Uzi maalum wa kupeana Likes: Comment chochote upate "Like"

Msimu uliopita, Arsenal walipokwenda Anfield walipigwa 5-1, kabla ya kupigwa 3-1 msimu huu na hivyo kufanya mechi zao mbili za mwisho kucheza uwanjani hapo, wavu wao kuguswa mara nane huku wao wakifunga mabao mawili tu. Arsenal usiwawekee dhamana wanapokwenda kucheza Anfield, itakugharimu.
 
Kipa: Vito Mannone

Majeraha ya makipa Wojciech Szczesny na Lukasz Fabianski yalimfanya kocha Arsene Wenger kumwanzisha kipa Vito Mannone kwenye mechi hiyo ya Anfield katika msimu wa 2012/13. Hakuwa kipa aliyeaminika sana, lakini Mannone aliifanya Arsenal isiruhusu wavu wao kuguswa siku hiyo, kwa jinsi alivyokuwa imara golini. Msimu ulipokwisha akauzwa Sunderland. Baadaye alikwenda zake Reading, ambako kwa sasa ametolewa kwa mkopo huko Minnesota United ya Marekani.
 
Beki wa kulia: Carl Jenkinson

Jenkinson alikuwa mchezaji wa Arsenal kwa miaka minane kabla ya kuhamia zake Nottingham Forest katika dirisha hili la majira ya kiangazi, akicheza mechi 70 katika kikosi hicho cha Emirates. Mechi nane kati ya hizo, alicheza msimu uliopita. Lakini, mara ya mwisho wakati Arsenal wanaichapa Liverpool uwanjani Anfield, Jenkinson alianza kwenye beki ya kulia na hakika alikuwa kisiki siku hiyo. Kwa sasa Jenkinson amekwenda kujiunga na Nottingham Forest inayocheza ligi ya Championship.
 
Beki wa kushoto: Kieran Gibbs

Beki Kieran Gibbs alitamba kwenye kikosi cha Arsenal kwa misimu 12 na kwenye msimu wa 2012/13 alikuwa kwenye kikosi cha kwanza panga pangua, ambapo alicheza mechi 27 za Ligi Kuu England kwa msimu huo. Katika mechi ya mwisho Arsenal kushinda nyumbani kwa Liverpool, Gibbs alikuwa kwenye beki ya kushoto, ambapo alikuwa moto si mchezo. Baadaye, Gibbs aliondoka kwenda kujiunga na West Brom, ambapo msimu wa kwanza tu timu ikashuka daraja, lakini alibaki huko hadi timu iliporudi tena kwenye Ligi Kuu.
 
Beki wa kati: Per Mertesacker

Beki Per Mertesacker amestaafu soka kwenye majira ya kiangazi ya mwaka 2018 na tangu hapo amekuwa akifanya kazi ya umeneja huko kwenye akademia ya Arsenal. Msimu wa 2012/13 ulikuwa msimu wa pili kwa Mjerumani huyo kwenye Ligi Kuu England, ambapo alikuwamo kwenye kikosi kilichoanza cha Arsenal ambacho kilipata ushindi wa mwisho uwanjani Anfield kwenye mechi ya ligi. Kwenye kikosi hicho cha Emirates, Mertesacker amecheza jumla ya mechi 221 kwenye michuano yote kabla ya kustaafu.
 
Beki wa kati: Thomas Vermaelen

Kwenye dirisha hili la majira ya kiangazi huko Ulaya, beki Thomas Vermaelen amefuata nyayo za staa mwingine wa Barcelona, Andreas Iniesta, kwa kuamua kuachana na maisha ya Camp Nou na kwenda Japan kujiunga na klabu ya Vissel Kobe. Vermaelen alipokuwa Arsenal alikuwa kiongozi kwenye safu ya ulinzi ya klabu hiyo, kabla ya kutibuliwa maisha yake na majeraha. Barcelona walivutiwa naye na kumsajili, ambako alikwenda kuishia kucheza mechi 53 tu katika miaka minne huko Nou Camp. Kwa sasa yupo Vissel Kobe
 
Kiungo wa kati: Abou Diaby

Tatizo la majeraha ya mara kwa mara limetajwa kuwa ndilo hasa lililokatisha maisha ya mchezaji mwenye kipaji kikubwa, kiungo Abou Diaby. Staa huyo alikuwa na kila kitu, lakini shida ni ‘pancha’ mfululizo tu zikaharibu maisha yake huko Arsenal, ambao alidumu kwa misimu 10, huku misimu miwili ya mwisho akijitahidi kucheza zaidi ya mechi 16 kwenye ligi. Baadaye alitimkia zake Marseille ya huko Ufaransa, ambako ndiko alikwenda kutangaza kustaafu uchezaji wa soka akiwa na umri wa miaka 32 tu.
 
Kiungo wa kati: Mikel Arteta

Mikel Arteta mwaka jana alihusishwa sana na mpango wa kurejea Arsenal kwenda kuwa kocha mpya baada ya Arsene Wenger kuondoka. Lakini, mabosi wa Arsenal waliamua kwenda kumchukua Mhispaniola mwingine, Unai Emery kwenda kuchukua mikoba ya Mfaransa, Wenger huko Emirates. Kwa sasa Arteta ni kocha msaidizi wa Pep Guardiola huko kwenye kikosi cha Manchester City wakifanya kazi kwa mafanikio makubwa. Enzi zake alipokuwa mchezaji, Arteta alikuwa nahodha wa Arsenal na alianza wakati mara ya mwisho Arsenal walipojipigia Liverpool uwanjani kwao Anfield kwenye mchezo wa ligi.
 
Kiungo mshambuliaji: Alex Oxlade-Chamberlain

Kiungo Mwingereza Alex Oxlade-Chamberlain alihama Arsenal kwenda kujiunga na Liverpool, katika dili lililoshtua wengi. Kilichoaminiwa awali ni kwamba Liverpool wamepotea kumnasa mchezaji huyo, lakini baadaye kocha Jurgen Klopp alikwenda kupata huduma bora kabisa kutoka kwa staa huyo. Majeraha yalikuja kumtikisa Chamberlain, lakini sasa amepona na kurudi uwanjani. Chamberlain alianza kwenye kikosi cha Arsenal kilichopata ushindi mara ya mwisho uwanjani Anfield miaka saba iliyopita. Kwa sasa Chamberlain yupo kwenye kikosi cha Liverpool na kuwa sehemu ya timu inayoitesa Arsenal uwanjani Anfield.
 
Kiungo mshambuliaji:Santi Cazorla

Kipenzi cha mashabiki wengi huko Arsenal. Santi Cazorla alikuwa fundi wa mpira aliyewahi kutokea kwenye kikosi cha Arsenal kwa miaka ya karibuni. Ile Arsenal ya mwisho kushinda Anfield kwenye mchezo wa Ligi Kuu England, Cazorla alishikilia kwenye sehemu ya kiungo ya kushambulia na alikuwa mmoja wa waliotikisa nyavu kwenye mechi hiyo. Majeraha yalimtibulia maisha Arsenal na wengi wakidhani kwamba mwisho wake wa soka umefika, Cazorla amekuwa moto huko Villarreal anakocheza kwa sasa na kurudishwa kwenye timu ya taifa ya Hispania.
 
Mshambuliaji:Lukas Podolski

Mfungaji mwingine wa bao katika mechi hiyo ya mwisho ambayo Arsenal walipata ushindi Anfield. Naye kwa sasa anakipiga huko Vissel Kobe, ambapo anacheza na mchezaji mwenzake wa zamani wa Arsenal, Vermaelen. Podolski alikuwa hatari sana ndani ya uwanja na hakika kwenye timu yake ya taifa alikuwa maarufu kuliko hata katika klabu. Ujerumani walimfaidi zaidi mshambuliaji huyo, licha ya kwamba Wenger pia alijitahidi kwa uwezo wake kupata huduma nzuri kutoka kwa mshambuliaji huyo, ambapo alifunga mabao 31 katika misimu yake mitatu. Kwa sasa yupo zake Vissel Kobe
 
Mshambuliaji: Olivier Giroud

Straika, Olivier Giroud alitua Arsenal akitokea huko Montpellier ambayo ndio ilikuwa imetoka kubeba ubingwa wa Ligue 1. Maisha yake ndani ya Emirates yalikuwa bomba na hakika alikuwa kwenye kikosi cha mwisho cha Arsenal kushinda mechi Anfield katika Ligi Kuu England. Kwenye kikosi cha Arsenal, Giroud hadi anaondoka alikuwa amefunga mabao 73 katika mechi 180 za michuano yote aliyocheza hapo na kubeba mataji kadhaa hasa Kombe la FA. Kwa sasa Giroud yupo Chelsea na msimu uliopita tu aliitesa timu yake ya zamani kwenye fainali ya Europa League.
 
Kikosi cha Liverpool: Pepe Reina (AC Milan), Glen Johnson (amestaafu), Martin Skrtel (Atalanta), Daniel Agger (amestaafu), Jose Enrique (amestaafu), Joe Allen (Stoke City), Steven Gerrard (kocha Rangers), Nuri Sahin (Werder Bremen), Raheem Sterling (Man City), Fabio Borini (AC Milan), Luis Suarez (Barcelona).
 
Cookies are required to use this site. You must accept them to continue using the site. Learn more…