Kampuni ya China ya Tailing Electric Vehicle imeanzisha kiwanda cha kutengeneza pikipiki na baiskeli za magurudumu matatu nchini Rwanda kwa nia ya kuchangia kupunguza hewa chafu duniani na kukuza uchumi wa kijani.
Kiwanda hiki kilichopo eneo la viwanda la Gahanga, wilayani Kicukiro kimeanza kuunganisha, kuuza na kuhudumia magari mapya yanayotumia nishati ya umeme. Bidhaa za kampuni hiyo ni pamoja na baiskeli za umeme, skuta za umeme, na baiskeli za magurudumu matatu ya umeme.
"Tofauti na magari yanayotumia mafuta, magari ya betri yanayozalishwa na kampuni yetu yanatumia asilimia 100 ya injini za betri ambazo zinahitaji usambazaji wa mara kwa mara wa nishati kutoka kwa betri," Tiger Hoo, mkurugenzi mkuu wa mtambo huo, alisema.
Alisema lengo ni kuwawezesha Wanyarwanda kuhamia mfumo endelevu, safi na bora wa usafiri ambao ni wa gharama nafuu. Anaona kuwa magari ya umeme yatasaidia serikali ya Rwanda kujenga mfumo wa uchukuzi wa kijani na kutotoa hewa chafu, katika sekta yake ya uchukuzi.
"Bidhaa zetu zitaboresha mahitaji ya usafiri kwa Wanyarwanda kwa sababu magari yanayotumia betri yameundwa kwa kuzingatia mazingira ya Rwanda," alisema Hoo.
Alisema tayari kampuni hiyo imefungua maeneo ya maonyesho na mitambo ya kuunganisha katika nchi za Afrika ambazo ni Afrika Kusini, Misri, Kenya, Tanzania na Rwanda. Mwaka jana, Rwanda ilizindua mradi wa majaribio wa pikipiki za umeme katika mji mkuu wa Kigali ili kusaidia nchi hiyo kuwa na uchumi usiotumia kaboni ifikapo mwaka wa 2050.
Ripoti ya mwaka wa 2018 ya Orodha ya Vyanzo vya Uchafuzi wa Hewa nchini Rwanda na Mamlaka ya Usimamizi wa Mazingira ya Rwanda ilionyesha kuwa moshi wa magari ndio chanzo kikuu cha uchafuzi wa hewa huko Kigali na maeneo mengine ya mijini katika nchi ya Afrika ya kati.
Tayari nchini Rwanda, siku ya kutotumia gari ilianza kama hafla ya kila mwezi mwaka wa 2016 kama mpango wa Jiji la Kigali, lakini mwaka mmoja baadaye ilifanywa kila baada ya wiki mbili, kwa pendekezo la Rais Paul Kagame.
Kwenye maadhimisho ya siku hii, watoto na watu wazima wa tabaka mbalimbali hujumuika katika kukimbia, kuendesha baiskeli, kutembea kwa miguu na kufanya mazoezi ya viungo vya mwili katika maeneo ya Kigali yaliyotengwa ili kuhamamsisha umma kukumbatia utunzaji wa mazingira kwa kutumia vifaa visivyotoa hewa ya kaboni. Hakuna injini zinazoruhusiwa kusonga kwa angalau masaa manne.
Ingawa haitoshi kutatua matatizo ya uchafuzi wa mazingira ya miji, wananchi wanaona mpango huu kama mwanzo mzuri na siku ya kufurahia. Ni mfumo ambao umeanza kufanyiwa majaribio na mataifa mengine ya Afrika kama vile Uganda, Zimbabwe na Ethiopia.
