Ombi la Msamaha kwa Serikali ya Jamhuri ya Muungano wa Tanzania kuhusu Mheshimiwa Tundu Lissu
Kwa Serikali ya Jamhuri ya Muungano wa Tanzania,
Kwa heshima na taadhima kubwa, napenda kutoa ombi langu la dhati kwa Serikali kuzingatia kumsamehe au kumwachilia kwa dhamana Mheshimiwa Tundu Lissu, Mwenyekiti wa Chama cha Demokrasia na Maendeleo (CHADEMA) Taifa, ambaye kwa sasa anakabiliwa na kesi ya uhaini na amekuwa mahabusu kwa siku 112 hadi kufikia Julai 30, 2025.
Ni wazi kuwa Mheshimiwa Lissu amepitia mateso makubwa kiafya kutokana na shambulio la risasi alilowahi kukumbana nalo, na kwa sasa bado yupo katika hali ya kiafya inayohitaji uangalizi maalum na matumizi ya dawa za muda mrefu.
Kwa kuzingatia hali hiyo, na kwa kutambua kuwa kauli zake huenda zilikuwa ni sehemu ya mijadala ya kisiasa ambayo mara nyingi hujaa misisimko na jazba — jambo la kawaida katika demokrasia yoyote iliyo huru — naomba Serikali isimwangalie kama tishio la kweli kwa usalama wa taifa.
Tundu Lissu ni mtumishi wa wananchi, mwanasheria na aliyewahi kuwa Mbunge, ambaye licha ya tofauti za kisiasa, bado ni sehemu ya taifa letu. Taifa letu lina historia ya huruma, haki, maridhiano na kusameheana, na kwa msingi huo nawaomba viongozi wetu waangalie jambo hili kwa jicho la utu na busara.
Kwa kumsamehe au kumwachilia kwa dhamana, Serikali haitakuwa dhaifu, bali itaonesha nguvu ya kidemokrasia, utu na utayari wa kujenga Tanzania ya maridhiano, haki na mshikamano.
Naamini hatua hii itakuwa ujumbe wa matumaini, kuponya majeraha ya kisiasa, na kujenga taifa lenye umoja.
Kwa heshima kubwa na matumaini mema,
Fredrick odiawo agalla
Raia wa Tanzania
Rafiki wa Tanzania na Mpenda Haki
