Tarehe mosi Julai 2021, Chama cha Kikomunisti Cha China CPC kiliadhimisha miaka 100 tangu kianzishwe.
Katika hafla kubwa ya kuadhimisha karne moja, Rais wa China Xi Jinping ambaye pia ni Katibu wa Kamati Kuu ya CPC alitangaza kuwa China imetimiza lengo la kwanza la karne la kujenga jamii yenye ustawi wa wastani katika pande zote.
Kupitia kwa uongozi mahiri wa CPC, ndani ya miaka hiyo mia moja China sasa imekuwa nchi yenye uchumi wa pili kwa ukubwa duniani, mpokeaji mkubwa wa uwekezaji wa moja kwa moja wa kigeni, na moja ya soko kubwa zaidi la watumiaji duniani.
Aidha takwimu zinaonesha kuwa Pato lake la taifa yaani GDP limezidi yuan trilioni 100- (sawa na dola za kimarekani trilioni 15.47).
Kwa watu waliozaliwa katika miaka ya 60 na wale waliozaliwa kwenye miaka ya 90 nchini China, wote wana hadithi tofauti kuhusu mabadiliko ya kiuchumi na kijamii.
Waliozaliwa katika miaka ya 60 walishuhudia hali ngumu ya maisha na udhaifu wa Uchumi wa China, lakini ndani ya kizazi kimoja tu, yaani tangu kuanza kutekelezwa kwa sera ya mageuzi ya kiuchumi na kufungua milango mwaka 1978, China imebadilika na kuwa nchi yenye nguvu, na imefanikiwa kushughulikia changamoto kubwa, pamoja na kukidhi mahitaji ya kimsingi ya idadi kubwa ya watu wake.
Kwa mujibu wa takwimu za benki ya dunia, mwaka 1960 China ilikuwa maskini kuliko baadhi ya nchi barani Afrika. Kwa mfano mwaka 1960, mgao wa pato la kitaifa kwa China ulikuwa dola 89 tu, wakati DR. Congo ulikuwa dola 220, Kenya dola 97, Afrika Kusini 433 na Ghana 183. Lakini ilipofika mwaka 2017 mgao huo kwa China ulikuwa umefikia dola 8,827, huku Kenya ikiwa na dola 1,507, Ghana 1,641, Afrika Kusini 1,615.
Abbas Zaki, mwanachama wa kamati kuu ya chama cha Palestina cha Fatah anayesimamia uhusiano na China na nchi za Kiarabu, ametembelea China kwa zaidi ya mara 10 tangu safari ya kwanza mnamo 1974, alibaini kuwa katika kizazi kimoja tu, China imefanikiwa kuwaondoa watu wote kutoka kwa umaskini uliokithiri.
Anasema vijiji vilivyokuwa maskini vimebadilishwa na kuwa na tija, na maeneo mengi ambayo yalikuwa nyuma kimaendeleo sasa yamefurika viwanda.
Naye katibu mkuu wa Jumuiya ya muungano wa Urafiki wa Wabunge wa China na Japan yaani Sino-Japan Shoichi Kondo, anasema alienda kusomea China mwaka 1981 na sasa miaka 40 baadaye anaona China imekua kwa kasi ya kushangaza na kufanya miujiza chini ya uongozi wa Chama cha Kikomunisti cha China.
Muujiza wa Kiuchumi umefanikishwa na mipango kababe ya miaka mitano
Mpango wa maendeleo wa miaka mitano ni moja ya sababu kuu ya kufanikisha muujiza wa ukuaji wa kiuchumi wa China. Mkurugenzi wa Kituo cha Mafunzo ya Afrika na China katika Chuo Kikuu cha Johannesburg, David Monyae anautaja mfumo huo kuwa wa kuaminika katika kuzingatia na kutabiri jinsi uchumi unavyokua na ni marekebisho gani muhimu ambayo yanahitajika kufanywa.
Tangu kuanzishwa kwake katika miaka ya 1950, kumekuwa na mipango 14 ya miaka mitano (FYP) – na kila moja inaashiria mabadiliko makubwa katika sera za uchumi za China na maendeleo ya kijamii na kiuchumi.
Siku hizi mfumo huo wa China umekuwa sera inayofuatiliwa kwa karibu ulimwenguni kote kwani inatoa mwangaza wa sera za uchumi na malengo ya maendeleo ya China.
Mwaka huu, FYP ya 14 inayoishia 2025 imewekwa kwa kuzingatia kufikia malengo ya miaka mingine 100 ijayo ikiwemo kujenga nguvu ya kisasa ya ujamaa ifikapo 2049 wakati Jamhuri ya watu wa China itakapotimiza miaka 100.
Sera ya Ufunguzi
Nguzo nyingine muhimu kwenye uongozi wa CPC katika kufanikisha malengo yake ya kiuchumi ni kutekeleza sera za ufunguzi.
Mkutano wa tatu muhimu wa Kamati Kuu ya 11 ya CPC mnamo Desemba 1978 ulikuwa mwanzo wa safari ya kiuchumi ya China ya miaka 40 na zaidi ya mabadiliko na ufunguzi, na pia ulikuwa ni mwanzo mpya wa kazi za Chama ambazo ni ujenzi wa uchumi.
Sera ya kufungua milango kimsingi inamaanisha kukaribisha wawezekaji wa kigeni nchini China na ilitangazwa na kiongozi wa CPC wa wakati huo Deng Xiaoping. Matunda yake yameonekana ndani ya miaka 40 iliopita na mwaka 2020 China iliipiku Marekani na kuwa nchi inayovutia zaidi uwekezaji wa wa moja kwa moja wa kigeni.