Mwanaharakati na mtetezi wa haki za binadamu Collins Otieno amepatikana baada ya kuripotiwa kutoweka.
Kwa mujibu wa mtetezi wa haki za binadamu Hussein Khalid, Otieno alipatikana mapema Jumamosi asubuhi kando ya barabara ya Thika akiwa katika hali dhaifu na mwenye majeraha.
Khalid alisema Otieno aligunduliwa majira ya saa 10:30 alfajiri na mwendesha boda boda ambaye alimpeleka hospitalini kwa matibabu. Kwa sasa anapatiwa matibabu katika Neema Uhai Hospital, Kasarani.
Tukio hilo limetokea siku moja baada ya mwanaharakati mwingine, Boniface Mulinge Muteti, kupatikana eneo la Lukenya, Kaunti ya Machakos, baada ya kuripotiwa kutoweka.
Otieno alikuwa miongoni mwa wanaharakati waliokamatwa Nairobi CBD Jumatatu wakati wa maandamano yaliyohusishwa na kuendelea kuzuiliwa kwa kiongozi wa upinzani wa Uganda, Kizza Besigye.
Kwa mujibu wa taarifa kutoka kwa watetezi wa haki za binadamu, Otieno alikuwa akijaribu kufuatilia alikokuwa Muteti wakati naye aliripotiwa kutoweka.
Kesi hizo mbili zimeibua wasiwasi miongoni mwa mashirika ya kiraia na watetezi wa haki za binadamu, ambao wameendelea kutaka uchunguzi ufanyike ili kubaini mazingira yaliyosababisha kutoweka na kupatikana kwa wanaharakati hao.
Source: Thestar.co.ke