Katika kufanya hivi msomaji wa historia hii atakutana na nyaraka za Kleist Sykes zinazoeleza hali ya siasa katika Tanganyika katika miaka ya 1920. Mwanafunzi atasoma nini kiliwapelekea wazalendo wa Dar es Salaam waliozaliwa enzi za utawala wa Kijerumani kuasisi African Association mwaka 1929, Kleist akiwa katibu muasisi na nini kilipelekea yeye tena Kleist na rais wake katika African Association, Mzee bin Sudi kuasisi Al Jamiatul Islamiyya fi Tanganyika (Umoja wa Waislam wa Tanganyika) mwaka wa 1933 na ilikuwaje ikawa viongozi na wanachama wa vyama hivi viwili ndiyo walikuja kuasisi TANU mwaka 1954 na kuongoza harakati za kupigania uhuru. Hii ni moja ya ukweli ambao unawatisha na kuwakera baadhi ya watu na hasa viongozi wetu wa sasa ambao hawakunyanyukia na TANU. Katika maelezo haya mwanafunzi wa historia atakutana na historia nyingine kabisa ya Wazulu, Wanubi na Wamanyema walioingizwa nchini na Wajerumani kama askari mamluki. Watoto wa askari hawa kama Kleist Sykes, Ibrahim Hamisi, Mzee bin Sudi, Thomas Plantan, Schneider Plantan, Ramadhani Plantan ndiyo waliokuja kuwasha moto wa ukombozi wa Tanganyika na baadhi yao walishuhudia uhuru wa Tanganyika mwaka 1961. Pamoja na hawa kuna watu kama Mufti Sheikh Hassan bin Amir, Hamza Mwapachu, Dr Michael Lugazia, Dr Vedasto Kyaruzi, Sheikh Suleiman Takadir, Iddi Faizi Mafongo, Said Chamwenyewe, Iddi Tosiri, Japhet Kirilo na Earl Seaton na wengineo wengi. Kwa ufupi wa maneno ni kuwa hawa niliowataja kila mmoja wao ana mchango mkubwa katika kupigania uhuru Tanganyika hata kabla hawajasikia jina la Nyerere.