Twala ameniambia, katika mwaka 1966, Othman Shariff alikuja Tanzania kwa kazi za Serikali na baada ya kumaliza kazi zake DaresSalaam, alitembelea Zanzibar. Hakutimiza muda mkubwa ila ghafla tulimuona Othman ameletwa katika kikao cha mkutano wa Baraza la 'Mapinduzi'. Twala anasema kuwa Karume aliwaambia, "Nimemleta huyu fisadi mbele yenu, juu ya kumfanya Balozi wa Serikali yetu huko Marekani, bado hajatoshelezeka anataka lazima awe yeye ndiye Rais wa nchi hii. Vitimbi vyake vyote anavyovifanya vya kutaka kutuletea fujo na michafuko katika nchi yetu ili apate kuwarejesha mabwana zake,
tumevipata kwa ukamilifu kabla yeye mwenyewe kufika Tanzania. Alipofika hapa vijana wa kazi walikuwa wakimuandama katika kila njia zake bila ya yeye mwenyewe kufahamu. Katika nyendo zake, vijana wa kazi wamemuona ana jishughulisha na kuvitembelea baadhi ya vituo vyetu vya kijeshi, na alikuwa akijaribu kuwatomasa tomasa baadhi ya wanajeshi wetu ili waweze kuwa upande wake hapo atapokuwa tayari kuufanya huo ufisadi wake. Vijana wa kazi walipomuona amefika kiasi hicho, walimtia mbaroni na kumleta kwangu, na mimi sasa namleta mbele yenu kwa kutaka uwamuzi wenu nini tumfanye"