Waziri wa Mambo ya Ndani, George Simbachawene amesema maandamano yasiyo ya kikomo yaliyopangwa kufanyika kuanzia kesho December 09,2025 hayana kibali na ni haramu huku akisema kama yale ya October 29 yalisababisha Watu kufariki na hasara nyingine kubwa na haya ya kesho yanasemwa yatakuwa makubwa zaidi ya yale basi kwa hakika hayo ni mapinduzi na sio tu maandamano.
Akiongea leo December 08,2025, Simbachawene amesema “Hali ya usalama wa nchi yetu mpaka sasa ni shwari inaendelea kuimarika baada ya shida tuliyoipata October 29 na vurugu zikatokea, hasara nyingi zikatokea, mali zikaharibika, Watu wakafariki, shida ambayo nisingependa itokee tena maana hasara yake mpaka sasa tunaumia nayo, nitoe pole kwa walioathirika na jambo hilo”
“Nawashukuru Viongozi wetu wa Dini bila kuwataja, kwa nyakati tofauti wametoa kauli za kutia moyo na kufundisha Waumini wao juu ya amani katika Taifa, wamefanya kazi nzuri kulituliza Taifa, December 03 Polisi walitoa taarifa ya tukio jingine linalohamasisha na Wanaharakati mbalimbali wasioitakia mema nchi yetu kwamba kesho December 09 kuna Watu wamehamasisha maandamano yasiyokuwa na ukomo”
“Maandamano hayaonekani yameombwa na nani? kwa utaratibu gani?, maandamano yanayoruhusiwa na Katiba yetu ni yale yanayoombwa na Watu mahususi na yanakuwa na ujumbe mahususi, yanaeleza yatafanyika wapi na yatatoka wapi hadi wapi ili Polisi wawe na taarifa, haya December 09 tunaambiwa ni makubwa kuliko ya October 29 yaliyosababisha Watu wakafa, sasa haya tunayoambiwa makubwa kuliko yale hayo sio maandamano hayo ni mapinduzi”
“Maandamano hayo ni haramu, hayaruhusiwi, wale ambao wanashabikia, wanaona wameichoka amani, tuwaombe sana maandamano hayo hayakubaliki kwahiyo Vyombo vyetu vya usalama vitayadhibiti, tunawaomba Wananchi wasiohusika na mpango huo kutoshabikia iwe mtandaoni au kujitokeza kwenda kuangalia au kuchungulia tu wanachokifanya, Wananchi wasithubutu kujitokeza maana maandamano haya ni haramu”
