Ofisi ya ya Serikali ya 'HUDUMA PAMOJA CENTER' haina jenereta? Umeme ukikatika huduma zinasimama

[DogoWaNjombe]

Katika kuhakikisha wananchi wanapatiwa huduma za haraka bila usumbufu hasa kuepuka kutumia muda mwingi kwenye ofisi za umma, Serikali iliamua kuanzisha Kituo jumuishi cha huduma (HUDUMA PAMOJA CENTER) ambacho kina ofisi za taasisi mbalimbali za Serikali eneo moja.

Miongoni mwa ofisi zinazotoa huduma zilizopo kwenye kituo hicho kilichopo Posta Jijini Dar es salaam ni pamoja na ofisi za TRA, PSSSF, NSSF, Uhamiaji,NIDA, RITA,, BRELA, Polisi, na NHIF.

Licha ya kituo hicho kuwa na umuhimu kwa wananchi na wadau mbalimbali katika kuharakisha huduma upatikanaji wa huduma lakini kumekuwepo na changamoto ambayo inashangaza kuona mamlaka zinachelewa kuiona na kuitafutia ufumbuzi wa haraka ili kuondoa usumbufu na kuongeza maana halisi ya kituo hicho, ambacho sifa yake kuu inaonekana ni kurahisisha upatikanaji wa huduma.

Kwa mara kadha nimefika eneo hilo, jambo nililobaini kama changamoto ni kwamba inapotokea umeme umekatik ofisi hizo zinaacha kufanya kazi na Watumishi wanaondoka kabisa kwenye ofisi hizo huku wananchi wakikaa muda mrefu kungojea huduma mpaka umeme unaporejea ndipo huduma zinaendelea.

Katika mazingira ya aina hiyo inafanya wananchi kukaa muda mrefu eneo hilo jambo ambalo linafifisha mantiki halisi ya kituo hicho, mfano kuna siku nyingine tumewai kukaa masaa zaidi ya matatu umeme ukiwa umekatika, hii imekuwa kero karibia kila siku.

Umeme ukikatika hata vifaa vyao vya kieletroniki vinazimika hadi kompyuta, ukitaka kufahamu jambo lolote ambalo linahitaji kutumia kompyuta wahusika wanasema 'utarudi badae au ukae usubirie mpaka umeme ukirejea'', jambo hili limekuwa kero sana.

Katika kuzingatia umuhimu wa kituo hicho ambacho kimekuwa msaada , natoa wito kwa mamlaka kukiwezesha kituo hicho kuwa na miundombinu mbadala ya umeme (jenereta) ili umeme unapokatika huduma zisikwame, lakini pia kuwezesha uwepo wa vifaa vya kisasa hususani kompyuta ambazo zinaweza kuendelea kutumika kwa muda hata umeme unapokatika.