Taasisi ya Mifupa-MOI
Senior Member
- Apr 15, 2025
- 118
- 214
Mafunzo hayo yanafanyika kuanzia Agosti 19 hadi 21, 2026, na yamejikita katika kuwajengea watumishi uelewa kuhusu fursa mbalimbali za uwekezaji, namna ya kujiwekea akiba pamoja na faida zinazopatikana kupitia uwekezaji wa muda mrefu.
Akifungua mafunzo hayo rasmi, Mkurugenzi wa Rasilimali Watu na Utawala wa MOI, Bw. Orest Mushi, amewataka watumishi kuanza kujiwekea akiba na kuwekeza mapema ili kuwa na maisha bora baada ya kustaafu.
“Siku umeajiriwa ndiyo siku unapoanza kujiandaa kustaafu. Ili ustaafu kwa heshima na maisha yako ya kustaafu yawe mazuri, ni lazima uanze kuwekeza sasa. Tumeleta mafunzo haya ili kupanua wigo wa fursa za uwekezaji na kuwasaidia kujiandaa kwa maisha yenu ya baadaye,” amesema Bw. Mushi.
Kwa upande wake, Afisa Uwekezaji wa WHI, Bw. January Melkiado, amesema Mfuko wa Faida Fund unawapa watumishi fursa ya kuanza kuwekeza kwa kiasi kidogo, ambapo mchango unaweza kuanzia Shilingi 10,000.
Amesema michango hiyo inaweza kufanyika kwa kuridhia kukatwa moja kwa moja kwenye mshahara au kupitia vyanzo vingine vya mapato vya mwekezaji.
Bw. Melkiado ameeleza pia kuwa mtu anaweza kujisajili katika mfuko huo kwa kutumia simu ya mkononi kwa kupiga *152*00# na kufuata maelekezo yanayotolewa.
Amesema uwekezaji wa aina hiyo unampa mtu fursa ya kujenga utamaduni wa kuweka akiba na kukuza fedha zake kwa ajili ya kutimiza malengo mbalimbali ya maisha.
Mafunzo hayo ya siku tatu yanalenga kuwaongezea watumishi wa MOI uelewa wa pamoja kuhusu umuhimu na faida za uwekezaji, pamoja na kuwahamasisha kutumia fursa zilizopo ili kujiandalia maisha bora ya baadaye na kipindi cha kustaafu.
