Mimi ni mkazi wa Mfaranyaki, Kata ya Tungi, Manispaa ya Morogoro, mtaani kwetu tumechoshwa na matukio ya watu kupata majanga ikiwemo kupoteza Maisha katika eneo hilo katika Mto Ngerengere uliokatisha Kata ya Tungi na Kihonda.
Mto huu umekuwa ni kero na tishio kutokana na watu kupoteza maisha wanapofanya shughuli za uvuvi na vifo eneo hilo, hiyo inatokana na kina kilichoongezeka katika mashimo yaliyochimbwa katika ndani ya mto wakati wa ujenzi wa Reli ya Kisasa ya SGR.
Nakumbuka Disemba 16, 2024, Mwanaume anayekadiriwa kuwa na Umri wa Miaka 27, ambaye jina lake halijafahamika mkazi wa mtaa huo alipoteza maisha baada ya kutumbukia ndani ya Mto huo wakati akifanya shughuli ya uvuvi.
Kipindi cha Mwaka 2024 tayari jumla ya watu 4 wamepoteza maisha wakati wakiendelea na shughuli za uvuvi katika mto hali ambayo inatishia usalama wa watu wa eneo hilo hasa wanaofanya shughuli za uvuvi na kujipatia kipato.
Hali hii inatufanya kuwa na hofu katika eneo hili, hao ni watu wazima tunakuwa na hofu, watoto pia wanaweza kupoteza maisha maana kuna wengine wanakuja kucheza kando ya mto huo.
Nashauri Serikali kupitia watu wa Bonde Wami/Ruvu kwa kushirikiana na Manispaa ya Morogoro kufukia mashimo yaliyochimbwa katika mto huo wakati wa ujenzi wa Reli ya Kisasa ya SGR, kutokana na watu kuendelea kuyatumia katika shughuli za uvuvi jambo linalohatarisha usalama wa watu hao.
Wakati huohuo umakini unatakiwa kuongezeka kwa wote wanaofanya shughuli zao maeneo hayo watambue kuwa kina ni kirefu tofauti na hali inavyoonekana kwa juu.
View attachment 3194864View attachment 3194865View attachment 3194868