Aliyekuwa Mhadhili wa Chuo Kikuu cha Dar es Salaam, Kitivo cha Sheria, Profesa Jwan Mwaikusa (58), amefariki dunia saa nne usiku wa Julai 13, 2010 baada ya kupigwa risasi na watu wasiojulikana nyumbani kwake eneo la Salasala jijini Dar es Salaam.
Mwaikasu ni mmoja kati ya watu watatu waliouawa katika tukio hilo ambapop wengine waliouawa ni pamoja na mpwa wake, Gwamaka Mwakanjara (25), na jirani yake John Ngowi, mwenye umri wa miaka zaidi ya 40.
(bofya picha zilizopo hapa kuzikuza na kusoma maelezo yanayoambatana na picha husika)
Imeelezwa na mashuhuda wa tukio hilo kuwa wauaji hao hawakuchukua mali yeyote, ingawa mmoja wa watoto wa Profesa Mwaikusa alisema aliwaona wakimpekua baba yake baada ya kumuua. Washiriki wa mauaji hayo walimwinda Profesa Mwaikusa wakati akiingia kwenye lango la nyumbani kwake baada ya kufunguliwa lango hilo na kuingia ndani ya nyumba yake.
Akisimulia tukio hilo, mtoto wa Profesa Mwaikusa, Baraka Mwaikusa (28), alisema wakati baba yake anauawa kwa risasi alikuwa ndani akijiandaa kulala na alishuhudia tukio lote baada ya kusikia kishindo na kutoka nje.
"Hili ni tukio baya sana kwangu, kwa sababu baba ameuawa wakati namuona, wakati akiingia hapa nyumbani na gari lake alifunguliwa lango na kijana mmoja jirani yetu, wakati huo mimi nikiwa ndani.
"Nilisikia muungurumo wa gari, nikajua tu kuwa ni mzee anaingia, nikamuona akiendesha gari kuelekea geti la juu ili ageuze gari kama kawaida yake.
"Wakati akigeuza gari, ghafla nilisikia kishindo cha ajabu, nikashtuka kwa sababu sikujua kilikuwa ni kitu gani ila nilihisi ni kitu Fulani kilichokanyagwa na tairi la gari.
"Kumbe kishindo nilichosikia ilikuwa ni risasi ambayo tayari majambazi hao walikuwa wamempiga binamu yetu Gwamaka baada ya kukutana nao getini uso kwa uso na kupishana Kiswahili, huku wao wakimtaka kuinua mikono juu.
"Dakika chache baada ya Gwamaka kuuawa, nikasikia watu wawili wakimwamrisha baba, ‘fungua mlango wa gari, "Nakwambia fungua mlango, fungua haraka ushuke chini."
"Mzee hakutii amri yao, akaendelea kukaa kwenye gari huku akiwa amefunga vioo," alisema Baraka.
Kwa mujibu wa Baraka, wakati majambazi hao wakimwamrisha Profesa Mwaikusa kisha kumuua kwa risasi, yeye alikuwa ndani akiwaona kupitia dirishani.
"Baba alipokataa kutii amri yao, nikaona mmoja ananyanyua bunduki akamlenga baba na kumpiga risasi mbili kifuani na kumuua hapo hapo kisha wakamshusha kwenye gari na kuanza kumkanyaga huku wakimpekua mifukoni.
"Nilipoona hivyo, nilichanganyikiwa na kutoka nje, na kuwafuata eneo hilo na kuwauliza kwa nini wamemuua baba?
"Wakaniambia, ‘asingekuwa mbishi tusingemuua', mmoja wao akatoa bastola, akaniuliza tena, ‘na wewe unataka tukuue kama baba yako'?
"Hapo nikanyamaza, wakanikamata na kuanza kunipiga ngumi na makofi, kisha wakaniambia ‘mikono juu, ondoka hapa, kimbia haraka hatutaki kukuona'.
"Niligeuka nikaondoka taratibu, wakanirushia mawe nami nikaanza kukimbia, kwa kweli wakati huo sikuwa na akili hata moja ya kufikiri lolote nilipoteza kabisa kumbukumbu," alisema.
Baada ya majambazi hao kumuua Profesa Mwaikusa na mpwa wake, waliondoka nyumbani hapo na kuvamia maduka kadhaa na kupora fedha, vocha za simu na mali nyingine.
Inasemekana wakati wa uvamizi huo, Ngowi alipekuliwa na kukutwa na bastola. Hatua ya kukutwa na bastola ilimfanya mmoja wa wajambazi hao ampige risasi mbili. Imeelezwa kuwa Ngowi alifika nyumbani kwake na kuchukua bastola hiyo baada ya kupita kwa Profesa Mwaikusa na kuona purukushani zilizokuwa mahala hapo na kuhisi kuwa kuna tukio la uvamizi. Wakati Ngowi akiwa anarudi eneo la tukio, ghafla naye alitekwa na kuunganishwa na wengine waliokuwa wamelazwa chini nje ya duka na kuanza kupekuliwa, wengine wakipokonywa simu na fedha na alipopekuliwa yeye alikuwa mbishi na ndipo alipopekuliwa kwa nguvu na kukutwa na Bastola na kisha kupigwa risasi ambapo alikimbia kutoka eneo hilo akiwa amechanganyikiwa na kufia eneo la Kanisani.
Kaimu Kamanda wa Polisi, Kanda Maalum ya Dar es Salaam, Charles Kenyela, alithibitisha kutokea kwa tukio hilo na kusema Jeshi la Polisi limejipanga vizuri kuhakikisha watu hao wanakamatwa.