Hili sakata la ardhi ya Bagamoyo ya hekari elfu sita kuwa ni mali ya Zanzibar lina ukakasi na halifai kupita bila ya kupata mawazo mbalimbali yenye lengo la kuboresha uelewa mpana wa raia wa Jamhuri ya Muungano wa Tanzania.
Ni kweli Mwalimu Nyerere aliwapa Zanzibar ardhi ya Bagamoyo ili waweze kulima miaka hiyo ya sabini, hilo halina ubishi. Na pia ni kweli hayati Rais Magufuli akaja kuwapa wawekezaji wa Azam ardhi hiyo hiyo ili wafanye shughuli zao halali.
Kumuona Charles Hillary akipiga mkwara kwamba ardhi hiyo ni mali halali ya Zanzibar ndio kinapokuja kichekesho chenyewe.
Cession ni mchakato ambao sehemu ya ardhi ya nchi moja inatolewa rasmi na kuwa ni mali ya nchi nyingine, zipo sababu nyingi zenye kuyafikia maamuzi hayo.
Kwa kiswahili tunaita KUKOMA, yaani ardhi hiyo inakoma kuendelea kutumiwa na wakazi wa nchi husika inakuwa ni sehemu halali ya nchi nyingine na kiutaratibu inawekwa bandera ya nchi iliyoichukua kuanzia siku hiyo inapokoma kuwa ni mali ya nchi inapopatikana ardhi hiyo.
Je tangu miaka hiyo ya sabini kuna bendera yoyote inayopepea hapo Makurunge Bagamoyo kuonyesha kukoma kutumika kwa kipande hicho cha ardhi?, haijawahi kuwekwa bendera ya Zanzibar kuonyesha kuwa sehemu hiyo imekoma kuwa ni mali ya Tanzania, kiutaratibu bado ukubwa wa nchi ni ule ule unaotambulika kisheria tangu Tanzania ianze kuwa nchi kamili mwaka sitini na nne.
Hayati Rais Magufuli alikuwa na haki kabisa kumpatia muwekezaji Bakhresa sehemu ya ardhi iliyo chini yake kwa mujibu wa katiba. Kitendo cha Rais Mwinyi kuja na agizo la kufukuza waliopo katika ardhi hiyo wakati mchakato wa Cession haukuwahi kufanyika ni kosa la kiufundi la serikali anayoiongoza.
Naona kama wenye mamlaka ya kumshauri Rais Samia wameamua kutulia kwanza kutazama upepo wa huko juu utapita vipi. Wameliona hili kosa la kiufundi na nahisi ni suala litakalomalizwa kimya kimya tofauti na ule mkwara wa Charles Hillary alioutoa mbele ya media kule visiwani Unguja.
Mchakato wa Cession haukufanyika na hakuna bendera mahali pale yenye kuonyesha kuwa eneo limeshamilikishwa moja kwa moja kwa serikali ya Mapinduzi Zanzibar. Hayati Magufuli alikuwa na haki zote kuligawa eneo hilo na pengine sababu za Mwalimu Nyerere kuwapa serikali ya Mapinduzi miaka hiyo ya sabini hazikuwa na mashiko ya muda mrefu, zilikuwa ni temporary measures.
Rais wa awamu ya nane Zanzibar na washauri wake wamechemka katika suala hili, warudi nyuma na wajipange upya kabla ya kutoka hewani na matamko yenye kuzua maswali mengi yenye utata ndani yake.
THE LAND WAS NOT CEDED TO ZANZIBAR BUT GIVEN FOR USE BUT STILL UNDER TANGANYIKA.