Wakuu,
Kuna jambo la muda mrefu linanipa wasiwasi sana kuhusu namna mji wa Mbeya unavyokua.
Sasa hivi ukipita maeneo mbalimbali utakuta kila kona kuna ujenzi, mara nyingi bila mpangilio wa mji.
Wengine wameanza hata kupanda kuelekea Kawetere, eneo ambalo kiasili ni mlima wenye vyanzo vya maji na mandhari ya kipekee.
Swali kubwa: tukiruhusu hali hii iendelee bila udhibiti, nini kitatokea baada ya miaka 10–20?
🔹 Madhara ya mazingira: Uharibifu wa vyanzo vya maji, mmomonyoko wa udongo, na hatari ya maporomoko ya ardhi.
🔹 Madhara ya kijamii: Kukosekana kwa huduma za msingi kama barabara, maji na mifumo ya taka kwa sababu maeneo hayakupangwa.
🔹 Madhara ya kisheria: Baadaye serikali inaweza kuamuru bomoabomoa, jambo linaloleta hasara kubwa kwa wananchi.
Kwa sasa inavyoonekana, jitihada za kupanga mji hazilingani na kasi ya watu kujenga hovyo.
Hali hii ikiachwa iendelee, Mbeya inaweza kupoteza hadhi yake ya kipekee na kubaki ni mji usiopangika wenye changamoto nyingi za kimaisha. Uholela huu upo hata kwenye mpangilio wa usafiri katikati ya mji. Stendi ya Kabwe nayo ni kama haipo sababu yeyote pale anafanya lolote wakati wowote (magari binafsi kuegesha,soko mjinga,bajaji, daladala vyote vimetapakaa stendi ya Kabwe)
Ushauri wangu:
Serikali za mitaa, mamlaka ya ardhi na mji, pamoja na wananchi wenyewe, wanapaswa kushirikiana kupanga, kudhibiti na kutekeleza sheria za mipango miji.
Vinginevyo kizazi kijacho kitakuja kulalamika kwa makosa tuliyoyafanya leo.
Kwa sasa ni mara 100 uende ukaishi Tukuyu uwe unakuja kufanyia kazi Mbeya mjini. Mji umekuwa kero vibaya sana as if hakuna uongozi.