la uwanja kwa ajili ya kuchukua hatua za dharura na kuzuia madhara zaidi.
Ndege hiyo iliondolewa muda mchache baadae na haikusababisha usumbufu mkubwa kwa safari za ndege nyingine.
Kwa sasa, Mamlaka ya uchunguzi wa ajali za anga "Tanzania Civil Air Accident Investigation Branch (TCAAIB) imeanza uchunguzi wa tukio hilo ili kubaini chanzo cha hitilafu na mazingira yaliyopelekea ndege hiyo kutua kwa tumbo.
Taarifa zaidi kuhusu hali ya ndege, abiria na wahudumu pamoja na matokeo ya awali ya uchunguzi yanatarajiwa kutolewa na mamlaka husika, ingawa taarifa za watu wa karibu walioshuhudia tukio hilo zinasema hakuna watu waliojeruhiwa.