Twala ameniambia kuwa wengi kati yetu tulipigwa na msangao kwani tulikuwa na hakika kuwa aliyokuwa akiyasema Karume yalikuwa maneno ya uwongo, lakini nani ataweza kuuliza au kumkaidi au kumhoji. Mwisho mwenyewe alitoa uwamuzi wake wa kumfunga gerezani Othman Shariff kifungo cha miaka kumi! Twala ameniambia kuwa, hapo hapo Karume aliwapa amri Ibrahim Makungu na Edington Kisasi wamchukue Othman Shariff kumpeleka gerezani kwa kuwa ndiyo keshahukumiwa. Twala alipokuwa akinizungumzia hayo, nilidawaa. Nilimuuliza Twala, "Kwani katika hilo Baraza lenu mlikuwa hamna haki ya kusema au kuuliza? Basi palikuwa na faida gani ya kuitana na kukutana?" Kwangu miye kuyasikiya haya hayakuwa ya ajabu kwani serikali hii kuwazuliya watu uwongo wananchi ndio misingi ya siasa yake. Huwazulia uwongo wakawafunga, wakapokonya vyoa bali hata wakawachukulia ahli zao. Huko magerezani wakawatia vilema kwa mateso na wengine wakawauwa.