Andrew Chenge
Muhariri Michael Bahati
KAMA Tanzania ingekuwa ni nchi inayofuata maadili ya ukweli ya uongozi, Mtemi Andrew Chenge, ama angekuwa nje ya Bunge la Tanzania au, nikitazama mbali zaidi, pengine angekuwa amefungwa jela. Ndiyo sababu nimepatwa na mshituko wa mwaka baada ya kusikia kwamba Mbunge huyu wa Bariadi Mashariki kupitia Chama Cha Mapinduzi (CCM), anatajwa kuwania nafasi ya Spika wa Bunge la Katiba lililoanza wiki hii. Hakuna shaka kwamba Andrew Chenge ni msomi wa kiwango kizuri tu katika taaluma ya sheria. Nilikuwa nafuatilia Bunge la Tanzania wakati yeye akiwa
Mwanasheria Mkuu wa Serikali (AG) kwa miaka 10 ya rais Benjamin Mkapa, na bungeni alikuwa mahiri kwa ufafanuzi wa miswada mbalimbali. Wakati nafasi yake ilipochukuliwa na Johnson Mwanyika, niliona wazi Serikali ilikuwa imepata pengo bungeni. Mwanyika mara nyingi alionyesha uso na haiba ya kiongozi asiyejiamini na kitaaluma alionyesha yuko nyuma ya Chenge. Hata Jaji Frederick Werema ambaye anashika nafasi ya AG kwa sasa, naye amekosa ushawishi
kama aliokuwa nao Chenge bungeni. Kimsingi, sina tatizo kabisa na usomi wa mbunge huyu. Tatizo langu kubwa na Chenge ni kwenye uadilifu. Naamini kwamba Katiba ni kitu kilicho kitakatifu na kama kweli Watanzania wanaamini katika utukufu wa Katiba, Chenge hawezi hata kufikiriwa kuwa Spika atayeongoza mchakato huo. Kumpa Chenge uspika wa Bunge hilo ni sawa na kuharibu mchakato mzima wa kutayarisha Katiba mpya. Kwa wasiofahamu vizuri
kuhusu mwanasiasa huyu, Chenge ndiye aliyekuwa Mwanasheria Mkuu wa Serikali wakati wa utawala wa Mkapa. Yeye ndiye aliyeishauri serikali kuingia katika mikataba ya madini ambayo tunailalamikia leo, ununuzi wa rada mbovu na ununuzi wa ndege ya rais ambayo ilipigiwa kelele nchi nzima. Wakati wake, kulikuwa na fununu nyingi zikimtaja kunufaika na kila mikataba mibovu na isiyo na maslahi ambayo serikali yetu iliingia kwenye eneo la rasilimali zetu.
Ukweli uliibuka wazi wakati serikali ya Uingereza ilipojitosa kuchunguza kuhusu sakata la rada. Serikali ya Tanzania, kwa ushauri wa Chenge na ilinunua rada hiyo ya mtumba kwa bei inayokaribia mara nne ya bei yake ya soko. Kwa mujibu wa serikali ya Uingereza, Chenge alikuwa na kesi ya kujibu kwenye mauzo ya rada hiyo kutokana na kukosekana kwa maelezo ya kina ya ununuzi huo. Huo ndio wakati ambao Chenge alipachikwa jina la Mzee wa
Vijisenti baada ya kubainika kuwa na zaidi ya shilingi bilioni moja za Kitanzania katika mojawapo ya akaunti zake za nje ya nchi zilizo katika Visiwa vya Jersey. Hebu tujiulize swali moja; katika hali ya kawaida, inawezekanaje kwa mtumishi wa serikali ya Tanzania kuwa na akaunti yenye thamani ya shilingi bilioni moja na bado akawa jasiri wa kuita kiwango hicho cha fedha vijisenti? Kwa sababu za wazi kabisa, Chenge hajachukuliwa hatua yoyote na serikali ya
Tanzania hadi sasa. Anakula kuku kwa mrija na imefikia wakati sasa watu wanamuona kuwa anafaa kuwa Spika wa Bunge la Katiba?! Itafikia wakati, wengine watasema anafaa hata kuwa Rais wa Tanzania?! Nimesikia majina mengine yakitajwa kuwania wadhifa huo wa Spika na sina matatizo nao isipokuwa jina la huyu Chenge. Kama Chenge atachukua fomu na hatimaye kuwania nafasi hiyo na kisha kushinda, huo utakuwa mwisho wangu wa kufuatilia kutazama Bunge
hilo. Nitatazamaje Bunge hilo na kulifuatilia ilhali anayeliongoza ana tuhuma ambazo hajazikanusha hadi leo? Nani kawahi kumsikia Chenge akisema ni wapi alipozipata fedha zile? Nimekuwa nikisoma kitabu cha Power, Politics and Death cha aliyekuwa Msemaji wa Serikali ya Nigeria, Olusegun Adeniyi, kinachozungumzia maisha ndani ya serikali ya marehemu Rais Umaru Mussa YarAdua. Miongoni mwa watu wanaotajwa sana katika kitabu hicho ni waziri wa sheria na mwanasheria mkuu wa Serikali ya Shirikisho la Nigeria, Michael Kaase Aondoakaa. Huyu bwana alikuwa
mwanasheria mahiri sana lakini tatizo lake alikuwa kibaraka wa mafisadi. Huyu ndiye aliyefanikisha kuachiwa huru kwa Gavana Fisadi wa Jimbo la Delta, James Ibori. Si huyo pekee lakini enzi yake bwana huyu Aondoakaa, Nigeria iliingia katika mikataba tata na kufanya maamuzi tata kuhusu ufisadi na mafisadi. Ni huyuhuyu ndiye aliyefanya kazi ya Mkuu wa Taasisi ya Kupambana na Rushwa ya Nigeria, Nuhu Ribadu, iote nyasi na akaishi maisha magumu kwa sababu ya kutaka kupambana na rushwa. Kwangu, sioni tofauti kubwa kati ya Chenge na Aondoakaa. Majirani zetu
hawatatuelewa endapo watamsikia Chenge akiwa ndiye Spika wa Bunge la Katiba. Serikali ya Uingereza itatushangaa endapo tutamchagua Chenge kwenye shughuli hii. Kazi ya kutengeneza Rasimu ya Katiba ilifanywa na watu ambao wana sifa ya usafi kwenye jamii ya Watanzania. Ndiyo maana Mwenyekiti wake alikuwa Jaji Joseph Warioba, akiwa anasikindikizwa na watu kama Profesa Mwesiga Baregu, Profesa Palamagamba Kabudi, Dk. Salim Ahmed Salim na
wengineo. Ombi langu kwa wajumbe wa Bunge la Katiba ni kwamba wasiharibu kazi hii ya kukumbukwa ya tume hii kwa kumpa Chenge fursa ya kutia mguu wake. Kama Baba wa Taifa, Mwalimu Julius Nyerere, alivyopata kusema katika siku za nyuma; Katiba ni Kitu Kitakatifu na Hakitakiwi Kuchezewachezewa. - See more at:
Raia Mwema - Spika Chenge, tumekwisha
