Uzi maalum wa kupeana Likes: Comment chochote upate "Like"

Man United (Raundi ya 16 bora, 2018/19)

Msimu huu kwenye Ligi ya Mabingwa Ulaya, Manchester United ilifanya maajabu yake ya kupindua matokeo kwenye hatua ya 16 bora, baada ya kupigwa 2-0 PSG uwanjani Old Trafford na kwenda kushinda 3-1 ugenini. PSG ilionekana kama imemaliza kazi kwa ushindi wa ugenini, lakini mabao ya Romelu Lukaku na Marcus Rashford yalipindua matokeo na Man United kushinda 3-1, hivyo ilisonga mbele kwa mabao mengi ugenini baada ya matokeo ya jumla kuwa 3-3.
 
Barcelona (Robo fainali, 1999/2000)

Robo fainali ya Ligi ya Mabingwa Ulaya msimu wa 1999/2000 kulitokea maajabu mengi, wakati Barcelona ilipopindua matokeo mbele ya Chelsea. Katika msimu huo, mechi ya kwanza iliyopigwa Stamford Bridge, Barcelona alichapwa 3-1 na kwenda kupindua matokeo Nou Camp kwa kushinda 5-1, huku mechi hiyo ikichezwa kwa dakika 120. Usiku huo mabao ya Barca yalifungwa na Rivaldo mawili, Luis Figo, Dani Garcia na Patrick Kluivert.
 
Monaco (Robo fainali, 2003/04)

Mabingwa wa Kihistoria, Real Madrid yameshawahi kuwakuta makubwa kwenye Ligi ya Mabingwa Ulaya. Ilikuwa robo fainali msimu wa 2003/04, ambapo Los Blancos waliichapa Monaco 4-2 uwanjani Bernabeu na kuona kama mambo yamekwisha. Lakini, walipokwenda Monaco yaliwakuta makubwa, walichapwa 3-1 shukrani kwa mabao ya Ludovic Giuly mara mbili na Fernando Morientes na hivyo kutimia maajabu hayo kwenye michuano hiyo ya Mabingwa Ulaya.
 
Chelsea (Raundi ya 16 bora, 2011/12

Kwenye msimu wa 2011/12 mambo yalionekana kama yangekuwa magumu kwa Chelsea, baada ya kwenda kuchapwa 3-1 huko Italia na wababe Napoli. Hiyo ilikuwa mechi ya mtoano ya raundi ya 16 bora. Lakini, mambo yaliyokwenda kutokea Stamford Bridge ni balaa, Chelsea ilipiga mtu 4-1 na kusonga mbele huku mechi hiyo ikichezwa kwa dakika 120. Mabao ya Chelsea yalifungwa na Branislav Ivanovic, Frank Lampard, John Terry na straika Didier Drogba.
 
Barcelona (Raundi ya 16 bora, 2012/13)

Barcelona wana mambo yao matamu na machungu inapokuja michuano ya Ligi ya Mabingwa Ulaya. Kwenye msimu wa 2012/13 wakali hao wa Nou Camp walifanya maajabu yao baada ya kuchapwa 2-0 na AC Milan huko San Siro, walikwenda kupindua matokeo kwenye mechi ya marudiano kwa kushinda 4-0 huko Nou Camp, huku mabao ya wababe hao yakiwekwa kimiani na Jordi Alba, David Villa na Lionel Messi, aliyeweka kwenye kamba mara mbili usiku huo.
 
Man United (Raundi ya 16 bora, 2013/14)

Kwenye raundi ya 16 bora msimu wa 2013/14, kipindi hicho Manchester United ikiwa chini ya David Moyes mambo yalionekana kama yangekuwa magumu kwao baada ya kwenda kuchapwa 2-0 na Olympiacos huko ugenini. Lakini, Man United waliporudi Old Trafford kwenye mechi ya marudiano walifanya maajabu kwa kushinda 3-0, shukrani kwa hat-trick ya Robin van Persie iliyowafanya wababe hao kutinga hatua ya robo fainali kwenye msimu huo.
 
Chelsea (Robo fainali, 2013/14)

Paris Saint-Germain walidhani kwamba wameshamaliza kazi baada ya kuwachapa Chelsea 3-1 katika mchezo wa kwanza wa robo fainali ya Ligi ya Mabingwa Ulaya msimu wa 2013/14. Kipigo hicho kiliwafanya Chelsea warudi nyumbani Stamford Bridge na kuwamezea mate ya akili, ambapo kwenye mechi ya marudiano Demba Ba na Andre Schurrle wakatupia kuifanya The Blues kushinda 2-0 na hivyo kutinga nusu fainali kwa faida ya bao la ugenini baada ya matokeo ya jumla kuwa 3-3.
 
Bayern Munich (Robo fainali, 2014/15)

Ligi ya Mabingwa Ulaya haijawahi kuishiwa maajabu. Msimu wa 2014/15, Bayern Munich walipokwenda Ureno walikumbana na kipigo cha mabao 3-1 kutoka kwa FC Porto mchezo wa kwanza wa robo fainali. Wakati Bayern wakionekana kama mwisho wao ndio umefika, walipindua matokeo kwenye mechi ya marudiano kwa kushinda 6-1 Allianz Arena, mabao ya Xabi Alonso, Robert Lewandowski (mawili), Thomas Muller, Jerome Boateng na Alcantara.
 
Real Madrid (Robo fainali, 2015/16)

Robo fainali ya Ligi ya Mabingwa Ulaya msimu wa 2015/16 ulikuwa na maajabu kwenye matokeo baina ya Wolfsburg na Real Madrid.

Katika mechi ya kwanza iliyopigwa Ujerumani, Real Madrid walikubali kichapo cha 2-0 huku Wolfsburg wakicheza mpira mkubwa sana ambao uliwafanya wengi waamini, Real Madrid havuki. Lakini, kilichokwenda kutokea huko Bernabeu, Cristiano Ronaldo alifanya maajabu yake akifunga hat-trick kuisaidia Los Blancos kushinda 3-0.
 
Juventus (Raundi ya 16 bora, 2018/19)

Cristiano Ronaldo mikikimikiki ya Ligi ya Mabingwa Ulaya haijawahi kumpa shida na ndio maana amekuwa kinara wa mabao kwenye michuano hiyo.

Msimu huu chama lake la Juventus lilichapwa 2-0 na Atletico Madrid kwenye mechi ya kwanza iliyopigwa huko Hispania. Mambo yalionekana kuwa magumu kwa Juventus kwenye mechi ya marudiano, lakini Ronaldo alifanya maajabu yake akifunga hat-trick kuifanya timu hiyo kushinda 3-0 na hivyo ikatinga robo fainali.
 
Barcelona (Raundi ya 16 bora, 2016/17)

Matokeo haya yaliwashangaza watu wengi zaidi. Msimu wa 2016/17, Barcelona ilifanya maajabu makubwa mbele ya Paris Saint-Germain kwa kupindua matokeo ya kuchapwa 4-0 katika mechi ya kwanza huko Paris na kisha wao kwenda kupiga mtu 6-1 kwenye mechi ya marudiano uwanjani Nou Camp. Sergi Roberto ndiye aliyefunga bao la ushindi kwenye mchezo huo huku Neymar akiwa staa wa mchezo kutokana na kile alichokifanya uwanjani kuivusha Barcelona.
 
AS Roma (Robo fainali, 2017/18)

Robo fainali ya Ligi ya Mabingwa Ulaya msimu uliopita, ambapo Barcelona walipocheza na AS Roma kwenye mchezo wa kwanza huko Nou Camp walishinda 4-1. Matokeo hayo yalionekana kama Barcelona wameshajihakikishia nafasi kwenye nusu fainali, lakini walipokwenda Rome, Italia walikutana na maajabu makubwa walipochapwa 3-0 na kusukumwa nje, shukrani kwa mabao ya Edin Dzeko, Daniele De Rossi na Kostas Manolas yakaitupa nje Barcelona.
 
Deportivo (Robo fainali, 2003/04)

Kipindi hicho, Deportivo La Coruna ilipokuwa kwenye ubora wake, robo fainali moja ya Ligi ya Mabingwa Ulaya msimu wa 2003/04 iliwakutanisha wao na AC Milan. Kipindi hicho Milan nao walikuwa moto kwelikweli na mchezo wa kwanza uliopigwa San Siro, walishinda 4-1 na kuonekana kama wanatinga nusu fainali. Lakini, kilichowapata huko Hispania ni aibu, walipigwa 4-0, shukrani kwa mabao ya Walter Pandiani, Juan Carlos Valeron, Alberto Luque na Fran Gonzalez
 
Liverpool (Nusu fainali, 2018/19)

Haya ni maajabu ya hivi karibuni zaidi yaliofanyika huko Anfield kwenye Ligi ya Mabingwa Ulaya. Liverpool baada ya kuchapwa 3-0 huko Nou Camp kwenye mechi ya kwanza ya nusu fainali, wengi waliamini kwamba huo ndio mwisho wao.
 
Kumbe hawakujua bana, mechi ya marudiano, Liverpool ilifanya maajabu ikishinda 4-0 huku mastaa wake Divock Origin a Georginio Wijnaldum kila mmoja akifunga mara mbili kuipeleka Liverpool fainali ya Ulaya kwa kishindo.
 
Cookies are required to use this site. You must accept them to continue using the site. Learn more…