Salaam!
Tangu kuzaliwa kwangu nimeshapika vyakula vingi. Hata hivyo (nadhani kwa kutokana na kuzaliwa wa kiume) sikuwahi kupika chapati. Niliaminishwa mapishi ya chapati yana utaalamu ambao ni binti wa kike, tena waliofundwa vyema, wenye kuuweza.
Na ninakiri, ukimpata binti anayejua kupika chapati laini zenye layers zinazoonekana, basi huyo muoe hahah.
Anyway, leo nilimuomba mke wangu
Evelyn Salt anifundishe mapishi ya chapati. Na huu ni mrejesho wa mapishi yenyewe. Nathibitisha kuwa hajagusa chochote, nimepika kila kitu kutoka mwanzo hadi mwisho, ila maelekezo yote niliyapata kwake. Muda wote alikuwa pembeni akinywa wine...
View attachment 455408
1. Kama kawaida yetu tunaandaa mahitaji yote na kuyaweka mezani kabla ya kuanza mapishi. Hii inakuhakikishia kuwa una kila unachokihitaji kabla hujaanza. Isijetokea ukahitaji mafuta kumbe huna na ulishaanza kupika/kuandaa.
Mahitaji: Unga wa ngano (au kwa nchi za wenzetu wanatumia all-purpose flour), mafuta ya kupikia, chumvi, sukari, maji, bakuli, frying pan (kiswahili?), kikombe na kijiko cha kupimia, brush ya kupakia mafuta, mikono misafi, kibao/meza safi ya kukandia na kile kimbao cha kukandia (sifahamu jinale sanifu).
View attachment 455409
JINSI YA KUANDAA:
2 (a). Anza kwa kutia vijiko vinne vya mafuta ya kupikia kwenye sufuria na kuyapasha moto
2 (b). Kisha pasha maji yako kuwa ya vuguvugu
3. Pima vikombe viwili vya unga kwenye bakuli.
4. Ongeza kijiko kimoja cha chai cha chumvi
5. Ongeza 'pinch' (yaani chukua kwa vidole viwili) ya sukari
6. koroga pamoja mchanganyiko wako kuhakikisha chumvi na sukari vimechanyangika vyema na unga wako.
View attachment 455412
7. Ongeza mafuta yako (vijiko vinne vya mafuta ya kupikia ulivyokwisha kuvichemsha 2 (a)) Kisha uendelee kuuchanganya mchanganyiko wako. Sasa unaweza kutumia mikono kuchanganya mchanganyiko wako. Fanya hivyo kwa dakika mbili hadi tatu. Jitahidi kuhakikisha sehemu kubwa ya unga imeshika mafuta. (mchanganyiko wako utakuwa na vibonge bonge, usihofu)
View attachment 455411
8. Ongeza robo tatu ya kikombe cha maji yale ya vuguvugu (hatua 2 (b)) na kisha uanze kuukanda unga wako. Dakika moja ya mwanzo unaweza kukata tamaa maana unga wako utashikana sana na mikono na chombo chako, usihofu.
9. Ongeza unga kidogo kidogo huku ukiendelea kuukanda unga wako. (kipimo cha kidogo kidogo ni kuchukua unga kwa vidole vyako vyote vitano - vidole, sio mkono). Kwa njia hii hutajikuta umepitiliza kuweka unga mwingi. Endelea kufanya hivi kwa dakika si chini ya tano. Baada ya hapa, unga wako utakuwa umeachana na sufuria na mkono wako.
10. Toa unga wako kutoka kwenye bakuli na uuweke juu ya meza yako safi au tumia kibao cha kukandia (hakikisha usafi wa eneo utakalofanyia kazi). Nyunyiza unga juu ya eneo hilo kisha endelea kuukanda unga wako. Endelea kukanda huku ukinyunyiza unga kila wakati. Fanya hivi kwa dakika zisizopungua 15. Kuwa mwaminifu kwako mwenyewe wakati wa kukanda usifanye tu ili kumaliza dakika 15, ila hakikisha unaukanda vyema.
11. unda mpira/tufe wa mchanganyiko wako na kisha utie ndani ya bakuli lako uliloanzia nalo kuchanganyia.
12. Kwa kutumia brashi yako, paka sehemu ya juu ya tufe lako mafuta kiasi, kisha funika bakuli lako kwa kitu chochote ambacho hakitaruhusu kupitisha hewa. Acha kwa dakika zisizopungua 30.
View attachment 455415
View attachment 455416
13. Baada ya dakika thelathini, toa tufe lako na uligawe katika vitufe vidogo vinne (kutokana na vipimo tulivyotumia).
14. tengeneza mduara kama unataka kupika chapati tayari. kisha upake mafuta kwa kutumia brashi yako. Mafuta kiasi tu.
View attachment 455419
15. Kisha zungurusha kama unatengeneza kijiti (pipe). Baada ya hapo zungurusha tena 'pipe' yako katika mduara kisha kile kisehemu cha mwisho kichomeke chini ya mduara wako kama inavyoonekana kwenye picha ya chini.
View attachment 455420
16. Funika tena na uviache kwa dakika zisizozidi 15.
17. Baada ya hapo tengeneza vitufe vyako kama chapati tayari kwa kupika. (muda wote unapotengeneza chapati zako hakikisha unanyunyizia unga kwenye meza/ubao wako).
18. Tengeneza chapati zako (hakikisha ile iliyokuwa ya kwanza kutengenezwa kwenye namba 15 ndiyo inaanza kutengenezwa/kupikwa) tayari kwa kupika. Jitahidi kutengeneza kuwa mduara.
View attachment 455421
19. Tia frying pan yako kwenye jiko na hakikisha moto wako sio mkubwa (uwe wa wastani, sawa na namba tano kwenye jiko la umeme). Hakikisha pan yako ni kavu na haina mafuta wala majimaji.
View attachment 455422
20. Acha kwa dakika moja kisha geuza chapati yako, ichome kwa dakika moja kisha kwa kutumia brashi yako paka mafuta kwenye sehemu ya juu. Geuza chapat yako na upake tena mafuta sehemu iliyopo juu. Subiri kwa dakika moja kisha geuza tena kwa dakika moja na utoe chapati yako tayari kwa kuliwa.
View attachment 455423
21. Hakikisha unasafisha jiko lako baada ya kupika.
View attachment 455417
Wasalaam wapendwa,
Mentor &
Evelyn Salt.