MAKALA YA NANE “JKT: Injini ya Kujitegemea- Kutoka Ardhi, Viwanda Hadi Mawazo

CHAGOSI GERALD said:

Ndugu zangu,

Hakuna taifa kubwa duniani lililojengwa kwa kutegemea huruma ya mataifa mengine. Hakuna taifa lililotukuka kwa kuamini kuwa uchumi wake unaweza kuendeshwa na wachache wanaotafuta faida binafsi. Taifa hujengwa na watu wake, kwa jasho, kwa maarifa, na kwa nidhamu ya uzalendo.

Hapa ndipo JKT ilipaswa kuwa injini ya kujitegemea, chombo cha kuinyoosha miguu ya taifa na kukipatia mwelekeo wa kiuchumi - kama vile roho inavyoipa mwili uhai.

Nchi yoyote inayotaka kuwa huru lazima iwe na viwanda vya msingi:

vyuma,

saruji,

nguo,

umeme rahisi,

mashine za kilimo,

na teknolojia ya ndani.

Hivi vyote havikuja kwa miujiza. China ilijenga viwanda hivi kupitia vijana wao wakiongozwa na vyombo vya uzalendo kama CYL. Walihubiri: "Kijana akifanya kazi, taifa linajengwa."

Hapa kwetu, JKT ingeweza kufanya hivyo. Kambi za JKT zingekuwa viwanda vya kwanza vya taifa letu. Vijana wangejifunza kutengeneza matrekta madogo, mashine za umwagiliaji, nondo, tofali bora, na vifaa vya ujenzi vinavyotengenezwa kuwa “made in Tanzania,” si made in mtu mmoja.

JKT ilipaswa kuwa kambi ya uvumbuzi, si kambi ya kusubiri ajira.

Katika nchi ambapo ardhi ni utajiri, vijana ndiyo jembe. JKT ilipaswa kufundisha:

kilimo cha umwagiliaji,

mbinu za kisasa,

mbegu zilizoboreshwa,

usimamizi wa mashamba makubwa,

kilimo cha viwanda (industrial agriculture).

Kila kambi ya JKT ingeweza kuwa shamba darasa la taifa.

Kilimo kingewaajiri vijana, kikatengeneza chakula, kikaleta viwanda, kikatoa malighafi, na hivyo kujenga uchumi usioyumba.

Vijana hawazaliwi wakiwa wabunifu - wanafunzwa kuwa wabunifu.

JKT ilipaswa kuwa:

chuo cha ufundi,

chuo cha sayansi za msingi,

chuo cha teknolojia ya mitambo,

maabara ya kemia rahisi,

warsha ya umeme,

kituo cha mafunzo ya nishati jadidifu,

na chumba cha kubuni programu rahisi za kompyuta.

Lakini leo vijana wetu wanakuwa watazamaji wa Azam Sports, si watafiti wa sayansi ya michezo; wanakuwa mashabiki wa muziki, si wahandisi wa vifaa vya muziki; wanakuwa wafuasi wa sinema zisizo zetu, si watengenezaji wa filamu zetu.

Hapa ndipo JKT ilipaswa kuingilia: kuweka silaha ya maarifa mikononi mwa vijana.

Ndugu zangu, taifa halijengwi kwa minong’ono ya mitandaoni. Halijengwi kwa tamthilia zilizotungwa kuharibu fikra za watoto. Halijengwi kwa kamari inayofundishwa kwa njia ya michezo ya televisheni.

Tumeona Burkina Faso wanaandaa watoto wa miaka 10 kuwa wazalendo.
Sisi hapa, watoto wetu wa miaka 10 wanaandaliwa kuwa:

watumiaji,

watazamaji,

wafuasi wa watu mashuhuri,

na wafungwa wa starehe.

JKT ndiyo ilipaswa kukata mnyororo huu.

Kambi za JKT zingetoa:

vipindi vya elimu ya uraia,

historia ya taifa,

falsafa za waasisi,

masimulizi ya mashujaa wetu,

elimu ya teknolojia rahisi,

na mafunzo ya tabia, maadili, na uwajibikaji.

Wakati wafanyabiashara wanauza burudani, JKT ingeuza mwanga wa akili.
Wakati media zinafundisha starehe, JKT ingeendeleza fikra.
Wakati kila kitu kinauzwa, JKT ingefundisha kitu kisichouzwa: Uzalendo.

Nchi bila falsafa ni kama mtu bila nafsi.

JKT ilipaswa kuwafundisha vijana:

maana ya uhuru,

wajibu kwa taifa,

utu,

nidhamu,

na falsafa ya kujitegemea.

Yule kijana anayemaliza JKT alipaswa kutoka akiwa na sauti moja tu ndani yake:
“Tajiri si yule mwenye mali, bali yule anayejijenga na kujenga taifa lake.”

Lakini leo, kijana anamaliza JKT akisubiri ajira - kana kwamba mguu wake hauna uwezo wa kusimama bila serikali.

Uchumi si kiwanda tu. Ni fikra.

Ukitoa demokrasia ya kufikiri, umeua taifa.
Ukitoa media kwa wachache wenye maslahi, umeharibu kizazi.
Ukiacha vijana wakue kwa mikono ya burudani, umewapoteza.

Ndiyo maana nasema:

JKT lazima irejeshwe kama injini ya kujitegemea - si jeshi la ajira, bali chuo cha taifa, chuo cha mawazo, chuo cha uzalendo na ubunifu.

Click to expand...

Interested Observer said:

Huwezi kutenganisha maendeleo na Private Sector, hayo unayoyasema yote, ati JKT- ni kama Ujamaa vyote vilishindwa hata huko China unakosema. China iligundua hiyo mwaka 1978 Deng alivyochkua ngazi, akafanya mabadiriko, kuleta sector binafsi na ubepari -wakaitwa Socialism in Chinese Charateristics, Deng mwnenyewe akasema afadhali wachache watajirike kwanza, pole pole watatajirika wengi na kuiponya nchi kwa kuwasaidia wengi. Wakaifungua nchi kkwa uwekezaji, akaanzisha mji wa Shenzhen. China imejengwa na Private sector lakini walifanya centralizastion ya Financing na ku-control major import & export. About 98% ya companies in China ni Private sector na ndiyo ina contribute kwa 80% ya maendeleo ya uchumi wa nchi.

Lakini siyo mambo ya wizi, au ulaghai, llazima ufuate sheria, system ya nidham ya hali juu, hmna mtu aliye juu ya sheria. Hawauzi raslimali za nchi.

Strong Private sector, Sheria zifuatwe na stability ndiyo unapata sustainable economy. Usishahu strong institutions.

Click to expand...