JUMUIYA ya Wanawake wa Chama Cha Wananchi (CUF) imeomba radhi kwa Katibu Mkuu wa chama hicho, Maalim Seif Sharif Hamad kutokana na kitendo cha kumpinga hadharani na kuangusha vilio baada ya kutolewa kauli ya kutambuliwa Rais Amani Karume.
Kauli hiyo imetolewa jana na Naibu Katibu Mtendaji wa Jumuiya ya Wanawake, Zahra Ali Hamad katika mkutano wa hadhara uliofanyika viwanja vya Demokrasia na kuhudhuriwa na maelfu ya wanawake wa mikoa mitano ya Unguja.
Wiki iliyopita Katibu Mkuu wa chama hicho, aliwaambia wanachama na wapenzi wa CUF kwamba chama chake kimemtambua Rais Karume kuwa rais halali wa Zanzibar jambo kauli amabyo ilipingwa vikali wa wanachama hao na baadhi yao kuangua vilio wakisema Maalim Seif amekisaliti chama chake na hivyo hawakubaliani na uamuzi huo wa kumtambua Rais Karume.
Tunakuomba utusamehe kwa hisia kali tulizozionesha wiki iliyopita katika viwanja hivi hivi. Tulikuwa hatujakuelewa. Sasa tumekuelewa na kutoka kwetu tegemea mashirikiano yasiyo masharti katika hili. Kwako ujumbe wetu ni mmoja tu, nao ni kwamba tulikupenda, tunakupenda na tutaendelea kukupenda maana nawe daima umekuwa ukitupenda! alisema Zahra huku akiungwa mkono wa wanawake wenzake.
Amesema ni jambo la fakhari kuwa wanawake ndio ambao wamekuwa jumuiya ya mwanzo kuuona umuhimu wa maamuzi hayo yaliyofanywa na uongozi za CUF na, hivyo, kuamua kuingia barabarani kuthibitisha uungaji mkono wa kufanya kila lililo ndani ya uwezo wao ambapo dhamira ya pamoja itaweza kutimia.
Kuna ambao wanajiuliza kwa nini wanawake hawa hawa ambao wiki iliyopita kwenye viwanja hivi hivi walilia kwa uchungu na hasira pale Katibu Mkuu wao alipowafahamisha msimamo mpya wa Chama chao wa kumtambua Rais Amani Karume, na leo ndio hawa hawa ambao wanaandamana kumuunga mkono! Ndiyo, tulilia kwa mengi. Kumbukumbu za mateso na madhila, za unyanyasaji na dhuluma, za kupoteza na kudhalilishwa ndani ya nchi yetu wenyewe. Tulilia pia kwa upya wa habari yenyewe na wingi wa maswali ambayo kwa muda ule mchache hayakuwa na majibu. Tulilia tukijiuliza, hivi sasa Habibi Kipenzi Chetu, Maalim Seif Sharif Hamad, anatupeleka wapi mama zake, dada na shangazi zake, binti na wakwe zake? aliuliza Naibu Katibu huyo.
Aliwaambia wajumbe waliohudhuria mkutano huo kwamba wana jawabu kwa kila swali kupata jawabu na fakhari kuwa uongozi wa Chama ulikuwa wa mwanzo kuja hadharani kunyoosha mkono wa ushirikiano, umoja na mshikamano kwa ajili ya Zanzibar, Tanzania, Afrika Mashariki na dunia kwa ujumla.
Tunaona fakhari kwamba sisi sasa ni sehemu ya kuibadilisha nchi hii, na kwa hilo hatuna la kujutia wala hatuna la kupoteza. Wanawake wa Zanzibar hatuna cha kupoteza zaidi ya minyororo ambayo nchi yetu ilikuwa imefungwa kwa zaidi ya miaka 50 sasa! alisema.
Alisema wanawake ndio ambao wamekuwa wakibeba sehemu kubwa ya machungu yanayosababishwa na kufeli kwa mfumo wa siasa za Zanzibar kwa miaka yote hiyo 50. ambapo alisema sio kusudio lao kuwalaumu wanaume, ambao kwa miaka yote hiyo wamekuwa ndio vinara wa siasa zao.
Lakini tunakusudia kusema kwamba sifa zetu za kuwa mama, dada, wazazi na walezi, ndizo zinazotufanya tuumie zaidi pale maafa yanayosababishwa na kufeli kwa siasa zetu yanapotokea Alisema Naibu huyo.
Akikaribishwa katika mkutano huo na kuzungumza kwa ufupi, Katibu Mkuu wa Chama Cha wananchi CUF, Maalim Seif Sharif Hamad alipokea salamu za wanawake hao na kusema kwamba yeye amewasamehe wale wote waliomzomea na kumpinga kwa kuwa awali wengi wao walikuwa hawajafahamu lengo na madhumuni ya tamko hilo la kumtambua Rais Karume.
Mimi kwani nimechukia mlipokuwa mkinizomea mimi nilikuwa nacheka kwa kuwa najua hakuna hata mmoja wenu aliyekuwa ananichukia au ana nia mbaya nami na najua uchungu wa mzazi kwani kauli ile ilikuwa nzito kwani mnafikiri hata sisi tulipokutana ilikuwa ni jambo jepesi huko katika vikao vyetu? Ni jambo zito lakini niwahakikishie wale wanaosema Maalim Seif amechemsha nasema mimi bado injini yangu ipo makini na sijachemsha bado alisema na kuungwa mkono na wanawake hao ambao awali walimpinga vikali.
Maalim Seif alisema wakati mwengine maamuzi mazito yana gharama zake kwa kuwa huku akitoa mfano wa mtoto mgonjwa Kwani unapompa mtoto wako dawa lakini akawa hataki kunywa ile dawa si inakubidi uchukue uamuzi wa kumnywesha kwa nguvu jee utakuwa humpendi mtoto wako au ndio unataka anywe ile dawa ili apone kwa kuwa anaumwa Alisema kwa ufupi Maalim Seif huku sauti zikisikika tumekufahamu na tumekuelewa mwanzo tulikuwa hatujajua sasa tumejua.
Zahra alisema hivi sasa si wakati wa kukumbushana wapi na vipi yaliwapata lakini itoshe kunukulu msemo wa wenzetu Wanyarwanda, ambao baada ya kuangamizana kwenye mauaji ya kutisha ya miaka ya 90, sasa wenyewe wameinuka na kusema NO MORE! Basi tena! hivyo na wanzanzibari waseme kwa pamoja, NO MORE. Basi tena!
Mheshimiwa Mgeni rasmi tunasema basi, basi tena! Basi tena kugawanywa na tugawanyika kwa misingi ya asili zetu. Basi tena kugombanishwa na tukagombana kwa misingi ya vyama vyetu. Basi tena kupiganishwa na tukapigana kutetea itikadi zetu. Basi tena kutishwa na tukaogopana kwa misingi ya visiwa vyetu. Basi tena kumpa nafasi mtu wa kando asimame baina yetu. Basi kwa kila jicho la adui na la hasidi dhidi ya nchi yetu. Basi tena kwa yote hayo, na mengine maovu zaidi ya hayo, dhidi ya nchi yetu alisema huku akishangiriwa na wanawake.
Katika mkutano huo ambao misemo ya watu washuhuri ndio iliyotawala Zahra alisema Sasa, tunachokitaka sisi wanawake wa Zanzibar ni nchi yetu tu. Zanzibar hii ambayo kwa miaka 50 sasa imekuwa ikichinjwa na kukatwa vipande vipande, tuna jukumu leo hii la kuikusanyakusanya na kuileta pamoja. Na tafauti wanavyosema watu kwamba La Kuvunda Halina Ubani, Zanzibar yetu haijavunda. Bado inawezekana kuiunda tena, ikasimama kuchukua nafasi yake iliyokuwa imeshikilia kwa karne kadhaa huko nyuma, yaani kitovu cha elimu, ustaarabu na maendeleo. Na kama alivyokuwa akinadi kampeni zake Barack Obama, ambaye hata babu yake Bwana Onyango Hussein Obama, alipitia Zanzibar na kufaidika na ustaarabu wa watu wa nchi hii, YES WE CAN! Ndiyo, na sisi Wazanzibari tunaweza, na lazima tuweze aliwaeleza wanawake wenzake.
Zahra alisema Kwa viongozi wote wa Zanzibar kutoka pande zote mbili kuu, tupelekee ujumbe wetu kwao kwamba Waingereza husema IT TAKES TWO TANGO, na Waswahili husema kuwa KIDOLE KIMOJA HAKIVUNJI CHAWA. Ikiwa kuna sehemu yoyote duniani ambayo imethibitisha misemo hii ya Wahenga, basi ni Zanzibar. Licha ya viongozi hao kuongoza siasa za nchi hii kwa miaka yote hiyo 50, kwa kuwa kila mmoja alisimama kivyake, basi ndiyo maana Zanzibar imekwama. Kwao ujumbe wetu ni wa wazi, nao ni kwamba HESHIMA YAO KAMA VIONGOZI ITATAFSIRIWA TU KWA KUJITOLEA KWAO KWA AJILI YA ZANZIBAR. Nasi tutawaheshimu kwa kuiheshimu kwao Zanzibar, Wazanzibari na Uzanzibari! alisema.
Kupitia hadhara hii ya leo pia, tunamuomba Katibu Mkuu wetu, Maalim Seif, atufikishie salamu zatu kwa Rais wa Zanzibar, Mhe. Amani Karume. Uongozi wa Chama chetu umetutaka tumtambue kama rais halali wa Zanzibar. Mwanzoni tuliupinga uongozi wetu si kwa kuwa tu hatukufahamu, lakini pia kwa sababu ya kutokuiamini dhamira ya Mhe. Karume na wenzake panapohusika khatima ya Zanzibar. Tumefahamishwa na sasa tunaelekea kufahamu na kwa hivyo, sisi wanawake wa Zanzibar tunamtambua Mhe. Karume kwamba ndiye Rais wetu. Kwamba yeye ndiye mwenye jukumu la kuikoa nchi hii. Lakini tungeomba ujumbe wetu kwake uwe mfupi na wa moja kwa moja, nao ni kwamba sisi mama, dada, binti na wakwe zako wa zanzibar tunakupa imani yetu, tafadhali usije ukaibwaga chini! alimalizia Kiongozi huyo.
Wanawake hao walisema wenzao wa Tanzania Bara, katika wakati kama huu ambapo Wazanzibari wanatafuta njia za kuwaleta pamoja, wao ni ndugu ambao msaada wao unahitajika. Zanzibar iliyo pamoja na inayoshirikiana ina maslahi zaidi kuwa nayo kwenye Muungano kuliko Zanzibar iliyogawika. Zanzibar imara ni kwa Muungano imara na Zanzibar dhaifu ni kwa Muungano dhaifu. Kwa hivyo, watu wa Tanzania bara ni ndugu wa damu damu wawe ni sehemu ya utatuzi wa matatizo na wasiwe sehemu ya tatizo ambapo wamesema ujumbe weo kwao ni mfupi nao ni kwamba Udugu Ni Kufaana, Udugu Si Kufanana!
Salamu zetu za mwisho, lakini za muhimu na za lazima ziende kwa Wazanzibari wote walio ndani na nje ya nchi. Tunakuomba Mgeni Rasmi pamoja na viongozi wenzako wote, popote mutakapokutana nao, muwape ujumbe wa wanawake wa Zanzibar kwamba milango ya nchi yao inafunguka. Ombi letu kwao ni kuwa tushirikiane ili kuhakikisha kuwa hivyo vinavyoingia ndani wakati milango hii ikifunguka, ndivyo vile vyenye kheri kwa nchi yetu. Kwa pamoja tuwe mawakala wa kuibadilisha Zanzibar na sio mawakala wa kuibakisha Zanzibar hapa ilipo au kuirudisha nyuma zaidi. TUSHIRIKIANE KUIJENGA ZANZIBAR MPYA alisema Zahra katika mkutano huo amabo ulitanguliwa na maandamano makubwa ya wanawake.
Kwa Mwenyekiti wa Chama chetu, Profesa Ibrahim Haruna Lipumba, tuna wingi wa shukrani na heshima ya hali ya juu. Ni unahodha wake imara kwa Chombo chetu ndio ambao umetuwezesha kuvuuka dhoruba na mawimbi ya kutisha katika safari yetu. Prof. Lipumba amekuwa akithibitisha uprofesa wake na kila mmoja wetu ni shahidi ya vile anavyolitimiza jukumu lake la kuwa kiongozi kwetu. Tunampongeza sana kwa kulisimamia hili hasa la kuwaona ndugu zake Wazanzibari wanakuwa kitu kimoja na kwa kujitolea kwake daima kwa ajili ya Chama na nchi yetu. Ushindi wa karibuni katika uchaguzi wa Serikali za Mitaa huko Tanzania Bara usingelipatikana ikiwa si uimara wa uongozi wake alimsifu Mwneyekiti wao.
Kwa upande wa Katibu Mkuu wao walisema Kwa Katibu Mkuu wa Chama chetu, Kipenzi chetu, Maalim Seif Sharif Hamad, ambaye Chama kilikupa jukumu zito la kuja hadharani kutangaza msimamo mpya kwa maslahi ya nchi yetu, tunakwambia kwamba sisi wanawake wa Zanzibar tuko pamoja nawe. Tuko pamoja na uongozi wa Chama chetu katika kuizamua Zanzibar kutoka miaka 50 ya siasa za mgawanyiko ambazo hazijawahi kuwa na faida kwa yeyote kati yetu alisema Zahra ambaye pia ni mwakilishi wa viti maalumu vya wanawake.
Makamu Mwenyekiti wa CUF, Machano Khamis Ali ambaye alikuwa mgeni rasmi katika shughuli hiyo aliwaambia wanawake hao kwamba wasiwe na wasi wasi na kiongozi wao kwani Maalim Seif ameahidi kuwatumikia wazanzibari zaidi ya miaka 20 iliyopita hivyo sio rahisi kuwageuka au kuwasaliti kama wengi wanavyodhania.
Msiwe na khofu na Maalim Seif nyinyi hamumjui lakini sisi tunayemjua hatupati tabu ngoja nikwambieni kwamba Maalim Seif aliahidi tokea miaka hiyo akiwa anafanya kazi katika ofisi ya waziri kiongozi alisema atawatetea wazanzibari akiwa ndani ya serikali au nje ya serikali akiwa ndani ya chama au nje ya chama na wakati huo alikuwa CCM na sisi sote tulikuwa ni CCM na pia aliwaahidi wazanzibari kuwa atawatetea kwa njia yoyote akiwa ndani ya Zanzibar au nje ya Zanzibar kwa hivyo huyo ndio Maalim Seif hawezi hata siku moja kuwasaliti wazanzibari ahadi yake bado hajaitumiza kwa nini tena awasaliti? Alihoji Makamu huyo huku akishangiriwa na mashabiki wa chama hicho.
SOURCE:ZANZIBAR YETU WEB BLOG
n.b, Msisitizo ni wangu
