Mara baada ya mwafaka kati ya Karume na Seif kumekuwa na kauli mbali mbali zinazojichanganya kuhusu Karume kugombea tena au kuongezewa muda ili "alee" makubaliano yake na Seif! Hilo ni jambo jema sana kwa mustakabali wa visiwa hivyo. Hata hivyo kumekuwa na kauli zinazotaka kuwa mambo ya Zanzibar yasiingiliwe, waachiwe wenyewe, watayamaliza. Mimi kwa upande wangu niko tofauti na kauli hizo. Kwa kuwa Zanzibar ni sehemu ya Jamhuri ya Muungano wa Tanzania kama Ibara ya 1 ya Katiba ya Zanzibar, 1984 inavyosema na kwa kuwa suala la Ulinzi na Usalama ni la Jamhuri ya Muungano wa Tanzania, ipo haja ya kujua na kutoa maoni kwa kile kinachoendelea huko, si kwa kuwalazimisha wafanye tunayotaka bali kutoa maoni kama wafanyavyo observers wengine kwenye masuala mbalimbali! Mbona Jumuiya ya Kimataifa na hata JK mwenyewe alitoa pongezi kwa mwafaka wa Seif na Karume? Hizo pongezi sio maoni kwamba mlichokifanya ni kizuri? Mbona hatukusikia malalamiko kwamba tunaingiliwa? Hakuna anayependa Wazanzibari wauane au kuchukiana. Ndio maana Wazanzibari wengi wanaishi Tanzania Bara na hakuna anayewabughudhi wala kuwachukia! Wazanzibari wengine wameajiriwa kwenye Taasisi ambazo si za Muungano na wanaishi vizuri na Wabara. Sijazungumzia wale ambao wameoana na Wabara na hakuna unyanyapaa wowote! Sasa hizi kauli za akina Seif anapodai kuwa "kajitu toka Bara" (akimaanisha Katibu Mkuu wa CCM, Yusuf Makamba) kuhoji mambo ya Zanzibar hazionyeshi nia njema na zinawafanya watu kuanza kuhoji kulikoni! Kwani hakuna lugha ya kistaarabu ya kutamka, hata kama kweli Wazanzibari wameingiliwa? Hizi ni kauli za "kusahau yaliyopita na kujenga mapya" kweli? Hapa watu wataendelea kuhoji maana Seif mwenyewe ndiye anayejenga mazingira hayo ya "kutaka kuhojiwa!" Otherwise, mimi naona kuwa maamuzi ya kuwa na uchaguzi au la wanayo Wazanzibari wenyewe hata kama watu hawatapenda, ila wasikilize maoni ya watu wengine, ndio maana ya demokrasia, si kutoa kauli za chuki, hakutajenga, kutabomoa!